Read Alladian 1 ODONG 18 Bible Online

1 ODONG 18 - Alladian bible

1 ODONG 18

¹Delok rongem Dabid rojabí Philistain kídarem mimaklo ikumla bulum bíkke rumkínglo duumoto, delo bí Gath emla dem dunggona doolung kídarem Philistain alaglok laabínto.

²Dabid bí Moab kídaremte ikumla, bulu Dabidke béérangpe ila, bím kajanang bito.

³Dabid roja Hamath degong ampeng Jobah lokke roja Hadadejer meteng mimak ibomla ikumto, kapeila Hadadejerbí Euphrates korong ampeng lok dei-degong kídíem laape emla ibomduai.

⁴Dabid bí bíkkelok guré-gaariem 1,000 ko, guré dukbona amiem 7,000 ko delokke ale sipayingem 20,000 ko umto. Bí guré-gaari língkoem sobompena guréem mesupala, abíd takam dem lebyang moyinto.

⁵Edílo Jobah lokke roja Hadadejerme Damaskas lokke Siria ami kídare igul kape aatodí, delo Dabid roja bulum mimak ila 22,000 ko petto.

⁶Delo Dabid roja, bíkke maglíng notko kídarem buluke among kídí looteng ilíkla, bulu Dabidke béérangpe iyinto, delokke bíme kajanang bito. RUUTUM bí Dabidke gíko tabunglo mimagem ikummoto.

⁷Hadadejerke béérang kídar lokke bomnam uun tamkung kídídem Dabid laala Jirusalemlo bomtoku.

⁸Hadadejerke rojape yébomtuako Tibhath, delokke Kun loge Dabid bí pitol emteng bojéko laato. (Sok pitol kídí sok méélam dem Solomon rojabí Kumkeng Ekum lokke asi mekeng téngki, gaang kídí, delokke peking-pesak kídíem pínatoku.)

⁹Hamath lokke roja Toi bí Dabid rojake Hadadejerke sipaying takamem ikumnamem tatto.

¹⁰Dekepeila roja Toi bí bíkke oo Hadoram me Dabid roja kíng kaarík sudola bíkke mimak itímínsunam Hadadejerme mimaklo ikumnam yidgem pokandope melíkto. Hadoram bí uunlok, baldínlok, delo pitol lok atí-atípe pínam ekuserang lok Dabidme amanpe bomabito.

¹¹Bíkke binam kídídem itaksula delokke Edom, Moab, Ammon, Philistia delo Amalek ami kídarem ikumla, bulu kelok lanam baldín, uun tabungdem lekope, RUUTUM ke agérlo inadope Dabidbí kumlíkto.

¹²Jeruiahke oo Abishai Alo Yiibelo Edom amiem ikumla 18,000 ko petto.

¹³Bí Edom among takamlo maglíng notko kídíem ilíkla, Dabid rojake rumkílo ami takam de duuyinto. RUUTUM bí Dabidme rego takamlo ikummoto.

¹⁴Israel among tabungdem Dabid rojabí yébotuai, delokke bí tabungem jonnampe takamem akampe kaala yéboto.

¹⁵Jeruiahke oo Joab bí sipaying maglínglok ruutume, Ahiludke oo Jehoshaphat bí legang kídíem atkumbone,

¹⁶Ahitubke oo Jadok lang Abiatharke oo Ahimelek bínyi mirie; Seraiah bí kebang atgebone;

¹⁷Jehoiadake oo Benaiah bí Dabidme migípe kaabomna sipaying ruutume; delokke Dabidke oo kídarde, bíkke agérlo ruutum yalumpe yégeboto.