Read Alladian 1 ODONG 28 Bible Online

1 ODONG 28 - Alladian bible

1 ODONG 28

¹Dabid tabung Israello agér gérna ami kídídem Jirusalemlo aadumsudope tomyinto. Dekepeila, opín-buang takam lokke ruutum kídíe, rojalok yéta takam lokke agérem kaabomna ruutum kídíe, pínmík-ramík lokke ruutum kídíe, roja kelang bíkke oo kídí lokke ekuserangem, delokke taro kídarem kaabom bina kídíe ila, roja lok ekum lokke ruutum takame, delokke amín kana sipaying kídíelang mínggenam ami takame Jirusalemlo aadumsuto.

²Dabid buluke keralo dagrepdola bulume poto: “Ngokke aní-bíro kídía, tatgaplangka. RUUTUMke Daapong Sondugemlang Shédíke ale tuda sukengem meyarpeko ekumko modomílo emla ngokke aapíso mííto. Dekepeila, ngo bím mínggenape Kumkeng Ekumko moreppe ekurangem narung lentuai,

³idola bí ngom momomape lutumto, kapeila, ngo sipayingko, delokke deddína yilíngem bitmoto.

⁴Igeyéla RUUTUM Israelke Shédí, tabung Israel teyolo ruutum dope ngomlang ngok otíng kídíem ulto. Bí Judah opínem yégebonem bilendope ullento, delokke Judah opín loge ngokke abu erangem ullento. Sok erang sokke takam loge bí agísue mííbasula, ngome laala tabung Israel teyolo rojape imoto.

⁵Bí ngome bojéko uem bito, delokke sok oo alung soge Solomonme bí RUUTUM ke yéta, Israel amongem roja dobomdope ullento.

⁶“RUUTUMbí ngome poto, ‘Nokke oo Solomon moko ngokke Kumkeng Ekumem mobipenade. Ngo bím ngokke oope idope ullensutung, delokke ngo bíkke abupe iyé.

⁷Bíkke supakke idunam kísa ngokke ayon kídíemla lulíg kídarem igap geyaryémílo, ngo bíkke amo-yétaem duuyarmoyé.’

⁸“Dekepeila supage, ngok ami kídara, ngoluke Shédíke kerang lolang RUUTUMke ami kídí, Israel takamke bamdum sukoso, sim aina among sim bomyardope, delokke nolu sime noluke oten-sirek loope bommoladope, RUUTUM ngoluke Shédíke lulígnam takamem airupe igelangka emla pogaplíkdung.”

⁹Delo Dabid Solomonme poto, “Ngokke oo sakkenga, nok abulokke Shédíme no mínggelangka, delokke ipansumana aapíem gela, erbomdola bíkke agérem gérbilangka, emla ngo nom pogapdung. Bí ngoluke míídung-míítok kídíemlang aapí míínam kídíem kényindung. No bíkkíng gímílo, nom bí toríksuyé; idola no bíkkelok gípat suyémílo, bí nom agínpe mepakyé.

¹⁰Supage mínggap-sérap langka, kapeila RUUTUMke deena Kumkeng Ekumem mobidope nome ullentung; aapíe bottedola agér sim gérlangka.”

¹¹Delokrongem Dabid roja bík oo Solomonme, Kumkeng Ekum agídem, kumsung kídíemla abíd pírtek kídarem, delo paab kídíem mesambiko Deeya Yalumna Moolobem modope emla rurepnana dem bito.

¹²Bíkke aapílo, kebang ipeko kídí, delokke dem dunggoopena pírtek kídí, delokke Kumkeng Ekumke ekuserang emla RUUTUM kelo tolíknam aman kídíem mepeko kumsung kídíem, modope mííbomnam kídíemteng Solomonme bito.

¹³Dabid bíme miri kídí elang Lebi kídíe kapekísa Kumkeng Ekum delokke agérem gérla, delo RUUTUMke ekumlo idung-satok nana peking-pesak kídarem kaabompene, dem takamteng bito.

¹⁴Bí edítpedín baldín emlang uunem ekuserang mokolo ilíkpene, deme poyilla,

¹⁵sérag miyong lolang dakkenglo,

¹⁶baldínlok pínam tébul kídí lolang Shédíme binam ettíngem lengko uun tébul miyonglo edítko ilíkpene deme poyilto.

¹⁷Bí simteng poyilla, edítko deena uunem, níkna kotup kídíem, borton kídíem, delo kaglak kídíem, delokke edítko baldín emlang uunem ekung-bati píkolo,

¹⁸delo namponem nyotlíkko runggu demlang RUUTUMke Daapong Sondugem agí alaplok laplum bomna Serubim kídíke duupeko gaari deme píkolo edítko deena uunem mííyédín deme poyilto.

¹⁹Dabid roja poto, “Si takam si RUUTUM agíke ngome igedope binam rurepnana atnam delo kayindung.”

²⁰Dabid roja bíkke oo Solomonme poto, “Aapíe edíílangka, delokke mínggaplangka. Agérem ilenlangka, delokke ingkuemteng itum kosumapeka. Ngokke agér gérbinam RUUTUM Shédíbí nokkíng yémín geyé. Bí nom mepakmayé, idola bíkke Kumkeng Ekumlo nokke agér ipenamem iyindo loope nokkíng duumín geyé.

²¹Miri delo Lebi kídíem Kumkeng Ekum delo gérpenam agérem panlíktung. Takam agérem ségu kala ijingna ami kídare nome igul líyinla duudung, delokke takam ami kídarsi delo buluke ruutum kídare nokke lulíg aralo kadung.”