Read Alladian 2 ODONG 16 Bible Online

2 ODONG 16 - Alladian bible

2 ODONG 16

¹Judah lokke roja Asake takying angum kolang takkénape ruutum bomdo delo, Israel lokke roja Baasha bí Judah amongem mimak ibomla, Judah amonglo gíyon-gíson sunana bedangem itumpe, Ramah amongdem yapgope etor torgong bomkai.

²Delo Asa bí baldín loklang uun lok Kumkeng Ekum lokke abal kumsung deloklang roja ekum delok laala Siria roja Ben-Hadad kíng Damaskas doolunglo melíkdola sipe poto,

³“Ngonyike abu annyi delok ikampe ngonyikom bonying ibosulaju. Si baldín silang uun si nokke amanko. Ngokke amonglo Baasha rojake maglíng melíkna kídíem bí goglat sudokupe, no Israel lokke roja Baasha kíng bonying ibosunamdem supak mepak sulangka.”

⁴Ben-Hadad Asa rojake agom delo tolíkla, bíkke sipaying ruutum kídí emlang maglíngem melíkla Israel doolung kídíem mimak iyamoto. Bulu Ijon, Dan, Abel-maim delo takam atoem mesingko Naphtali lokke doolung takam dem laayinto.

⁵Edílo Baasha bí sikepe inam kídí sim tattodín delo bí Ramahlo yapgo etor tortung dem iyimape, agér dem mepakto.

⁶Delo Asa roja tabung Judah among delok ami kídíem laadumsula Baasha rojake Ramahlo yapgo inana elíng, delokke siipang kídídem jooyin dope lulígto, delokke Geba lolang Mijpahlo dekedem bulu yapgo etorpe torlík sunatoku.

⁷Depe ido delo kaalu miri Hanani, Judah lokke roja Asa kelo gíla bím poto, “No Siria rojalo, RUUTUM nokke Shédí kíng míídasudumem, míída sukolok Siria rojake sipaying kídíe nokke alag aralok mopítsukaku.

⁸Ethiopia delokke Libya maglíng kídarde bojéko guré-gaari, delokke guré dukbomna ami kamatuanía? Idola nokke RUUTUM kelo míída sunam legape, bí nom buluke teyolo ikummoto.

⁹RUUTUM ke amige taleng kuppo sim, séko buluke aapíe bím arorupe míngke sudune bulume ralnam bidope, kanggapdung. No bopolrupe ito, delok legape supak lokke ila no agínke mimaklo magtíyé.”

¹⁰Asa bí dem tatla, yagorupe marla kaaluna Hananime íkolilok éémoto. Sikepe ido moodípak sok Asa bí ayokon amiekete itung-iré lento.

¹¹Asake ruutumpe yégangem yélen lokke ila yéyin loope Judah lokkelang Israel lokke roja kídíke dooying kitablo atkumtung.

¹²Takying angum kolang dítak konang nanape rojape yébodo delo Asa bí ale tarí yagorunako gelenla delok lebyangkai; dekepe ilateng bí RUUTUM kíng míílat sukumadola daktor kídíem matalatto.

¹³Takying appi kolang taktelko rojape yébotola Asa bí sila,

¹⁴bíkke agíkepe ago roolen sunam elíng ago delo Dabidke doolunglo bíme yuto. Bulu nampona neyang kuséréng, delokke aríkana tél loge yugape bíkke simang amíl delo mollíkla, bík legape isi-marmangem eme mepomko telokkai idupe romla ito.