Read Alladian 2 ODONG 17 Bible Online

2 ODONG 17 - Alladian bible

2 ODONG 17

¹Asake oo Jehoshaphat bí rojape igebotoku, delokke Israel kídíem imínsula dope agídan keedem edíípe ilíksuto.

²Bí Judahlo yapgo etor torgong suko doolung kídí delo sipayingem meyinlíkto, delo Judah among, delo Ephraim doolung kídar delo bíkke abu Asake laabonam doolung kídílo sipaying opéé dungkoem iyinlíkto.

³RUUTUM bí Jehoshaphatme utepooroem bito, legade bí bíkke abu lok yétí-yégo séguem igeto, delokke Baal uyume kummang.

⁴Bíkke abuke Shédíme agér gérbila, Shédíke lulígem igeto, delokke Israellok roja kídíke yékorpe bí yémato.

⁵Depeila RUUTUM bí among yétadem bíkke alaglo duumoto; delo Judah tabunge Jehoshaphat kíng kajanangem bomato, delo bí miremla mínggenampe ikai.

⁶RUUTUMke bedanglok gínamem bíkke aapíde botte bomto; delokke uyu kumko tabung emla Asherah uyu mimeke mimang takam emteng Judahlok ipakyinto.

⁷Bíkke tagumnape ruutum bomdo delo bíkke agérem ina sim ami kídí sim Judah doolung kídarlo poyil-luyil goodope mepan sulíkto: Benhail, Obadiah, Jekhariah, Nethanel, delo Mikaiah bulum.

⁸Bulukíng Lebi konangko, delokke miri annyiko gímín geto. Lebi kídíe: Shemaiah, Nethaniah, Jebadiah, Asahel, Shemiramoth, Jehothan, Adonijah, Tobijah, delo Tobadonij; miri annyie: Elishama lang Jehoram.

⁹Bulu Shédíke ayon kitabem Judah lok luune tabunglo bomgodula ami kídíem poyil gooto;

¹⁰Jehoshaphat rojame imín sunanem mííramdope RUUTUM bí Judah ampeng-amleng tabung roja kídarem pesomoto.

¹¹Philistain ami ayokone Jehoshaphatme deddína baldín emla abíd amanem bomabito; delokke Arab amieke bíme 7,700 ko mérem, delokke 7,700 ko sobénem bomabito.

¹²Dekepe Jehoshaphat bí bojéyayape edíngkai. Bí Judahlo mimak yapgo emlang kumsung kídaremte molíkto,

¹³delokke bí Judah doolung kídarlo kumsung bottene kato. Jirusalemlo bí miramruna sipayingeke meto.

¹⁴Buluke erang miyonglok atlíkname si: Judah erang loge Adnah, bíkke aralo 300,000 sipayingko kato.

¹⁵Bík méélamlo Jehohanan bí 280,000 sipayingko yéboto,

¹⁶bík méélamlo Jikrike oo Amasiah bí 200,000 sipayingko yéboto. (Amasiah bí RUUTUM ke agérem géryé emla tolíksuto.)

¹⁷Benjamin erang loge Eliada, bí amín kanarung sipayingko, bíkkelo 200,000 sipayingko tamkung, delokke epuk bomne kato.

¹⁸Bík méélamlo Jehojabad airupe mimak ekurangem bomna 180,000 sipayingko kato.

¹⁹Si ami kídar si Jirusalemlo rojadem agér gérbito, delokke sok teyonglo bí abíd sipaying kídarem abíd Judah lokke yapgo etor torlíknam doolung kídí delo melíkto.