Read Alladian 1 ODONG 12 Bible Online

1 ODONG 12 - Alladian bible

1 ODONG 12

¹Edílo Dabid bí Kishke oo Saulke legape elo-belo malen geyimape itodín, delo si ami kídí si Dabid kelo Jiklag amonglo aane, delokke bulu bíme mimaklo igulna miga-miramna kídar arang lokke.

²Bulu takame ityi-epug bomla, epugem, delokke dabuem lakponlok lakbík pelang lakkélok akampe apjing-gejing neke; bulu Saulke edung-erang Benjamin opín lokke.

³Ahiejerbí ruutum yalume delokrongem Joash. Bínyi annyipak si Gibeah doolunglo duuna Shemaahke oo kídare; delokke Ajmabethke oo Jejiel lang Pelet; Anathoth opín lokke Berakah lang Jehu,

⁴Gibeon lokke Ishmaiah, bí midum íying angum lokke akone, delokke íying angum lokke ruutum peteng yéboto; Gederah lokke Jeremiah, Jahajiel, Johanan, delo Jojabad,

⁵Harup opín lokke Elujai, Jerimoth, Bealiah, Shemariah delo Shephatiah,

⁶Korah opín lokke Elkanah, Isshiah, Ajarel, Joejer delo Jashobeam,

⁷delo Gedor among lokke Jerohamke oo kídar Joelah lang Jebadiah.

⁸Dabidke yépol mooruk yabgolo duudungem, Gad opín loge amín kanarung, mimak iyitsuna sipaying eke Dabid keelo leko bosuto. Bulu gíníng-tamkung kídílok mimak ijingla, mikmo kídar eteng myomur mikmo kísa migang kaalíkla, adilok sidum kísa beréngneke.

⁹Ejer bí ruutum yalume delokke Obadiah bí nítmín gene, Eliab angumnane,

¹⁰Mishmannah appinane, Jeremiah pilngonane,

¹¹Attai akkénane, Eliel kínídnane,

¹²Johanan píínyinane, Eljabad konangnane,

¹³Jeremiah íyingnane delo Makbannai íying kolang atelnane.

¹⁴Si Gad ami kídí si, améyane língko teyolo, delokke botteyane éjar sipaying teyolo ruutumpe yébona mílíe.

¹⁵Dítak kolokke kerayalum poololo Jordan koronge béébong lateng, si ami kídí si asiem koola sanggo-anggope yiibe delo duuna ami kídarem monpan-monran suto.

¹⁶Leko Benjamin delokke Judah opínlok opééko Dabidke dungko yabgo delo aato.

¹⁷Dabid bí luyulo gílenla kaarík lupoem bulum pobosuto, “Nolu ngom angongpe, igulkape mííla aadumílo, nolum so airupe torík sudung. Ngolum leko bosutoka! Idola, nolu ngome mirulo yadlíkkape aadumílo, ngo nolume adír ipaapem imadokom, ngoluke buku-nekuke Shédíbí kényé, delokke nolum ingééyé.”

¹⁸Delo Shédíke Aide íying angum delokke ruutum yalum Amasai kelo aala, bí pokai, “Jesseke oo Dabid, ngolu nokke! Eetet dengome nokkelo, delokke nome igulnalo kakalangka! Kapeila, Shédí nome iguldung.” Delo Dabid bulume toríksula, bík maglíng ruutumpe bulum parlíkto.

¹⁹Edílo Dabid bí Philistain kídarem gíbosula, Saulme mimak ikape gítodín delo Dabid kíng Manasseh opínlok amiekete bíkkíng lekomínto. Sikepe gíbo sudokom bí Philistain kídarem igulmang, kapeila, buluke roja kídíde, Dabid bí bíkke kerang ruutum Saul kíng bulum yadlíkyé mííla pesoto, depeila bulu kebang lubosula Dabidme Jiklag amonglo gílat sumotoku.

²⁰Edílo Dabid bí Jiklag danpe gílat sutokudí, delo si Manasseh ami kídí si bíkkíng gímín getoku: Adnah, Jojabad, Jediael, Mikhael, Jojabad, Elihu delo Jillethai. Manassehlo bulu takame éjar-éjar sipaying ruutumpe yébone.

²¹Bulu Dabidke línggoona opéé kídí lokke ruutumpe agérem gérbito, kapeila, bulu takam miga-miramla mimak iyitsuna sipaying mílíe. Méélam delo bulu Israel maglíng lok ruutumpe yétoku.

²²Loodí-loodíem empe ami kídíe Dabidke maglínglo lekomínla, Shédíke maglíng kísa botteruna maglíng kope ito.

²³RUUTUM ke pébisunampe, Dabidke Hebron amonglo duudo delo midu-mimak iyilsuna kídíe bojéko lekobosu langkula, Saulke roja dotungem Dabidme domo dokupe ralto. Sike kídí si ami kídare:

²⁴Judah opínlok tamkung delokke gíníng bomne 6,800 amiko.

²⁵Simeon opínlok midu-mimak ijiina 7,100 amiko.

²⁶Lebi opínlok 4,600 amiko.

²⁷Aaronke otíng Jehoiada kelo lekomínnem itaksula 3,700 amiko.

²⁸Migang-miramna Jadok lang bíkke abu erang lokke 22 sipaying ruutumko.

²⁹Benjamin (Saulke opínsu) opínlok 3,000 amiko. (Benjamin opínlok alumyange Saul keepe dongkai);

³⁰Ephraim opín aralo amín kana miga-miram kídílok 20,800 amiko,

³¹Anggo Manasseh opínlok Dabidme roja imodope ullenla gína kídíe 18,000 amiko;

³²Issakhar opínlok, Israel kídíe ingkoko ipedí, delokke edílo dem ipene, dekena moodíem kénjingna 200 ruutumeke, delokke buluke lulíg aralo yébonam erang kídíde.

³³Jebulun opínlok míídíngnam, mimak legape irusuna, mimak inana ekurang takamem ijiina 50,000 amiko.

³⁴Naphtali opínlok 1,000 ruutumko, delokke 37,000 ko tamkung-gíníng bomne.

³⁵Dan opínlok 24,200 ko mimak legape irusune.

³⁶Asher opínlok míídíngnam 40,000 ko mimak legape irusune.

³⁷Jordan korong sanggo danlok aana Reuben, Gad delo Sanggo Manasseh opín kídí loge aane, mimak ekurang takamem ijiina 120,000 amiko.

³⁸Si sipaying tabung si, mimak legape irusula, Dabidme Israel lokke rojape imorupe emla Hebronlo aato. Israellok ami abíd tabungde Dabidme rojape imope aapíe lekoto.

³⁹Longum kope bulu Dabid kíng, buluke aní-bíro kídíke ngiibinam ashéng doboem dola-tííla duubosuto.

⁴⁰Sokke teyonglo buluke dei-degong, mootengoolo duuna Issakhar, Jebulun delo Naphtali doolung kídíeteng, gado kídílo, uut simon kídílo, kossor kídílo, gooru kídílo, ettíngem, taapang lok pínam kégem, onggur ayé loreenamem, onggur alang emla télem, papenam gooru kídí emlang mér kídíem geabosuto, kapeila asi-among takam delo ashéng míípoe kato.