Read Alladian 2 ODONG 2 Bible Online

2 ODONG 2 - Alladian bible

2 ODONG 2

¹Roja Solomon RUUTUM me kumsupeko Kumkeng Ekum kolang bíkke rojape duupeko koteng modope lulíg lento.

²Bí 70,000 amiko ekurangem gedung-getok dope, delokke 80,000 amiko díítelo dabu gatpenem ilíkto. Delo 3600 amiko agér gérnem kaaya penaem melíkto.

³Solomon koborko Tur roja Hiram kíteng melíkto: “No ngokke abu Dabidme roja dungkuem modungem sidar siipong loge melíknam kísape ngom teng sidar siipong loge melíktokui.

⁴Ngo RUUTUM ngokke Shédíke amínpe Kumkeng Ekumko modak. Ngokke amiela ngo arí nampona amanem romlíkdola, deena ettíngem agínpe bikela, yumdí rodíke romnam amanem romlíkla, delokke Sabbath kídílo, Aní Poolo gíídílo, delo abíd deena longe kídíem RUUTUM Shédíme yitge-rínggeko deena mooloppe si iyé. Bí Israel ami kídíem sime yénamke iyar gedope lulígto.

⁵Ngokke Kumkeng Ekum mopenamde botteruna kope iyé, legade ngokke Shédíbí abíd tabung uyu kídíem pakyane.

⁶Idokom sékoda bíkkepe ekumko mobilayén? Kapeila teyong among, delokke kedon yalumna teyong among eteng bík legape amédung. Demílo ngokke bík keralo arí nampona amanem romlík peko mobinam sokke kékonlo, sékoda bíkkepe ekumko mobipena ngo?

⁷Supage delokke legape agér kénna amiko, uun nokdi, baldín, pitol, delokke arem agér, delo egemteng yalíng límongna, línggapna, delo yamukna moríem bijing nako, delokke moi-muang emteng pajing líknako ngokkíng melíktoka. Bí ngokke abu Dabid rojake ulngu sunam agér ijiina séko bulu Judah lolang Jirusalem so ngokkíng yémín dudín bulukíng yébo sudope.

⁸Lebanon amonglok sidar, siinang delo algum siiponglok ngokkíng melík toika. Ngo tatdung Lebanon delo nokke ami kídíe esing gatnam emteng gatjing dung. Ngokke ami kídísi nokke ami kídíso agérem gérbosuyé.

⁹Deddína siipangem ngome gatbidope, legade ngokke Kumkeng Ekum mopenamde botterunako delo asire liplop ila kaalal sunamkope iyé.

¹⁰Ngome esing gatbidope nokke béérang melíknam sokke legape nom ngo éjar annyi métrik ton kope ujone ina géhulok, éjar annyi métrik ton ujonko anyat lok, jarpi língko litar ujonko onggur alanglok delokke jarpi língko litar ujonko olib téllok biyé.”

¹¹Tur lokke Hiram roja Solomon me shitipe biyan sutoku: “Shédíbí bíkke amiem ayasunam legape bí nome buluke rojape ilíkto.”

¹²Hiram potemto, “Shédíme yidgedung. Israelke Shédí teyong among emlang tani amongem pílenna Shédíme! Bí Dabid rojame gairupe beréruna, míngkén-míngoruna, budii-bukan runa oo ko bitung. Supak bí Shédí melang bíkke agí roja dungko ekum dem molenpeem míírung lendung.

¹³Botterupe budii kala agér ijingna Huramabi me ngo nokkelo melíkdung.

¹⁴Bíkke anede Dan opín lokkeko, abude Tur among lokkeko. delokke egeme límuk, yaying, pesang morí tabungem kéndope iyil sunako. Bí tabung lokke pokampe egelo pooré ilíknamem jégo-jégi ikénnako. Nokke abu Dabidke ullennam monyo ijingna kídar delo leko mínlayé.

¹⁵Supage ngokke ruutum no, nokke agérem ibidope melíknam ami kídíem biyé emla nokke togesunam kídí gehu, tél, anyat delokke onggur alangdem melík langka.

¹⁶Edílo no mííyédín ngolu Lebanon soge tabungdem gatbiyé, delo Joppa among lokke sokkodan delo esing kídardem éédum sula siyéng loge yuttok bomyé. Deloge no Jirusalem loope bomlayéku.”

¹⁷Bíkke abu Dabid rojake ami kídíem sankínam kísa Solomon rojateng Israel amonglo mibo duuna kídarem sankímoto. Delo mibo ami lokke ekume 153,600 ko kato.

¹⁸Bí 70,000 deme ekum esing-taríem joodung jootok dope ilíkto, delo 80,000 deme díítelok daabu ibín lendope ilíkto, delo 3600 ko agér inam imangem kaayadope orlíkto.