Read Alladian 1 ODONG 13 Bible Online

1 ODONG 13 - Alladian bible

1 ODONG 13

¹Dabid bí éjarpe delokke língkope sipayingem yébona ruutum tabungem íngkí-tatkísuto.

²Delokrongem, Dabid bí Israel ami bampomlo poboto, “Nolu sim tolíkdumílo, delokke si RUUTUM ngoluke Shédíke míínampe idumílo, kaju Israel among so rego-rego luunelo duuna ngoluke aní-bíro, delokke miri kídí lolang Lebi kídílo koborem bigoosula, ngoluke so aala leko bosudope polape.

³Delokrongem, ngolu gíla Shédíke Daapong Sondugem langa langkupe, kapeila, sime ngolu Saulke rojape yédungem míípaktuai.”

⁴Kebang bampom delo duuna tabunge, pobonam deme airupe mííla tolík bosuto.

⁵Dekepeila Dabid bí among tabung delok Israel amiem, Ijipt among Shihor lokke ila Hamath Gééjonglo duuna kídarem, Daapong Sonduk dem Kiriath Jearim doolung loge Jirusalemlo langa dokupe laadumsuto.

⁶Dabid lang Israel ami tabunge Judah lokke Baalahlo, dei Kiriath Jearime, delo gíla RUUTUM ke amín lok mínnam Serubim teyolo duuna Shédíke Daapong Sondukdem langkupe gíto.

⁷Bulu Abinadabke ekumlok Daapong Sondukdem joolenla gooru gaari aní kolo joolíktoku. Ujjah lang Ahio bínyi gaari dem gíbom dokudem,

⁸Dabid lang takam Israel ami kídare buluke ralnam tabung lok, miri lula, harp tapung batla, dumdum dííla, lupiyang loklang bikul kídí lok Shédíme yitgeto.

⁹Edílo bulu Kidon among lokke ali yikpomlo pííto kudín, delo gooru annyide tubesula, Ujjah bí alage laklenla Daapong Sondukdem umgap bomto.

¹⁰Delopak RUUTUM bí Ujjahme yagorupe marbomla, sondukdem ukkínam legape bíme petto. Bí delo Shédíke keralo sikai,

¹¹dekepeila, dem among dem delokke ila Perej Ujjah[8] emkai. RUUTUM bí marla Ujjahme petnam legape Dabid bí yagorupe buuto.

¹²Delo longe delo Dabid Shédíme yagorupe pesodola poto, “Kape kísa Daapong Sonduk sim ngo supak ngokke ekumlo bomalayékun?”

¹³Dekepeila Dabid bí Daapong Sondukdem bíkkíng Jirusalemlo bomang kumang. Idola bí Gath doolunglo duuna Obed Edomke ekumlo mekeng poto.

¹⁴Poolo angumko Daapong Sondukde Obed Edomke ekumlo duuto, delo RUUTUM Obed Edomke teyong lolang bíkke kanam tabung atolo utepooroem ruulíkbito.