Read Alladian 1 ODONG 19 Bible Online

1 ODONG 19 - Alladian bible

1 ODONG 19

¹Ammon lokke roja Nahashke sirongem bíkke oo Hanun bí rojape ito.

²Dabid bí poto, “Ngo Nahashke oo Hanunme aipe angongem ngobosuyé, kapeila bíkke abue ngom aipe angong ngobosutuai.” Dekepeila Dabid roja kotokieke Hanun kíng, bíkke ankí mínnam emlang ngiinam agomem pobidope melíkto. Edílo bulu Ammonlo pííla Hanun kíng roja políknamem pope aatodín,

³delo Ammon lokke ruutumpe yébona kídarde Hanunme poto, “Nokke abudem mínggela Dabidbí nokkíng bíkke ankí mínnam emla ngiinam agomem pokandope ami kídar sim melíktung míídunía? Deke legapemang! Bíkke ami kídí sim bí nokkíng aadola, asi-among sime rokang goola kaayin-kényin geyéla, langkut kupe emla min melíktune.”

⁴Dekepeila, Hanun Dabidke ami melíknam kídídem umla, buluke sokmurem ngíkutla, galuk emteng ugíng loope gattung biyin geyéla melíktoku.

⁵Bulu ekumlo enlat sukupenamem yagorupe annyingto. Edílo Dabid legang dem tattodín, bí ami melíkla, buluke sokmure bodongpe sangkumang tetengem Jerikolo duupodope políkto.

⁶Roja Hanun lang Ammon ami kídíde Dabid rojame mirupe bulu ipaasuto emla kénsuto. Dekepeila, bulu 34,000 Kilogramko baldínem bila, línggíng Mesopotamia loklang Siria among Maakah emlang Jobahlok guré-gaari emlang dem dugbona kídíem ríkrap bolíkto.

⁷Buluke ríkrap bonam 32,000 guré-gaari delang Maakah rojalok sipaying kídíde Medeba ampenglo notko ila duuto. Ammon ami kídar eteng buluke doolung kídí delok gílenla mimak legape iruusuto.

⁸Edílo deme Dabidbí tattodín, bí Joab melang bík maglíng takam dem melíkto.

⁹Ammon ami kídíde gílenla, buluke képitél luune Rabbah lokke aatak delo mimak legape dagrusuto, delokke igulpe aana roja kídíde doolung luyuke mooyako delo mimak ipe dagrusuto.

¹⁰Joab bí miru sipaying kídíde bulume kerangdan lokteng, delokke méélamdan lokteng mimak iyabomyé emla kaato. Dekepeila, bí Israellok gaiyalumna sipaying kídíem ulla, Siria kídíem dakkasudope melíkto.

¹¹Sipaying abíd kídídem bíkke bíro Abishaike lulíg aralo melík geyéla Ammon kídídem imínsudope melíkto.

¹²Joab bíme poto, “Siria ami kídíe ngome ikumbomdope no kaayémílo, no aala ngome igultopíam, delokke Ammon kídíe nom ikum bomyémílo ngo aala nome igulyé.

¹³Aapíe bottelangka! Kaju ralnamrupe ngoluke ami kídí legapelang ngoluke Shédíke doolung kídí legape mimak sim ilaju. Delokke RUUTUM ke mííname apíng daklangka.”

¹⁴Dekepeila Joab lang bíkke ami kídíde mimak ipe Siria danpe aanín bomto, delo Siria kídíde buluke keranglok duggetoku.

¹⁵Edílo Ammon kídíde Siria kídíem dugge dokupe kaatodín, bulu Abishai kelok dugnyok gelangkula, luune delo duuyin getoku. Delo Joab Jirusalempe enlat sutoku.

¹⁶Siria ami kídarde Israel loge ikum kosunamem kénsu geyéla Euphrates sanggodanlo duuna Siria maglíngem langaang dope bulu kotoki melíkla, bulume Jobahlok roja Hadadejerke sipaying tabungem ruutumbona Shobakke aralo melíkto.

¹⁷Dabid legang sim edílo tattodín, delo bí Israel maglíngem laadumsula, Jordan korongem koola, Siria maglíngem dakkasudope meto. Mimakde ilenla,

¹⁸Siria kídídem Israele ngétkut sumotoku. Dabid lang bík amie guré-gaari dugbonem 7,000 ko, delokke ale sipayingem 40,000 ko petto. Bulu Siria sipaying ruutum Shobak meteng petto.

¹⁹Edílo roja Hadadejerke rumkínglo yéna roja kídíde, bulume Israele ikumto emla kéntodín delo bulu Dabid kíng bonyingem ibosula bíkke rumkínglo yétoku. Depe ikolok Siria ami kídarde lekokom Ammon ami kídídem igul líyimangkai.