Read Alladian 2 ROJA KÍDÍ 9 Bible Online

2 ROJA KÍDÍ 9 - Alladian bible

2 ROJA KÍDÍ 9

¹Buluke yébosunam opéélok kaaluna miri akonem tomla Elishabí poto, “Nok galugem ugíngke uug delo péllík supala sim tél kaklak sim bomla Ramoth Gileadlo enkala.

²No delo pííyém Nimshike oten, Jehoshaphatke oo Jehume matalangka. Bím edílo kaarík suyédí, no bím petom tomngu supala pírtek kolo aabo langka.

³Delo tél kaklak sim bomla bím purlum dola sipe polangka, ‘Sikepe RUUTUM bí podung: Ngo nom Israellok rojape tosakdung.’ Depe ipala eyabem siyya pala duglangkuka; adol mapeka.”

⁴Depe yaamé kaaluna de Ramoth Gileadlo ento.

⁵Bík píído delo sipaying migom kídíe kebangko duubosudo. Bí poto, “Ngo nok legape políknamko kadung.” Delo Jehu bí íngkíto, “Ngoluke ara sokke sékome?” “Nomna, sipaying migom,” emla amide poyansuto.

⁶Jehu gerepla ekumlo aatoku. Delo amide Jehuke dumpong delo tél dem purlík dola poto, “Sikepe Israelke RUUTUM bí podung: Ngo nom Israellok rojape tosakdung.

⁷Ngo ngokke béérang kaalu miri, delokke abíd-abíd béérang kídíem Jejebelke alaglok yilíng bidmonam kídí edoem radokupe, no nok ruutum Ahabke ekum-erangem petyin langka.

⁸Ahabke ekum-erang takame nyokyinyé. Abíldak ruutumdak, ngo Ahab ke milokong takamem Israellok ipakyé.

⁹Ngo Ahijahke oo Baasha keelang Nebatke oo Jeroboamke ekum kísa dope Ahabke ekum erangem iyé.

¹⁰Jejebel ke simangem Jejreel amonglo ekiie dodope iyé, delokke sékoteng bík simangem yuna kamayé.” Delo bí eyabem siyya pala duktoku.

¹¹Edílo Jehubí lenlangkula migom angong kídí duupomlo aatokudín migom akonde bím íngkíto, “Kape takame aidunía? De tumna amide ingkoko nokkíng aabomdun?” Jehu poyansuto, “Nolu ami demlang bík ponam kídarem kéndung.”

¹²Bulu pokai, “Ma, ngolu kénmang. Ngolum aroem posutola.” Jehu bí poyansuto, “Simoko bík poname, ‘RUUTUM bí sikepe podung: Ngo nom Israel teyolo rojape yégebodope tosaklíkdung.’ ”

¹³Delo bulu agíke galugem teyong yalum baale delo sotam pala Jehume leraape dakmoto. Bulu bikul mutla, “Jehu bí roje,” emla erím-erímpe gogyito.

¹⁴Nimshike oten, Jehoshaphatke oo Jehu Joramme mirupe rulento. (Joram lang Israel takame Ramoth Gilead among delo Sirialok roja Hajael kelok lamkang dagbomdungai,

¹⁵Siria roja Hajaelme mimak ido delo Siria ami kídíe tarí moket namdem ipísukupe Joram roja Jejreello aalat sula duudoku.) Dekepe ila, Jehu bí poto, “Nolu sikepe míídumílo doolung sok sékokom gípit-gíyitla legang sim Jejreello pokan goope aimang.”

¹⁶Delo bí guré-gaarilo resangla Jejreelpe ento, kapeila Joram Jejreello tarídem dunggela duudo. Depe idoem Ahajiah roja bím kangkape endo.

¹⁷Edílo tongi delo dakla kaatíbomna amide Jehuke maglíngdem kaatodí, bí goggong suto, “Ngo maglíngko sokdan aadakpe kaadung.” Joram bí ukumkai, “Gurélok amiko duktosula íngkí motoka, bulu aipeya aadune?”

¹⁸Guré dukna amide Jehume poto, “Ngoluke roje nom aipeya aadune dem íngkídope lulígdung.” Jehu bí poyansuto, “Aipe aala nolu ingkoko iyén? Ngok méélam so gímín getola.” Tongilo dakla kaayanade pokai, “Amide bulum píngkai, idola bí aalat sukumang.”

¹⁹Depeila rojade annyinape guré dukna amiko melíktoku. Bí edílo bulukíng píngkadí delo bí ííto, “Ngoluke roje nolu aipeya aadune deme íngkídung.” Jehu poyansuto, “Aipe aala nolu ingkoko iyén? Ngok méélamlo gímín getola.”

²⁰Lekoda kaabomnade pokanto, “Bí bulum píngkai, idola aalat sukumang. Guré-gaari dukkor esi Nimshike oten Jehu kísape kaanamko, kapeila bí tumna ami kísa guré-gaariem dugbomdung.”

²¹Delo Joram ukum líkto, “Gurédem gaarilo kokyon suto.” Guréem gaarilo kokyon sulíkrodem Israellok roja Joram lang Judahlok roja Ahajiah bínyi agí-agí gaarilok Jehume ríksukolo duglento. Bínyi Jehume Jejreellok Nabothke moolop delo ríksuto. Delo Joram Jehume kaala íngkíto,

²²“Kape Jehu no míípopía aadun?” Jehu bí poyansuto, “Edíloope nokke ane Jejebelke deddípe mimang kumtínam elang moya montronge kadudem, kape kísa míípoe kayén?”

²³Joram pelkutsula dugdak langkula Ahajiahme gogto, “Ahajiah, si rukupname.”

²⁴Jehu iyyi epugem ralnamrupe pugardola yokmoko Joramme gordung annyi pénsamlok apto. Yokmode bík ainangem torkéla, bí guré-gaari delo oletla sikai.

²⁵Jehu bí guré sipaying migom Bidkarme ukumto, “Simang dem laala Jejreel lok Nabothke among elo yoblíktoka. Ngonyike, bík abu Ahabke méélamlo dugmín gedo delo, kape kísa RUUTUM bí bík ipenamem pobituadí, dem míípang sutola.

²⁶RUUTUM pobeng bito, ‘Melo ngo Naboth kela bík oo kídíke iyyiem kaato. Delokke ngo nolum sok areem so moolop so dordo kupe iyé.’ Dekemílo supak bík simangdem joola delo moolop delo RUUTUM ke lukampe yoblíktoka.”

²⁷Sim inam kídar sim kaapala Judahlok roja Ahajiah bí Beth Haggan bedangpe dugnyok gekai. Jehu bím monmín gedola, “Bímkom apto,” emla bottepe uglíkto. Bulu bím guré-gaari delo Ibleam luune ampengke Gur emnam doolung delo píídoem tarí moketto. Idola bí Megiddope duknyok gela delo silíkkai.

²⁸Bík béérang kídíe bík simangdem guré-gaarilok Jirusalemlo gelík langkula, Dabidke doolunglo bík abulok ago ampenglo bímteng yutoku.

²⁹Ahabke oo Joramke takying kolang takngo méélamlo Ahajiah Judahlok rojape ito.

³⁰Delo Jehu Jejreello píngato. Edílo legang takamem Jejebel tattodí, bí bík amigem morí ilíksula, dumídem kampope tuplaabsula, kirkikolok kaalendo.

³¹Etor luuyab delo Jehu pédapakdo delo bí íngkíto, “Jimri, no míípopía aadun? No agí ruutumem petsune?”

³²Jehu bí kirki danpe kaasasudola poto, “Séko bulu ngokke danpe idun?” Mumbal annyi demangkom angumko bím kirkilok kaalendo.

³³“Bím joola so elbooto,” emla Jehu poto. Dekepeila bulu Jejebel me rumkíngpe yopletto. Bík iyyi kídíe ekum suppi demlang guré kídíem pyakkatto. Jehu bím guré-gaarilok dugjémla,

³⁴ekum arang delo aala dolík-tíílík pala poto, “Kaatola béélíknam mime sim, supak bím yutoka, kapeila bí roja ome atome.”

³⁵Idola bulu bím yupe emla ekum delok lenla kaaname bík tuklong, delokke ale-alag petome doodo.

³⁶Bulu aalat sulangkula Jehume pobitoname bí pokai, “Si RUUTUM ke Tishbelo duuna Elijah kíng, ‘Jejreel mooloplo ekiie Jejebel ke amíl em puké-puyéla doyé.

³⁷Jejebelke simangdem tona kaimape Jejreel moolop delo dootíla, sékoteng si Jejebel emla kangkén yimayé,’ emla políknam pakpe ikai.”