Read Alladian 2 ODONG 14 Bible Online

2 ODONG 14 - Alladian bible

2 ODONG 14

¹Abijah roja sila, Dabidke doolunglo duuna roja kídíem yuko agolo yuto. Bík oo Asa bí rojape ibotoku. Bík aralo asi-amongde eetet-dengomrupe takyingko yéto.

²Asabí aro emlang ainamem ila RUUTUM bíkke Shédíme ashéng moto.

³Bí uyuem ipak ilíkko merom kídar emlang uyu kumsuko kídíem laapakla, Asherah uyu mime kepe líísik díínam delo kangkénnana iyot ilíknam tabungdem bénpak-bényak bito.

⁴Bí Judah ami kídídem RUUTUM buluke buku-nekuke Shédíke míínamem igela, bík poyil emlang lulíg kídíem igedope lugaplíkto.

⁵Bíkke uyu kumsuko kídíem, delokke arí namponem romlíkko kídíem Judah among lok takam luune kídílok nyokmonam legape among yétade bík aralo eetet-dengompe duuto.

⁶Asi-amongde eetetla bí Judah doolungdem yapgoem edíírupe pílíktoku, delokke deddína dítakko midu-mimak kamato, kapeila RUUTUM bí bíme eetet-dengomem bito.

⁷Bí Judah ami kídíem sipe manboto, “Kaju ngolu luune kídar sim líísak etor torgoola, miru kaanana kedonna ekumem, delo sittumla sityala ilanam eyab kídíem moreplaju. Ngolu RUUTUM ngoluke Shédíke míínampe inam legape among si ngoluke aralo kadung. Bí ngolum mopítla rego takamlok ngolum kaabomdung.” Dekepeila bulu morepla, amongde edíngto.

⁸Asa bí Judahlok 300,000 sipaying maglíngko tamkung, delokke gíníng bomne, delokke Benjamin lok 280,000 maglíngko tamkung, delokke iyyi epuk bomne kato. Bulu takam miramla, airupe iyit-kényitsuna amipe ito.

⁹Ethiopia ami Jerah bí sipaying miliyonko, guré-gaari língko angumko bomla bulume mimak ikape Mareshah doolung loope aabomto.

¹⁰Asa bí bíme mimak irík sukape gílenla, bulu Mareshah ampengke Jephathah Yiibe delo mimakdem ilenpe emla iruula dagto.

¹¹Delo Asa bí RUUTUM bíkke Shédíme kabbisuto, “E RUUTUMA, ralna kelang ralmanake pénsamlo sékokom nok kísape igulpenayang kamang. Ngolume igultoi, E RUUTUM ngoluke Shédía, kapeila ngolu nokkíng míídasudung, delokke nok amínlok ngolu botteruna maglíng sim imínsudak. E RUUTUM no ngoluke Shédíe. Sékokom nome ikumpe míínam sulana kamang.”

¹²RUUTUM bí Ethiopia ami kídardem Asa melang Judah ami kídídem ikum moto; delokrodem Ethiopia kídíde dugnyok gekaku.

¹³Delo Asa lang bíkke sipaying kídare bulum Gerar among loope monlíktoku. Ethiopia milung deddínem delo petyinmang teteloope petto. Kapeila bulu RUUTUM ke kerang lolang bík maglíng keralo nyokyinkai. Judah ami kídíde deddína gaina sérangem laala bomtoku.

¹⁴Gerar ampeng-amlenglo duuna doolung kídar dem bulu líípak pakyin bito, kapeila delo duuna ami kídíde RUUTUM me yagorupe pesoto. Bulu doolung kídar dem lííla gairuna ekuserang kídí takamem laato. Kapeila doolung tabung delo deddína lapename kato.

¹⁵Delo bulu simon-sili kídíem meko ekum kídaremte ayoko aabomla, bulu mér sobén, delo uut simon kídíem bojéko goobomtoku. Delo bulu Jirusalemlo aalat sutoku.