Read Alladian 2 ODONG 10 Bible Online

2 ODONG 10 - Alladian bible

2 ODONG 10

¹Línggíngdanlo duuna tabung Israel opínete Rehoboamme roja imope emla bamdum subom kolok Solomonke oo Rehoboam teng Shekem amonglo gíto.

²Sim legang sim Nebatke oo Jeroboam bí Ijipt amonglo duudola tatto. Bí Solomon rojame pesola Ijipt amonglo dunyok gela duutuai. Solomonke sinam, delokke bík oo Rehoboamke rojape ikunam legangdem tatla bí Ijipt loge aalat sutoku.

³Delok rongem línggíngdan Israel opínde Jeroboamme tomsula Rehoboam kíng gíla poto,

⁴“Nokke abude ngolukíng tebegruna egetko tulíktung. Sokke legape supak sim eget sim etsamola ngoluke yénamem yépodope ibimílo, ngolu nokke rumkílo yéyé.”

⁵Rehoboam poyansuto, “Longum méélamlo ngokkíng nolu aalat sulangkuka.” Delo ami kídíde gítoku.

⁶Depe irodelo Rehoboam roja, abu-abíyang kídarem séko bulu Solomon rojame pogul-igulnape yétuadín, bulum tatkísuto. Bí íngkíto, “Sim ami kídí sim poyan sudope nolu ngom íngkona poyilko pobilayén?”

⁷Bulu pokane, “No bulum ayangla delokke ashéng dope míídumílo buluke kaabang-tatbang dope potola, delo bulu yénamke nokke agér ibiyanape iyé.”

⁸Idokom Rehoboam bí abu-abíng poyilpe imang geyéla, bíkkelo agér gérna agíke gíípe siirumpe em luposutoku.

⁹Bí bulum íngkíto, “Nokke abu lokke tebegna egedem ngolukíng tulíknam sim etsang dokupe itoika emna kídar sim ngo poyan sukupe, nolu kapepak podomílo míídon?”

¹⁰Bíkke gíípe siirum yaamé koo kídarde sipe pobito: “Nome pona ami kídí dem sipe potoka, ‘Ngokke lakkéng kééyi si ngokke abu ugíng emteng biisam yadung.

¹¹Ngokke abue noluke teyonglo tebegruna egedem tulíktung; dempenem tebeg yanako ngo tutem momo líkyé. Ngokke abue nolum sabuk loge demtuai, idokom ngo nolum képkonglok pengémoyé.’ ”

¹²Rojake pokampe longum méélamlo Jeroboam lang abíd ami kídíde Rehoboam kíng aatoku.

¹³Rojabí abu-abíng poyilnam dem pomape ami kídídem marla pokar-poyarto.

¹⁴Bí yaamé koo kídíke poyilnampe poyanto, “Ngokke abue nolum tebegruna egedem tulíktung, dempenem tebegyanem nolum ngo tutem momo líkyé. Ngokke abue nolum sabuklok demto, ngo nolum képkonglok pengémoyé.”

¹⁵Shiloh among lokke kaaluna miri Ahijah bí Nebatke oo Jeroboam kíng íngkona agomko Rehoboam rojabí poyédín kerape porung genam agomdem arolíkdope RUUTUM Shédíke míínam lok ilíknamko. Deke legape rojabí ami kídídem pemek-solek gela buluke agomem tatna-tatmang kísa ito.

¹⁶Rojake buluke ponamem tatbimanam dem kaasugeyéla tabung Israel amide rojaem poyansuto, “Dabid kelok íngkona tarongko ngolu kadun? Jesseke oo lo ngolu paapenam atí kamang. E Israel, nolu mipil-miyonge noluke dungkenglo gílangkuka. Rehoboamme agí ekumem kaasu motoka!” Depe lugeyéla tabung Israel amíde buluke ekum danpe enpan suyintoku.

¹⁷Idokom Judah doolunglo duuna Israel ami kídídem Rehoboam ruutum bomto.

¹⁸Delo Roja Rehoboam Adoniram me kanggong dope lulígto. Bí agér iyana opééem yébona ruutumko. Idokom depe iduem bím Israel ami kídare dabu lok gekato. Depe idodelo Rehoboam roja dada pakpe guré-gaari delok gésaalangkula, Jirusalempe duksi getoku.

¹⁹Delokke ila silo loope línggíngdanlo duuna Israel ami kídare Dabid rojake yétíng-yéyin roja kídarem mirupe idung.