Read Alladian 2 ODONG 13 Bible Online

2 ODONG 13 - Alladian bible

2 ODONG 13

¹Línggíng danlo duuna Israel opínlo Jeroboamke takying kolang dítak píínyiko roja dobomla duudungem, Abijah Judah among lokke rojape ilento,

²delokke bí Jirusalemlo tagumko ruutum bomto. Bíkke ane Mikaiah, bí Gibeah among lokke Urielke ome. Abijah kelang Jeroboam bínyike aralo mimage maglenbosuto.

³Abijah bí 400,000 ko mimak ijingna sipayingem gíbola mimaklo gílento, delo Jeroboam bíme 800,000 ko mimak ijing runa sipayingem gíbola mimak imínsuto.

⁴Abijah bí díítelo duuna Ephraim doolung lokke Jemaraim emnam dííte ponyukdan delo saadola poto, “E Jeroboam, delokke tabung Israel ami kídara, ngok ponamem tatgaptola!

⁵RUUTUM Israelke Shédí bí Dabid kelo nyokyimana aro daapong ibosunamem, delokke bíkke otíng-oyin loope Israel teyonglo yénamke rojem duumoyé emnamem nolu kénmanía?

⁶Idola Nebatke oo Jeroboam bí bíkke roja Solomonke mirupe ikai.

⁷Méélam delo bí agér kamana bopoleke laadum- laarum sutula, atta jérong geyéla Solomonke oo Rehoboamme iyabomtoku, delo bí yaamé koope ila, delokke yékí-kangkímala bulum atí iyan sumato.

⁸Dabidke otíng-oyin alaglo bilíknam RUUTUMke yétaem supak no mimak imínsupe píndung. Nokkíng deddína sipayinge kadung, delokke Jeroboamke noluke shédípe idope uunloge pínam rubo-ruo mimang kídarete kadung.

⁹RUUTUMke miri írne kídar, Aaronke otíng Lebi kídíem no monpaktoku. Angu among lokke ami inam kísa no agíe miri írnem buluke ayanpe ullíksuto. Sékodín gooru ruboko demangke mér sobén kínídko bomatodín, bulume nokke shédí emnam kídíke miripe kumlíkto.

¹⁰“Idola ngolu supak loope RUUTUM ngoluke RUUTUM Shédíme agérem gérbidung, delokke bím ngolu mepakmang. Aaronke otíng-oyin kídare buluke miri agérem gérsudung, delokke Lebi kídare bulum iguldung.

¹¹Rodíke delokke yumdíke bulu nampona nyotnamem delokke ipak adínem apíípe romlíkdung. Bulu ettíng amanem, dormo ayonlok deena tébul kolo leelíkdung, delokke yumdíke bulu uunlok pínam lém dakkeng delo meru kídíem nyotlíkdung. Ngolu RUUTUM bí íngkuem lulígtodín dem igedung, idola nolu bím mepaksuto.

¹²Shédí agísue ngoluke RUUTUMe, delokke bíkke miri írne kídare ngolu nolum mimak iyabomdope, bikul tapungem mutnampe belengla, ampeng si dagdung. Israellok ami kídara, RUUTUM noluke buku-nekuke Shédíme mimak imín sumapeka! Nolu ikummayé!”

¹³Depeido delo Jeroboam bí, abíd kídíe kerangdan lok aabomdungem, sipaying ayoko Judah kídídem méélamdan lok aabomdope melíkto.

¹⁴Judahde kanggosuname bulum gargong bomdope kaapato. Delo bulu igul legape RUUTUM me kabbisuto, delo miri írne kídarde bikul kídíem mutto.

¹⁵Delo Judah kídarde mimak aduddem gogduklenla, Abijah bí kerangem gíbola bulu magabomto; Shédíbí Jeroboam melang Israel maglíng dem ikumto.

¹⁶Israel ami kídíde Judah ami keralok duggetoku, delokke Shédí bí bulume Judah ami kídí alaglo melíkbito.

¹⁷Abijah lang bíkke sipaying kídíde Israel ami kídardem ikum-ilila ila, gairuna sipayingem 500,000 ko petto.

¹⁸Dekepe Judah kídíde Israel ami kídídem ikumto, kapeila bulu RUUTUM buluke buku-nekuke Shédíke teyonglo míídasuto.

¹⁹Delo Abijah bí Jeroboam ke maglíngem monmín gela Bethel, Jeshanah, Ephron, delo sim dunggona doolung kídarem laayinto.

²⁰Abijahke roja dobomdung tetedeme Jeroboam bí among dem yébom langkumato, delokke RUUTUM bí bím demletla bí sikai.

²¹Idola Abijah bí ralnam kayangkai. Bí íying kolang appiko méng em laato, deloge bí íying annyi kolang annyiko uem, delokke íying kolang akkéko omem oto.

²²Abijahke abíd yénam kídí, bík ikor kídí, delo bík lunam dooying kídíem kaaluna miri Iddoke atnam dooyinglo attung.