Read Alladian 1 ODONG 15 Bible Online

1 ODONG 15 - Alladian bible

1 ODONG 15

¹Dabidke doolung delo Dabidbí agí legape ekum kídíem molíkrongem bí Shédíke Daapong Sondukdem mepeko tombuko solíkto.

²Delo Dabid poto, “Shédíke Daapong Sondukdem Lebi ami petome joope aiyé, kapeila bulum petommin RUUTUM bí dem joodope delokke bíme agér gérbidope ullentone.”

³Dekepeila, Dabid Israel tabungem Jirusalemlo, bíkke mekedokupe ekum monam delo Daapong Sondukdem joonga dokupe gogdumsuto.

⁴Delokrongem bí Aaronke otíng kídar emlang Lebi tabungem laadumsuto:

⁵Kohathke oo kídar loge ruutumpe yébone Uriel delo bíkke 120 aní-bíroko,

⁶Merarike oo kídar loge ruutumpe yébone Asaiah delo bíkke 220 aní-bíroko,

⁷Gershonke oo kídar loge ruutumpe yébone Joel delo bíkke 130 aní-bíroko,

⁸Elijaphanke oo kídar loge ruutumpe yébone Shemaiah delo bíkke 200 aní-bíroko,

⁹Hebronke oo kídar loge ruutumpe yébone Eliel delo bíkke 80 aní-bíroko,

¹⁰Ujjielke oo kídar loge ruutumpe yébone Amminadab delo bíkke 112 aní-bíroko,

¹¹Delokrodem Dabid miri Jadok melang miri Abiatharme delo Lebi kídí Uriel, Asaiah, Joel, Shemaiah, Eliel, delokke Amminadab bulum tomdumsula,

¹²bí bulum poto, “Nolu Lebi erang lokke ruutum kídíe. Nolu agísu emlang noluke Lebi aní-bíro kídíem RUUTUM Israelke Shédíke Daapong Sondugem, ngokke iruubinam moolopso, jonga badokupe deesulangka.

¹³Keradelo nolu joomanam legape RUUTUM ngoluke Shédíke marname, ngolukíng pííto, kapeila, bík míngkorpe ngolu bíkke agérem gérmato.”

¹⁴Dekepeila miri kídí delang Lebi kídíde RUUTUM Israelke Shédí ke Daapong Sondukdem joonga badokupe mipile agísuem deesuto.

¹⁵Lebi kídíde Sondukdem daajong kídílok, RUUTUMke Mosi kíng políknampe, gordunglo joobomtoku.

¹⁶Dabid bí Lebi miro kídardem lulígla Lebi kídarlok miri ludo pelang erapdope harp tapung loklang lupiyang lok ilíkdope parlíkmoto.

¹⁷Miri luna opín kídílok bulu sim ami kídar sim pitol lupiyang kídíem ibodope ullento: Joelke oo Heman, bíkke aní-bíro Berekiahke oo Asaph, delo Merari opín lokke Kushaiahke oo Ethan. Bulum ibosudope sim Lebi kídí sim béyakna harp tapung kídíem baddope ullíkto: Jekhariah, Jaajiel, Shemiramoth, Jehiel, Unni, Eliab, Maaseiah, delo Benaiah. Rebumna harp tapung kídíem baddope sim Lebi kídí sim bulu ullíkto: Mattithiah, Eliphelehu, Mikneiah, Ajajiah, delo Kumkeng Ekumem dagbomna kídí, Obed Edom lang Jeiel.

²²Bíkke miri tapung ijingnam legape Khenaniah me Lebi kídíke miri tapung ibona kídí teyolo ruutumpe ullíkto.

²³Daapong sondukdem kaabomdope Berekiah melang Elkanahme delo bínyi kelo Obed Edom melang Jehiah me ullíkto. Miri Shebaniah, Joshaphat, Nethanel, Amasai, Jekhariah, Benaiah, delo Eliejer bulum Daapong Sonduk keralo bikul kídíem mutbodope ullíkto.

²⁵Dekepeila Dabid lang Israel kídíke miro kídí, delokke maglíng ruutum kídar tabunge Obed Edomke ekumlok Daapong Sondugem langkupe ashéng-angampe gíto.

²⁶Delokke Shédíbí RUUTUM ke Daapong Sondugem joona Lebi kídídem igulnam legape bulu gooru kíníd kolang mérbo kínídko amanpe palíkto.

²⁷Dabid kamporuna lainen egeko geto, dekepe tapung ilíkna kídí, buluke ruutum Khenaniah, delokke Sondukdem joona Lebi kídíeteng geto. Dabid bí lainen Ephod koteng geto.

²⁸Dekepeila tabung Israel amie Daapong Sondukdem joobom dakkula, arenglok, bikul kídílok, lupiyang kídílok, delokke harp delo layar tapungem botterupe batla, adude tattak-tatyak yimape manla enbomtoku.

²⁹Sondukdem luune delo bomadakku delo Saulke ome Mikalbí kirki delok kaalenla Dabid rojame yagorupe ashéngla paksong soodakpe kaato, delo bíkke aapí aralo bíme kaapakto.