Read Alladian 1 ODONG 11 Bible Online

1 ODONG 11 - Alladian bible

1 ODONG 11

¹Tabung Israel kídíe Hebron doolung delo Dabid kelo dumsudola pokai, “Ngolu nokke iyyi-adínsue.

²Kerang longe delo, Saulke rojape yébodo looteng, nomin Israelem gílenbola, delokke aabolangkula ine; delokke RUUTUM nokke Shédí nom sikepe poto, ‘No ngokke Israel amiem kaabomnape iyé, delo no ngokke Israel ami teyolo ruutum boyé.’”

³Dekepeila, Israellok abu-abíng takame Hebronlo, roja kelo aato; delo RUUTUM ke keralo Hebronlo Dabid bí Israel ami kídílo daapongko ibosuto, delokke RUUTUMke Samuel kelo políknampe Dabidme Israel lokke rojape pídélíkto.

⁴Dabid Roja lang tabung Israelde Jirusalem danpe enlento. Dekepe idodelo among dem Jebus emdungai, delokke kerayalumpe among dem duubomna Jebus ami kídare among delo duubomdo adíai.

⁵Jebus ami kídíde Dabidme edílokom bí luune delo aalamayé emto. Idola, Dabid bí líísaklok píínam Jayon doolung deme ikumla laala, Dabidke doolung emla míndokupe itoku.

⁶Dabid poto, “Sékodín Jebus amiko kerayalumpe petyédín, bím sipaying maglíng lokke botteyalumna ruutumpe imoyé.” Jeruiahke oo Joab bí kerayalumpe enlen gela, bí sipaying maglínglok botteyalumna ruutumpe iboto.

⁷Delo Dabid bí edíírupe yabgo molíkla doolung delo duulíkla deme Dabidke doolunge emlíkto.

⁸Bí doolungdem anípe, dííte lokke sanggodan delo kédéng gebíngko delok morep lentoku, delokke Joab bí bíkke ingong dem iyintoku.

⁹Ralyayalumna RUUTUM bí bíkkíng duumín gela, Dabid bí ralyayang-ralyayang ito.

¹⁰Si Dabidke miramruna sipaying kídíe. Abíd Israel ami kídarlo lekope, RUUTUM ke pébisunampe, bulu bím rojape idope igulto, delokke bíkke yétaem edíng moto.

¹¹Kerayalumpe Hakmon opín lokke Jashobeam, bí Angum delokke ruutumpe yéto. Bí bíkke gínínglok mimak irum atel kolo, língko angum amiko mimak imínsula petto.

¹²Bíkke méélamlo Ahoh opín lokke Dodoke oo Eleajar bí.

¹³Edílo Philistain ami kídare mimak ipe Pas Dammim amonglo bamdum sutodín, delo Eleajarkom Dabid kíng delo yéto. Yaklek arík ko delo kato, delokke ami kídarde Philistain kídardem pesola duknyok getoku.

¹⁴Idokom bí arík raadang delo dagla, aríkdem mopít bomdola, Philistain kídídem petto. RUUTUM bí bíme botterupe ikumnam em bito.

¹⁵Longeko Íying Angum sipaying ruutumlok ruutum angumde Dabid rojake dungko Adullam líípík anínke elíng delo gíto. Ampeng delo Rephaim Yiibe danlo Philistain sipaying kídare notko ila duudoai.

¹⁶Dekepe ido delo Dabid bí dííte delo yabgo ila duuto, delokke Philistain lokke opééko Bethlehem em laala duubomto.

¹⁷Dabid bí yagorupe ekumem míípang sudola poto, “Ah, ngome Bethlehem elok luyab ampengke asi deerung loge asiko laabikuna kuasai!”

¹⁸Delo ruutum angumde Philistain kídíke notko kídí delok miramrupe gíkokla, Bethlehem lok luyab ampengke asi deerung deloge asiem sosaala Dabidme bomabitoku. Idokom bí tíídumem, asi dem RUUTUM keelo amanpe purlíkdola,

¹⁹poto, “Sim ngo edílokom tíílamang. Sim tíímílo séko bulu agíke turpenam emteng megeyéla midu-mirampe asi sim bomang bitung kudín, buluke iyyiem tíínam kísadung!” Dekepeila, bí asidem tíímato. Sike kídí si miga-miramrupe gérnam ruutum angum delokke agér kídíe.

²⁰Joabke bíro Abishai bí midum Íying Angum lokke ruutum yalume. Bí bíkke gíníng loge mimaklo língko angumko imínsula bulume petyinla, Íying Angum aradelo amín kato.

²¹Bí Íying Angum delokke amín kayayalumnape ito, delo buluke ruutumpe iboto. Idola, bí angum delokke kísa amín kamato.

²²Kabjeel doolung lokke Jehoiadake oo Benaiah bí miramruna sipaying kuai; bík deddína miramrupe gérnam aralo Moablok mimak ijiina annyiko mokanamde akone. Delokke tapam odo longe konemteng bí kobung kolo oila myomur simyoko mopetto.

²³Bí bodonge mitar annyidola botte ina Ijipt ami koteng mokato. Ijipt amide alaglo ege sumnana gilgang kísana gíníng koteng bomdungai; idokom Benaiah bí banggénko bomla, Ijipt ami lokke alag delok gíníngdem rotbínla, bíkke gíníng deloge bíme níkkato.

²⁴Sike kídar si Íying Angum delokke migulkon Jehoiadake oo Benaiahke midu-mirampe inam agér kídíe.

²⁵Bí midum Íying Angum lokke amín kayayalumne, idola midum Angumdem píímang. Dabid bí bím kaabom-tatbomna sipaying lokke ruutumpe bíme meto.

²⁶Sipaying maglíng delokke miramna ami kídare: Joabke bíro Asahel, Bethlehem lokke Dodoke oo Elhanan,

²⁷Harod lokke Shammoth, Pelon opín lokke Helej,

²⁸Tekoah lokke Ikkeshke oo Ira, Anathoth lokke Abiejer,

²⁹Hushath opín lokke Sibbekai, Ahoh opín lokke Illai,

³⁰Netophah lokke Maharai, Netophah lokke Banahke oo Heled.

³¹Benjamin opínlokke Gibeahlo duuna Ribaike oo Ithai, Pirathon lokke Benaiah,

³²Gaash roojik kídí yiibelo duuna Hurai, Arbath opín lokke Abiel,

³³Baharum lokke Ajmabeth, Shaalbon lokke Eliahba,

³⁴Gijon opín lokke Hashem, Harar opín lokke Shageeke oo Jonathan,

³⁵Harar opín lokke Sakarke oo Ahiam, Urke oo Eliphal,

³⁶Mekerath opín lokke Hepher, Pelon opín lokke Ahijah,

³⁷Karmel lokke Hejro, Ejbaike oo Naarai,

³⁸Nathan ke bíro Joel, Hagrike oo Mibhar,

³⁹Ammon opín lokke Jelek, Beeroth lokke Naharai, Jeruiahke oo Joabke mimak ekurangem geyabina yaamé koode,

⁴⁰Ithri opín lokke Ira lang Gareb,

⁴¹Hittit opín lokke Uriah, Ahlaike oo Jabad,

⁴²Reuben opín lokke Shijake oo Adina, bí Reuben opín kídíke ruutumpe íying angum ko yébola yéto,

⁴³Maakahke oo Hanan, delo Mithni opín lokke Joshaphat,

⁴⁴Astherat opín lokke Ujjiah, Aroer opín lokke Hothamke oo Shama lang Jeiel,

⁴⁵Shimrike oo Jediael, delo Tijit opín lokke bík bíro Joha,

⁴⁶Mahabit opín lokke Eliel, delo Elnaamke oo kídar, Jeribai lang Joshabiah, delo Moab lokke Ithmah,

⁴⁷Mejob opín lokke Eliel, Obed delo Jaasiel.