Read Alladian 2 ODONG 15 Bible Online

2 ODONG 15 - Alladian bible

2 ODONG 15

¹Shédíke Aide Odedke oo Ajariah kelo aalíkto,

²delo bí Asame kaaríksupe gílenla, bím poto, “Asa, delokke takam Judah elang Benjamin nolu ngom tatgaptola: Noluke RUUTUM kelo duumín gedung tetengem, bíteng nolukíng duumíndung. Nolu bím matamílo, bí nolum pangko suyé, idola nolu bím mepakyémílo, bí nolum mepakyé.

³Kapeila deddína longe kope Israele aro Shédí kamape, delokke luyilna miri írne, delokke ayon koteng kamape ito.

⁴Idola edílo bulu duug adírem pangkadín, delo bulu RUUTUM Israelke Shédí kíng pelbang langkula, bulu bíme matalangkula, bíme paatoku.

⁵Delo longe kídar delo séko gílen todín demangkom séko gíatodín, bíkkelo atí ashéng-angam kamato. Legangde asi-among takam delo adír elang atímange kayinto.

⁶Among kone among akonem irééto, delokke luune kone luune akonem irééto, legade Shédíbí bulukelo ebín emlang adírem bomalíkto.

⁷Idola nolu aapíe botte langka! Noluke agér gérnam legape amanem paayé.”

⁸Edílo Asa bí kaaluna miri Odedke oo Ajariahke ponamdem tattodín, delo bí aapíde rallenkaku. Bí tabung uyu mimang kídarem Judah, delokke Benjamin among kídílok, delokke Ephraim lokke dííte mopanglo duuna doolung kídí lokteng joopak yintoku. Delo bí Shédíke Kumkeng Ekum aatak pírtekdan delo duuna ipak merom dem písi-pímotoku.

⁹Deddína amie Asa kelo Ephraim, Manasseh, delokke Simeon amonglok byaklíkla, bík amonglo duuto, kapeila RUUTUM bí bíkkíng kanamem bulu kaato. Asa bulum takam lang Judah kelang Benjamin ami kídíem gogdumsuto.

¹⁰Bulu Asake rojape takying kolang takngonape yédo delokke poolo angumnana delo Jirusalemlo dumsuto.

¹¹Delo longe delo bulu angu among loge lííla bomang kunam loge, RUUTUM kíng amanem bito: rubo língko kínídko, delo mér sobéne éjar kínídko.

¹²Bulu takame RUUTUM, buluke buku-nekuke Shédíme, aapí, delokke aang takamlok, kumsuyé emla tolík bosunam daapongko ibosuto.

¹³Koolai minelai, delokke milokonglai mimelai séko Shédíme kumsumayédí bíme petdope lubosuto.

¹⁴Bulu goktong-goktongla RUUTUMke amínlok daapong dem igeyé emla pésuto, delo bulu yagorupe ngomla bikul mutla ito.

¹⁵Tabung Judah lok ami kídarde ashéto, kapeila bulu buluke aapíe apíírupe daapong dem tolík bosuto. Bulu RUUTUM me kumsunamem ashéng bomto, delokke bí bulum toríksula rego takamlo eetet-dengomem bito.

¹⁶Asa roja bíkke ane neku Maakahme, Asherah uyu mimeke mimangko pínam legape rani anepe ikolok ipaktoku. Roja Asa mimang dem teksin-tekmín geyéla Kidron Yiibe delo emepe rompakto.

¹⁷Asa roja bí Israello duuna, uyu kumpom takamem líípak pakyin bimatuakom, bíkke yénam takam delo RUUTUM me míngkesudola yéto.

¹⁸Shédíke legape bíkke abu Abijah, delokke bík agísuke uun loklang baldín lok mola tosak sunam tabungem bí Kumkeng Ekum delo leelíkto.

¹⁹Bíkke takying angum kolang takngo dítakko yébodo deloope midu-mimak atí kamato.