Read Alladian 1 ODONG 17 Bible Online

1 ODONG 17 - Alladian bible

1 ODONG 17

¹Roja dungko ekum delo Dabidke aala duurongem, kaaluna miri Nathanme Dabid bí poto, “Kaatola, sidar esinglok monam roja ekum so ngo duudung, idokom RUUTUMke Daapong Sonduge tombu rumkínglo duudung.”

²Nathan Dabidme poyansuto, “No ingkoko ipe mííyédín ilangka, kapeila, Shédíbí nokkíng duumíndung.”

³Idola delo yoh delo Shédíbí Nathanme poto,

⁴“Ngokke agér ibina Dabidme polangka, ‘RUUTUM bí sikepe podung: No ngome duupeko ekumko mobimayé.

⁵Israel kídíem Ijipt among lokke gílen bodakku delokke ilangala supak loope ngo dungkeng ekumlo dungkímang. Ngo tombukon lokke tombu konlo biltíla duutígoodung.

⁶Israel kídíkelo ngokke enmín-gímínko takamlo, ngokke yébodope ullennam sékometeng ngo, “Nolu kapeda ngome sidar esinglok ekumko mobiman?” emla pokímang,’

⁷Dekepeila no supak ngokke béérang Dabidme sikepe polangkuka, ‘Maglíngke RUUTUM bí sikepe podung: Ngo nome aríklo mér kaabomnape ikolokke laalenla, ngokke Israel ami kídar lokke ruutumpe imoto.

⁸Nokke gíko takamlo ngo nokkíng yémín geto, delokke nokke kerang kerangpe deddína miruem ngo petpakbito, delokke nokke amínem taleng kuppo sokke bottepe amín kana kídar kísape, bottepe ngo imoyé.

⁹Ngo ngokke Israel ami legape moolopko ullenla bulum delo duumotung. Delo bulum itung-iréyimayé. Buluke so among so aado delokke ila, migu-miyakruna amie bulum adír bitíto, idola sikepe lekoda iyikumayé. Ngo noluke miru takamem ikumboyé, delokke nolum otíng-oyin kamoyé emla pésudung.

¹¹Edílo no siyédín delo nokke buku kídíem yukolo nomteng yuyéku, delokke nokke oo kídí loge oo konem rojape yéyanmoyé, delokke bíkke yétaem edíng moyé.

¹²Bí ngokke legape ekumko mobiyé, delokke bíkke dungkeng palengem duuyarmoyé.

¹³Ngo bíkke abupe iyé, delokke bí ngokke oope iyé. Ngo ngokke ayangem, nokke kerape yégena keelok laapak kunam kísape, bíkke lok laapak kumayé.

¹⁴Ngo bíme ngokke ami kídíem ngok yétaem agínpe kaabom dope bilíkyé. Bíkke dungkeng palengde agínpe duuyaryé.’ ”

¹⁵Nathan bí kapepak Shédíke agomem tattodí, dekepakpe tabung dem Dabid rojame pobitoku.

¹⁶Delo RUUTUM ke dungko tombu aralo aala Dabid rojabí gubla kumsuto, “E RUUTUM Shédía, ngo lang ngok erang kídísi nokke ibinam kídar simteng atí paabamang.

¹⁷Delok teyoloteng no supak bojéyangko ibidung; no yépenamlo ngokke otíng-oyin teyolo pébisutung, delokke no, E RUUTUM Shédí, ngome bottena ami kísape agérem ibidubong.

¹⁸Ngo nome ingkoko pobiyapene! No ngome airupe kéndung, idolateng nok béérang ngome no mínggedung.

¹⁹Sim ngok legape, delokke ngome ngokke yépenamlo bottepenamem lengkanla inam si, nokke agíke míílensuname, delokke mííbomname.

²⁰E RUUTUM, nokke kísana sékoteng kamang; ngolu agínke no petom Shédíe emla kéndung.

²¹Nokke Israel ami kísana tani gíídang so amiyang kamang, séko bulumdí no agí amipe imope mííla abílpe bílkolok mopít lentokune. Buluke legape nokke botteruna, delokke irisinyo atí inam kídíe taleng kuppo takamso nokke amínem byargo modung. No nokke ami kídarem Ijipt amonglok laalen sutoku, delokke abíd amiem buluke kerang kerangpe monpak bito.

²²No Israelme nokke agísu amipe agín keepe isuto, delokke RUUTUM no buluke Shédípe ikai.

²³“Delokke supak E RUUTUM, nokke ngok teyolo, delokke ngokke otíng-oyinlo pébisunamem agín keepe apíng ayardope imo daklangka, delokke nokke iyé emnamem idaklangka.

²⁴Nokke amíne botteruyé, delo ami kídare agínpe pogeyé, ‘Ralyayalumna RUUTUM bí Israelem ruutum bomna Shédíe.’

²⁵Ngo aapíe bottela sikepe kumlanam si, E Shédí, nokke béérang ngom, takamem lengkan bila, delokke ngok otíng-oyinem rojape no imoyé emla pobikolok idung.

²⁶RUUTUM nomin Shédíbí, delokke no sim aina atí kídí sim ngome pébisuto.

²⁷Ngo ngokke otíng-oyine nokke yanggong aralo duuyardope, no utepooroem bilíkyika emla rogudung. Kapeila, RUUTUM nokke utepooro binamde agínpe duuyardung.”