Read Alladian 2 ODONG 1 Bible Online

2 ODONG 1 - Alladian bible

2 ODONG 1

¹Dabidke oo Solomon Israel among yétadem edíírupe yébomto, delokke RUUTUM bíkke Shédíbí bíkkíng duumínla bíme amín kanarung rojape imoto.

²Roja Solomon ukumko bilenla, éjar sipayingem yébona ruutum kídíem, língko sipayingem yébona ruutum kídíem, kebang ruutum kídíem, erang takam lokke ruutum kídíem, delo abíd takam ami kídíem

³bíkkíng lekope Gibeon lokke kumsuko moolop delo gíbosudope lulígto. RUUTUMke béérang Mosike yépol mooruklo molíknam RUUTUMke dungko Tombue delo kanam legape bulu delo gíto.

⁴(Idola Daapong Sondukde Dabid rojake Kiriath Jearim loge laalenla bomadokuem, Jirusalemlo bíkke tombu sobinam delo duuto.)

⁵Hurke onam Urike oo Bejalelke pitol loge pínam runggu deteng Gibeonlo RUUTUMke dungko Tombu kerang delo kato. Roja Solomon lang ami tabungde RUUTUMme delo kumsuto.

⁶Tombu kerang delo rojade RUUTUMme pitol runggu delo ipagem ilíkla kumsuto; bí taroem éjarko palíkla takam deme delo romnam amanpe ilíkto.

⁷Delo yoh delo Shédíbí Solomon me lengkan sudola, “Nome ngo bidope no ingkoko míídon?” emla ííto.

⁸Solomon poyansuto, “No ngokke abu Dabidme agínpe botteruna ayangem lengkan suto, delokke supak ngome rojape bíme yétít motungku.

⁹E RUUTUM Shédía, ngokke abu Dabid kelo nokke pébisunamem apíng modaklangka. No ngome saplayimanam ami teyolo rojape imotung,

¹⁰dekepeila ngome buluke teyonglo yéji bonana gyan emlang kénnam em bilíktoi. Demamílo, kape kísa nokke siddína ami kídar sim ngo yébolayén?”

¹¹Shédíbí Solomonme poyansuto, “Nokke aapí míínamde mííjingdo. Ngokke ami kídíem yéjibodope kénnam-paanam gyan delo akor-siyorem kodung. No nokke mirem, paanam-donam, amín kanam, míínyingnam amiem simo dope, delokke nokke turnamem bojéko turmodope no komato. Ngokke ami kídíem kénnam-paanam delo akor-siyor loge yéjing bodope mííla ngo nome rojape imoto.

¹²Deke legape gyanem lang kénnamem ngo nokkíng ruulíkdung, sok teyong loteng ngo nome ekuserang, ai-abal, mirem sogong amín gínam kídarem biyé, nom bikampe séko meteng kerape bikímang, delokke séko mekom nokke méélam sokom bimayé.”

¹³Dekepeila, Gibeon lokke kedon kolo molíknam Israel ami kídíke kumpom; RUUTUMke dungkeng Tombu deloge Solomon gílen langkula Jirusalemlo aatoku. Delo bí duudola Israel amongdem ruutum bomto.

¹⁴Solomon guré-gaari loklang gurélok langkum suto. Bí éjar kolang língko appi guré-gaari, delokke guré sipayinge jarying kolang jarnyiko kato. Ayokonem bí Jirusalemlo mesuto, delokke abídem guré-gaari mepom doolunglo meto.

¹⁵Jirusalemlo baldín emlang uunem dabu doona kísa alummape idope Solomon rojabí imoto, delokke dííte yiibelo sidar esing emteng deddínem sikamor esingmum kísape imoto.

¹⁶Solomonke guré kídídem Ijipt loklang Kue amonglok rela langaato. Roja lokke pesi koret iyabina kídarde are bila sikesim Kue ami kídí lok laaríksuto.

¹⁷Bulu guré-gaari atelem Ijipt amonglok baldín nokdi língko akké kope delo guréem baldín nokdi língko kolang íying pilngo kope bila reto. Dekepe bulukelok Hittit delokke Siria roja kídarem guré-gaari emlang guréem koyon sulíktoku.