Read Alladian 1 ODONG 29 Bible Online

1 ODONG 29 - Alladian bible

1 ODONG 29

¹Dabid rojabí kebang baapom delo poboto: “Ngokke oo Solomonbí Shédíke ullenname, idola bí yaamé koola atí kénkímangada. Ipenam agér si botterunako, kapeila si ami duupekomang, idola RUUTUM Shédíke Kumkeng Ekume.

²Ngo edítko paklatodín dekepe, uunem, baldínem, pitolem, aremem, esingem, are kana elíngem, marbol elíng delo appun abéna elíngem, Kumkeng Ekum sok legape narung bitung.

³Sokke teyong loteng ngokke agí ekuseranglok, Shédíke Kumkeng Ekum sime ayangla, ngo uun emlang baldínem bojéko bilíktung.

⁴Gaiyalumna uunem ngo língko metrik tonko, delo deena baldínem líínyi kolang íying appi metrik tonko, Kumkeng Ekum lokke suppi kídarem leemonado pelang

⁵monyo kídíke abíd takam ekurangem pínana legape bito. Supak, midarpe RUUTUMme aman bipe emla séko míílen sudun?”

⁶Delo pínmík-ramíklok ruutum kídíde, opín kídí delokke migom kídíde, sipaying maglíngem yébona ruutum kídíde, delokke roja ekuserangem kaabomna ruutum kídíde agíe míílensula

⁷sim takam sim Kumkeng Ekum delok agér legape bito: 170 metrik ton ngatnakope uunem, 340 metrik ton ngatnakope baldínem, 620 metrik ton pítanakope pitolem, delokke 3,400 metrik ton ngatnako aremem.

⁸Delokke are kanarung elíng bomna kídíe dekedeme Kumkeng Ekum Kumsunglo bidumsula, deme Gershonke pínmík lokke Lebi ami Jehiel bí kaabomto.

⁹Ami kídíde RUUTUM keelo ashédola biyinto, delokke bidumsunam dem kaala bulu ashéto. Dabid roja teng yagorupe ashéngto.

¹⁰Tabung kebang bampom delo Dabid roja RUUTUMme yidgedola poto, “Ngoluke buku Jakobke RUUTUM Shédía, nome agín keepelang agínpe yidyar gedaklangka!

¹¹No botterune lang ralnarunge, angun-abérune, kangkímrune, delo miga-miramrune. Teyong among kelang tani among sokke takam si, delo no takamem ruutumbomna roje.

¹²Takam mite-mirem elang aipe mínggename nokkelok aadung; no tabungem nokke ralnam loklang pauarlok ruutum bomdung; delokke no séko meteng bottemola delokke ralmoladung.

¹³Supage, ngoluke Shédía, ngolu nome yidgedung, delokke nokke angun-abéna amínem yitba sanggedung.

¹⁴“Sikepe iduakom ngok ami kídísila ngo arorupe nome atí bilamang, kapeila takam si nokke aman binam emin, delokke nokke suemmin ngolu nome biyan sutungkun.

¹⁵Kapeila, ngoluke buku kídíke kísape, nokke keralo ngolu kangkén maname, delokke mibope en-gong gígongne; tani amongso ngoluke longe mukyum kísala, atí míínam sunam kamang.

¹⁶E RUUTUM ngoluke Shédía, nokke deena amín legape Kumkeng Ekum monanape bidumsunam siteng nokke alaglok biname, delokke tabung si nokke.

¹⁷No takamke aapíem kaangkíla deenampe yéna amilo nokke aange ashéng líkdung emla ngo kéndung. Aapí-aange deenampe ngo sim takam sim ashéla nome bidung, delokke ngo so bamdumsuna ami kídar si edítko ashéla nokkíng aman kídíem biyanamem ngo kaato.

¹⁸Ngoluke buku kídí Abraham, Isaak, delo Jakobke RUUTUM Shédía, sikena legangem mínggenamem nokke ami kídí sokke aapí-aanglo edíngpe mííyar gedopelang nokkelo bulu aro míngkenge agínpe kadope, no gaggap daklangka.

¹⁹Ngokke oo Solomonme nokke lulígnam tabungem igeladope, delokke ngokke narung bibomnam Kumkeng Ekumdem modope, ardarupe mííbomna aapíem bidak langka.”

²⁰Delokrongem Dabid bamdumsuna dem poto, “RUUTUM noluke Shédíme yidgelangka!” Delo bampomde RUUTUM buluke buku kídíke Shédíme yidgeto, delo bulu tabunge gubadola RUUTUM melang roja emteng mínggeto.

²¹Longe kondem bulu taroem palíkla, ipak amanpe RUUTUM kelo tolíkto, delo dekedem ami kídarem dodope bito. Sok teyolo, bulu éjarko ruboem, éjarko mérboem, delo éjarko méroem palíkla, runggu delo romnam amanpe bito. Bulu onggur alang aman emteng bomato.

²²Dekepeila delo longe delo bulu RUUTUMke keralo dobo-tííbosula yagorupe ashéngto. Solomonme rojape tolíknamem bulu lennyinape goggetoku. RUUTUMke amín loge bulu bím rojape, delokke Jadokme miripe pídélíkto.

²³Dekepe Solomon, bíkke abu Dabidme RUUTUMke yéta binam teyolo rojape duuyan bomtoku. Bí yéjing bona rojakope ito, delo tabung Israel amie bíkke lubonamem igeto.

²⁴Tabung ruutum kídí elang sipaying kídíe, delokke Dabid rojake takam abíd oo kídíeteng Solomonme rojape tolíksukai.

²⁵RUUTUMbí Solomonke keralo ami takamem míngge-peso gemoto, delokke bí bíme kerape Israello yégena kídíem pemílo angun-abéyadope imoto.

²⁶Tabung Israel amongdem Jesseke oo Dabid bí rojape

²⁷takying appiko yéboto. Bí dítak kínídko Hebronlo, delokke takying angum kolang tagumko Jirusalemlo yéboto.

²⁸Bí mijing turtengem turla, mirem runakope, delokke takame aipe míngge-igenamkope yépala sikai, delo bík oo Solomon bíme rojape yétítmínto.

²⁹Roja Dabidke yélenlok ila yéyinnam lokke dooyingem, kaalu miri angum, Samuel, Nathan, delokke Gad buluke atkumnam kitap kídílo atkumtung.

³⁰Atkumnam kídísi kapekísa bí rojape yébotuan, edítko bí raltuan, delokke bíkkíng ila Israel lolang dunggobomna abíd yéta kídílo ingkoko itodín, delok legí-sigang takamem atkandung.