Read Alladian 2 ODONG 11 Bible Online

2 ODONG 11 - Alladian bible

2 ODONG 11

¹Rehoboam roja Jirusalemlo píílangkula ami kídarem gogdum sutoku, delo bí lak kolang jarying píínyiko gaiyalumna miram sipayingem Benjamin delo Judah opín loge laadumsuto. Bíkke míínamde kerape bíkke rumkílo duutuana línggíng opín Israel amongdem laalat sudokupe ito.

²Idokom RUUTUM ke agome Shédíke ami Shemaiah kíng aato,

³“No sim kobor sim Rehoboam roja melang tabung Judah, delokke Benjamin opínem polangka.

⁴‘Noluke bíro Israel amisuem mimak maga bommapeka. Tabunge ekum lo gílangkuka. Íngkona atoko katodín de ngok míngkorlok kato.’ ” Bulu Shédíke ponampe ila Jeroboamme imín sukape gímato.

⁵Jirusalemlo Rehoboam bí duulíktoku, delo bí Judah doolungdem edíírupe língkumpe kumgooto.

⁶Bí Bethlehem, Etam, Tekoa,

⁷Beth-Jur, Soko, Adullam,

⁸Gath, Mareshah, Jiph,

⁹Adoraim, Lakhish, Ajekah,

¹⁰Jorah, Aijalon, delo Hebron, Judah delo Benjamin doolung kídí demte etor torgoola meto.

¹¹Yapgo etor kídídem bí edíírupe torlík geyéla kaabomna kídar emteng melíkto, delo kumsung, tél emlang onggur alang mekumko kídí demteng kaabom nalok ullíkto.

¹²Sipaying kídídem bí edíírupe tabung yapgo dungko doolung delo tamkung emlang gíníng emte bojépe meorlíkbito. Sikepe bí Judah emlang Benjaminem bík aranglo meto.

¹³Israel among tabunglo dunggona miri írne delo Lebi kídare bíkkelo aadum suyintoku.

¹⁴Lebi ami kídíde agíke gooru-sobén dotako among delo ekuserang emteng mepak geyéla, Judah lolang Jirusalemlo byakyin aalíktoku. Kapeila Jeroboam lang bíkke oo kídarde bulume RUUTUM keelo miri agér ilíkpenamem imomato.

¹⁵Jeroboam bí agíe miri írne kídarem uyu kumko kídílo uyu kídíemla bíkke rubo-ruo mimang pínam kídíem kumsumoto.

¹⁶Israel opín buang loge séko bulu RUUTUM me arorupe míngkengsula kumsulítone, Lebi kídílo Jirusalem danpe gímín gela amanem RUUTUM buluke buku-neku Israelke Shédíme bisutoku.

¹⁷Sikepe ila, bulu Judah among dem ralmoto, delokke Solomonke oo Rehoboam rojame tagum kope tolíkto. Bulu Dabid rojake, delo Solomon rojake yébonam kísape mííla duuto.

¹⁸Rehoboam Mahalathme méngpe laato, bíkke abue Jerimoth, bí Dabid ke ue, delokke bíkke ane Abihail, bí Eliabke ome, delokke Jesseke oten ome.

¹⁹Bínyi oo angumko kato: Jeush, Shemariah delo Jaham.

²⁰Méélam delo Absalomke ome Maakah meteng méngpe laatoku, bíkkelok oo appiko kato: Abijah, Attai, Jija delo Shelomith.

²¹Takamem sandumsula, Rehoboam bí íying kolang píínyiko ménge, íying akkéko éésirie, delokke íying annyi kolang píínyiko ue, delo íying akkéko ome kato. Takam méng delo éésiri aradelok, bí Maakahme ayang yalumto,

²²delokke bí Maakah kelok onam Abijahme bík abíd oo kídíem pemílo mííbayalumla, bíme roja yétítdope ulto.

²³Rehoboam bí míngíng bomdula, gairupe yapgo molíkko Judah, delo Benjamin doolung kídílo bíkke oo kídardem agérem parlíkto. Bí bulum takam kanamrupe ekurang takamem bilíkla, bulume deddína méng emteng laabito.