Read Alladian 1 ODONG 16 Bible Online

1 ODONG 16 - Alladian bible

1 ODONG 16

¹Bulu Daapong Sondukdem Dabidke tombuem soruula menam ekum aradelo melíktoku. Delo bulu romnam aman emlang ashéng amanem Shédíke keranglo bikansutoku.

²Romnam aman emlang ashéng amanem ilíkrodem Dabid bí RUUTUM ke amínlok ami kídarlo utepooro agomem políkla,

³bí Israel ami takamem donamem orto. Bí milokong delokke mime tabungpe, goopuna ettíng kolang pamrenam adín alop kolang onggur asannam anyongko mipillo bito.

⁴Sokke teyonglo Dabid bí ayoko Lebi kídar lok Daapong Sonduk keralo RUUTUM Israelke Shédí kelo tolíkla, yitgela, delokke miri lok yitgela, kumsukolo igebona ruutumpe ilíkto.

⁵Asaph bí ruutum yalume, bím nítmín gene Jekhariah, delokrongem Jeiel, Shemiramoth, Jehiel, Mattithiah, Eliab, Benaiah, Obed Edom delo Jeiel, bulu harp tapung batbopene. Asaph bí lupiyang kídídem ibopene,

⁶delokke miri annyi Benaiah lang Jehajiel bínyi bikul tapung dem muddíem Daapong Sonduk keralo mudbopene.

⁷Delo longe delo Dabid bí Asaph melang bíkke Lebi aní-bíro kídardem RUUTUM kelo yidgedola miri lunam agérem bigeyalumto.

⁸RUUTUMme yidgelangka, bíkke amínem ríípang gelangka, ami kídar aranglo bíkke agérem kénmo langka.

⁹Miripe ríngge langka, bím mirilok yidlangka, Bíkke irisinyo agérem pogelangka.

¹⁰Bíkke deena amínlo angun-abé langka; RUUTUM me matana kídílok aapíe ashélangka.

¹¹RUUTUM melang bíkke ralnamem matalangka, agínpe bíkkíng duumín genamem matalangka!

¹²Bíkke irisinyo agér inamem míípang suyarlangka, bíkke irisinyo ikannam kídíem, bíkke kebang lubinam kídíem,

¹³E Abraham bíkke bééranglok oten kídara, bíkke ullen sunam Jakobke oo kídara!

¹⁴RUUTUM bí ngoluke Shédíe, bíkke lulígnamde among takamso kadung.

¹⁵Daapong dem bí agínke mííyar gedung, bíkke ponam agomde éjar oten siirum loope duuyaryé,

¹⁶ingkuem bí Abraham kíng daapong bosuton, Isaak kíng ingkuem pébisuton.

¹⁷RUUTUM bí Jakob kelo daapongko, agínpe duuyar penako ibosuto.

¹⁸“Nolum ngo Kanaan amongem biyé,” emla bí poto, “Moolopdem nolu yénam-gítnam loope duubomyé.”

¹⁹Shédíke amie anyongoko ituai, Kanaan amonglo bulu kénmanam amipe yétuai.

²⁰Moolop kon lokke moolop konlo bulu byaktí goola, yétakon lokke yétakonlo magooto.

²¹Idola bulum séko meteng míílum momang, bulum mopítpe bí roja kídíem lutorto:

²²“Ngokke tosaknam béérangem adír bimapeka; ngokke kaaluna miri kídíem uktetmapeka.”

²³Taleng-kuppoe RUUTUM kelo miripe ríngge langka! Loodí-loodíem ngolum mopítnam ashéng agom sim pogong gelangka.

²⁴Ami kídílo bíkke angun-abéem pogolangka, bíkke irisinyo agérem milung takamlo polangka!

²⁵Botte yalumne RUUTUM bí, botterupe yidgepename, RUUTUM bí takam uyu kídíem penem pesoyapename.

²⁶Abíd opín-buang lokke uyu tabungde mimang mílíe, idola RUUTUM min teyong among kídíem pílenne.

²⁷Angun-abé elang mite ralname bíkkíng kadung, ralnam elang ashénge bíkke dungkoem bííbomdung.

²⁸RUUTUMme yitgelangka among sok daadi tabunge, RUUTUMke angun-abé emlang ralnamem rínggelangka.

²⁹RUUTUM ke angun-abéna amínem yidgelangka; amanko bomla bík keralo aalangka. RUUTUMme deenampe kumsulangka;

³⁰among tabunge bíkke keralo dan-gelangka! Tani amongem edíírupe, ngétgo madope pítung.

³¹Teyong among elang tani amonge ashéng daklangka! Ami takamlo RUUTUM bí yébodung emla pogolangka.

³²Ngírlangka siyéng asielang delo duuna tabunge, arík kídí elang delo duuna takame ashéng langka.

³³Moonam kídí lokke esing kídíete ashéng lok ngomyé, RUUTUM bí tani among sim rojape kebang lubom yékudelo.

³⁴RUUTUM me yidge langka, kapeila bí gairunako, bíkke ayange duuyarne.

³⁵Polangka bíme, “Mopítna Shédía, ngolum mopíttoi, laadum sutoi ngolum, ami kídílok mopíttoi ngolum, nome ngolu yitgeladope, delokke nokke amínem rínggeladope.”

³⁶RUUTUM Israelke Shédíme yitgelangka! Bíme supak delokke agínpe yidyarla yélangka! Delo tabung amie, “Amen,” emla RUUTUMme yidgeto.

³⁷Loodípe ipenamem ibodope Dabid bí Asaph melang bíkke aní-bíro kídí dem Daapong Sonduk keralo agér géryardope ruutumpe melíkto.

³⁸Jeduthunke oo Obed Edom delo bíkke opínlok íying akké kolang midum píínyiko bulum igulbosudope metak sulíkto. Hosah lang Obed Edom bínyi lamgé kídíem dagbomnape ito.

³⁹Gibeon lo miri Jadok delo bíkke miri angong-arum kídíem RUUTUMke deena moolop lokke tombudem duubom dope Dabid bí melíkto.

⁴⁰Israel kídíem lulígnam ayonem atkumla menam kísapakpe yume-rohpe romnam amanem romlíkko merom delo bulum agínke rombo dope lulíkto.

⁴¹Bulu kelo lekope Heman delo Jeduthun delo apekrupe RUUTUMme bík yarí kamana ayangem yitgedope abíd ullennam kídar eteng yémín geto.

⁴²Heman lang Jeduthun bínyike agére bikul tapung delo lupiyang kídíem delokke abíd tapung kídarem miri lukolo ilík bopenamde ito. Jeduthunke oo kídídem lamgélo dagbom dope ullíkto.

⁴³Delokrodem tabung ami kídare agí-agí ekumlo gípan suyintoku, delokke Dabid teng agíke edung-erangem utepooroem bikupe gítoku.