Read Alladian 1 ODONG 10 Bible Online

1 ODONG 10 - Alladian bible

1 ODONG 10

¹Philistain kídare Israel kídíem Gilboa Díítumlo mimakko makto. Deddína Israel ami kídíem delo mokato, delokke abíd kídíela Roja Saul delo bík oo kídíe dugnyokgeto.

²Idola Philistain maglíngde Roja Saul melang bíkke oo kídardem píímín gela bík oo angum: Jonathan, Abinadab, delokke Malkhishua bulum petto.

³Mimakde Roja Saulke ampeng-amleng delo yagorupe motíkto, delokke bím miruke epuk kídíde tarí gedope apketto.

⁴Dekepeila, Saul bí mimak ekurang geyabina yaamé koodem poto, “Nokke yoksem satsula, ngome níkkatoi, demangke dínbíng iyod[7] sumana ami kídar si aala ngome ipusilééyé.” Idokom yaamé koode depe ipe yagorupe pesoto. Depe ikolok Saul bí agí yoksem satsula, delo omat sulíkla sikai.

⁵Edílo bíkke ekurang geyabina yaamé koode bím sidope kaatodín, delo bíteng agí yoksem satsula, omat sulíkla sikai.

⁶Sikepe Saul sito; bílang bíkke oo angume, delokke bík erang takame lekope sibosuto.

⁷Edílo díítum lebelo duuna Israel kídarde sipayingem duknyok dope kaatodín, delokke Saul Roja melang bík oo kídíem sikai emla tattodín, bulu buluke doolung dem mepakla duknyok geto. Delo Philistain ami kídíde aala, buluke dungkodem dungabomkai.

⁸Longe kondem Philistain kídíde simang ekurang kídíem líípe em aadokuem bulu Saul kelang bík oo kídar lokke simang kídíem Gilboa Díítum delo doodope kaato.

⁹Bulu Saulke dumpongem teela, delo bíkke mimak ekurangem laabínla, Philistia dungko tabung delo, buluke uyu kumnam kídar emla ami takamem ashénam legang sim pogodope kotokieke megelíktoku.

¹⁰Bíkke mimak ekurangem buluke uyu kídíem kumsuko ekumlo metoku, delokke dumpong dem Dagon uyume kumsukolo paklíktoku.

¹¹Edílo Jabesh Gileadlo duuna tabunge Saulme Philistain lokke inam tabungem tatyin todín,

¹²miga-miramna tabude enla, Saul kelang bík oo kídíke simang kídarem Jabesh doolunglok laala jongang bomtoku. Delo buluke along dem esing bottena rumkíng kolo bulu yutoku. Depe irodem bulu tabunge longe kínídko domang-tíímangpe nyolíkto.

¹³RUUTUM kelo aro míngkeng kamang kolok Saul sikai. Bí RUUTUM ke lulígnamem igemato; delok teyolo bí sinalok aid emteng bí íngkí-tatkísuto,

¹⁴delokke RUUTUM keelok íngkí-tatkísumato. Dekepe ikolok RUUTUM bí bíme petpala, Jesseke oo Dabid kelo asi-amongdem ruutum bomdokupe bilíkto.