Read Alladian 2 ODONG 19 Bible Online

2 ODONG 19 - Alladian bible

2 ODONG 19

¹Judah lokke roja Jehoshaphat bí aiyope Jirusalemlo bík dungkolo píísutoku.

²Hananike oo kaalu miripe ina Jehu bí rojaem kaaríksupe gíadola poto, “No aimana ami kídíem, delokke RUUTUM me akna kídíem igulnamde aidung míídunía? Sikepe inamsi RUUTUMke marnamem nokkelo aamotung.

³Dekepe iduakom, nokkíng anyongko ainame kadung. No ami kídí lokke kumsunam Asherah uyu mimeke mimang kídíem laapakto, delokke no Shédíke míínamem igepeem ikíto.”

⁴Jehoshaphat Jirusalemlo duuto, delokke bí lekoda sokko Beersheba lokke ila línggíng dííte mopang Ephraim loope, ami kídar deme RUUTUM buluke buku-nekuke Shédí kelo aalat sudokupe tomgoope ami kídarlo entígooto.

⁵Judah lokke yapgo etor torgongnam doolung mipílo bí kebang ruutum kídíem paryin líkto,

⁶delokke bí bulum poyilto, “Noluke kebang lubinamem míngíngla lubilangka. Legade nolu amike políklok imang, RUUTUM ke polík lokmin idune, delokke bí noluke kebang lubiyém nolukíng duumíndung.

⁷RUUTUM me pesodola, ansula agérem gérlangka, kapeila RUUTUM ngoluke Shédíbí míílum, mííbang, delokke sépsu-paasu laanam kídíem hakjém gelamang.”

⁸Jehoshaphat bí Jirusalemlo Lebi ekelang mirieke, delokke Israel erang lokke miroeke RUUTUMke ayonem ige-sangge bola, delokke luune delo duuna kídí kepe pénsam kebangem lubidope parlíkto.

⁹Bí bulum sikepe lugap líkto, “Nolu RUUTUM me aro míngkeng loklang bím pesodola bík ponampe takamem igela, noluke agérem gérperung aido.

¹⁰Noluke amongso lekope duubosunam aní-bíro kone ingkona luunelok aala yilí bítnam demangke ayon mangkom lulígnamem ipéésunam kelíng-kebangko noluke keralo bomayém, RUUTUM me bulu ipéésula paab imadope kebang baabomdungem, buluke igepenamem bulume aipakpe poyil langka. Nolu sikepe imamílo nolulang noluke aní-bíro kídíe RUUTUM ke marnamem paayé. Idola nolu noluke ipenamem imílo, nolukíng paab kamayé.

¹¹Dormo ayonlok aana kelíng kebang tabungem miri írne Amariah bí ruutum yalumpe iboyé, delokke Judah lok gobonor, Ishmael ke oo Jebadiah bí rojake legang takamem kaabona ruutum yalumpe iyé. Kebanglo luyinnampe igekunamem Lebi kídare kaaboyé. Aapíe míídukla, sim lugaplíknam kídar sim igelangka, delokke RUUTUM bí arologe yénakelo duumín gedaklangka!”