Read Alladian 2 ODONG 18 Bible Online

2 ODONG 18 - Alladian bible

2 ODONG 18

¹Edílo Jehoshaphat roja miremla, delokke amín gíkadí, bí bík eranglok ako Ahab rojake eranglo minyam ibosudope iboto.

²Dítak ayoko irongem Jehoshaphat bí Samarilo Ahab rojame kaarík supe aato. Depeidodem Ahab bí mér sobén delo goorulok bojéko Jehoshaphat melang bíkking aamín gena ami kídí legape paboto. Delo Ahab bí Jehoshaphatme Gilead among lok Ramoth doolungdem mimak magang bosudope poyi-poyatto.

³Israel lokke roja Ahab bí Jehoshaphat rojame íngkíto, “No Ramoth em ngokkíng mimak magabosuyén?” Jehoshaphat poyansuto, “Ngo nokke akame, dekepe ngok maglíng eteng idung. Ngolu nokkíng enmín geyé.”

⁴Delo bí potemto, “Idola kerayalumpe RUUTUM me tatkí sulaju.”

⁵Dekepeila Ahab bí kaaluna miri kídarem midum língko appiko gogdumsula bulum íngkíto, “Ngolu Ramothem magabompe gímíloya ma gímamíloya?” Bulu poyansula, “Gítola Shédíbí nolum ikumdope biyé,” emla poto.

⁶Idola Jehoshaphat ínggosuto, “Ngolu RUUTUM me ííbeng sudope akoyang kaaluna miriko so kaman?”

⁷Ahab poyansuto, “Supakkom RUUTUM me ííbeng sukeng amiko kadung, bí Imlahke oo Mikaiah, idokom bím ngo kaalímang, legade ngokke ainamem bí letel koteng pokímang, delok ayanpe atímana mílíem potí bidung.” “No dekepe pope aimang,” emla Jehoshaphat poyansuto.

⁸Dekepeila Ahab roja kebang migomko tomala, menarupe Mikaiah me bomadope lulígto.

⁹Roja annyide roja leemoem gela, Samari luyab lokke ali yikpom delo, bínyike palenglo duudo, delokke tabung kaaluna miri kídarde bínyike keralo kaalu-kangor agomem pobito.

¹⁰Buluke aralok Khenanahke oo Jedekiah agísukepe arem loge arengeke píla, Ahabme sipe poto, “RUUTUMbí sipe podung, ‘Soge no Siria ami kídíem mimak imín sunayé, delokke bulum apíípe ikumyé.’ ”

¹¹Abíd kaaluna miri kídí deteng akampe poyinto. “Ramothpe gísaala ikumtola; RUUTUM bí tem roja alaglo melíkyé.”

¹²Dekepe idungem Mikaiahme tomdope melíknam kebang migomde bíme sipe poto, “Abíd takam kaaluna miri kídare roje ikumyé emla podung, iname nokom dekepe poyamtola.”

¹³Delo Mikaiah poyansuto, “Turna RUUTUMke amín lok podung, ngom ingkuemdí ngokke Shédíbí pomoyéne, dem ngo poyé.”

¹⁴Edílo bí Ahab rojake keralo aatodín, delo rojade bíme íngkíto, “Mikaiah, Jehoshaphat roja lang ngo Ramoth em imín sukape gímíloya ma gímamíloya?” Delo Mikaiah poyansuto, “Gítola, arorupe no ikumyé. RUUTUM bí nome ikummoyé.”

¹⁵Idola Ahab poyansuto, “Edílo no RUUTUM ke amín loge ngom podudín, aro agomem polangka! Edítpeda ngo nom potípen?”

¹⁶Delo Mikaiah poyansuto, “Israel maglíngem ngo dííte kídílo kaabomna kamape yégosuna mér sobén kísape mapan-maran sudope kaadung. Delokke RUUTUM podung, ‘Si ami kídísi ruutum kamang; bulum eetet-dengompe ekumlo gímotoku.’ ”

¹⁷Ahab Jehoshaphatme emto, “Bí ngokke legape ainamem pobimape, atímana mílíem podung emla nom ngo pomatonía!”

¹⁸Mikaiah podan tetela, “RUUTUM ke ponamem supak tattola! Ngo RUUTUM me bík palenglo duudope, delokke bíkke takam teyong kotoki kídarem bíkke ampeng-amlenglo dagdupe kaato.

¹⁹Delo RUUTUM bí ííto, ‘Séko Ahabme yatla, Ramothlo petkosudope gímoyéne?’ Ayokon teyong kotoki kídíde atíkonpe, delokke ayokone atíkonpe delo pokai.

²⁰Delo aidko RUUTUM kíng dagang dola sipe pokai, ‘Ngo bím yatyé,’ ‘Kapekísa?’ emla RUUTUM bí ííto.

²¹Aidde poyansuto, ‘Ngo gíla Ahabke kaaluna miri tabungem menam agom podope ilíkyé.’ Delo RUUTUM bím poto, ‘Gíla bím yattoka. Nok agérde aiyé.’ ”

²²Mikaiah bí poyin nanape poto, “Sikepemoko takame ikane. RUUTUM bí nokke kaaluna miri takam sim nome menam agom pomotung. Idola bí agísue, no gérmangem ríksuyé emla lutobong!”

²³Delo Khenanahke oo Jedekiah bíkkíng saaníndola Mikaiahme kémkém delok pidola íngkíto, “Edíloda RUUTUMke aide ngome mepakla, nome dekepe podon?”

²⁴Mikaiah poyansuto, “Pírtek arang kídílo rusisupe nokke gíyéme no sim kaapayé.”

²⁵Delo Ahab roja bík migom konem lulígto, “Mikaiahme umla luune gobonor Amon kílang roja oo Joash kíng melíkto.

²⁶Bulume bím pateklo tumla, ngokke aipe aalatsukumang teteloope ettíng loklang asi petom lok bidope polangka.”

²⁷Mikaiah gogtong dola poto, “No turla aipe aalat suyékumílo, RUUTUM bí ngokkelok pomang!” Delo bí potemto, “Tabung ami nolu, ngok ponamem tatgap langka.”

²⁸Delo Israel lokke roja Ahab lang Judah lokke roja Jehoshaphat bínyi Gilead lokke Ramoth luune dem mimak ipe gíto.

²⁹Israel rojade Jehoshaphat rojame poto, “Ngonyi mimak ipe gíadolo, ngo lesi-kanmoem angukonpe irusuyé, idokom no nokke roja ege kídíem gelangka.” Dekepeila Israel rojade mimak delo lemo moruusula gíto.

³⁰Siria rojade bíkke guré-gaari dugbomna ruutum kídarem abídem imínsumape petom Israellok rojeme imín sulangka emla lulígto.

³¹Dekepeila edílo bulu Jehoshaphat rojame kaatodín, bulu takame bímin Israellok roje emla mííla, bulu bíkke danpe billat suto. Idokom Jehoshaphat uloko gogla, RUUTUM Shédí bí bíme mopítla buluke iyabomnamde bíkkelok mootengkai.

³²Edílo guré-gaari dugbomnalok ruutum kídarde bíme Israel lokke roja mang emla kaasutodín, delo bulu bím monmín geyimato.

³³Idokom Siria sipaying kone epukko aplíkla raatagem epukde Ahab rojame bíkke arem galuk kela nambí tusutpak delok apketto. “Ngome tarí apketto,” emla bík guré-gaari dugbonadem ulo gogla poto, “Billat sulangkula mimak ikosok duggétoku!”

³⁴Mimakde yagorupe makmín sudodem Ahab roja guré-gaari teyong delo, Siria danpe kerange ila, tabda sula dagtíto. Doonyi uadodem bí sikai.