Read Alladian 1 ODONG 22 Bible Online

1 ODONG 22 - Alladian bible

1 ODONG 22

¹Dekepeila Dabid poto, “So moolop so moko RUUTUM Shédíke Kumkeng Ekumde duuyéne, delokke Israel kídíe romnam amanem so runggu so moko romlíkyéne.”

²Dabid Israello duuna mibo-miying tabungem lekope aadumsudope lulígla, bí bulum agér gérmoto. Ayokonem Kumkeng Ekumdem morepnana elíng kídíem gatmoto.

³Dabid deddína aremem, gojal delokke lamgé eyab legape kélém-kopja pínadope, delokke kílayimanam pitol deddínemte bito.

⁴Sankén yimanam sidar siipongem Tur delo Sidonlok bomabina kídarem Dabid bí kaabi-tatbito.

⁵Dabid bí míísuto, “Ngokke oo Solomon bí yaamé koope idungada, delokke atí legang koteng kénmangada. RUUTUMke legape ekum mopenamde kaangkímla taleng kupposo amín kanarupe ila takame yitgenampe ipe aido; deke legape ngo iruula mebiyé.” Dekepeila Dabid bí bíkke simang adape deddína ekuserangem iruula mebito.

⁶Delo bí bíkke oo Solomonme tompala RUUTUM Israelke Shédíke ekumko mobidope lulígto.

⁷Dabid bíme poto, “Ngokke oo sakkenga, ngokke aapí araso RUUTUM ngok Shédí keepe ekumko mobipe emla míítuai.

⁸Idokom RUUTUM ke agome ngokkíng sikepe pííto, ‘No bojérungko yilíng bítmoto, delokke deddína mimagem ito; no tani among so ngokke keranglo deddína yilíngem bitmoto, dekepeila no ngokke amínpe ekumko momayé.

⁹Kaalangka nokkelok oo ko oyé; bí aapí dengomruna amikope iyé. Bím dunggobomna miru tabunglok bím ngo yépo-dengom bosuem biyé. Bíkke amínem Solomon emyé, delokke bíkke yébodung pegolo, ngo Israello eetedem biyé.

¹⁰Bí ngokke amín legape ekumko moyé. Bí ngokke oope iyé, delokke ngo bíkke abupe iyé, delokke ngo bíkke roja dungkeng palengem Israello agínpe duuyarmoyé.’

¹¹Dekepeila supak ngok oo sakkenga, no bíkke legape ekumko mokolo apíngpe iladope, RUUTUM nokke Shédíbí nokkíng duumínla, bíkke pébisunamem apíng modaklangka.

¹²Delokke RUUTUM nokke Shédíbí nokkíng míngkén-tatkénnam emlang kénnam gyanem bilíkla, Israel tabungem bíkke ayon binam lok yégelamo daklangka.

¹³RUUTUMke Israel ami legape Mosi kíng bilíknam ayondem aipakpe no yégeboyémílo no yéjiboyé. Aapíe mínggapla edíílangka, delokke peso atí kamapeka, delokke míímé sumapeka.

¹⁴Kumkeng Ekumem monana legape ngo adír paabomsula, uunem 3,400 metrik tonko, baldínem 34,000 metrik tonko, sok teyolo kílayimanam pitol delo arem deddínem meruutung. Ngo esing emla elíng emteng iruutung, idokom no ayoko itempe aiyé.

¹⁵No deddína agér gérne kadung. Elíng gatna, simét mistri delo esing agér ina mistri, delokke teyonglo takam agérem ségu kala ijingna,

¹⁶uun, baldín, pitol delo arem agér ine kadung. Dekepeila, supak agérem gérlenlangka, delokke RUUTUMbí nokkíng duumín gedaklangka.”

¹⁷Dabid bí tabung Israel lok ruutum kídarem Solomonme igulbo sudope lulígto.

¹⁸Bí bulum poto, “RUUTUM noluke Shédíbí nolukíng duumín gela, nolum rego takamlok eetet-dengomem bito. Bí ngom so among so dungkusuna ami kídíem ikummola, supak among si nolukelang RUUTUMke rumkínglo yédung.

¹⁹Supak noluke tabung aapí loklang aidlok RUUTUM Shédíme agér gérbilangka. RUUTUMke Daapong Sondugemla bíme yitge-rínggenana deena ekuserang kídar mekengdope Kumkeng Ekumdem molenlangka.”