Read Alladian 2 ODONG 20 Bible Online

2 ODONG 20 - Alladian bible

2 ODONG 20

¹Sokke méélampe Moab kelang Ammon maglínge, buluke bonying ibosunam Meunit kídíem idumsula Jehoshaphatme mimak ikape aabomto.

²Kotokieke aala Jehoshaphatme legadem pokanto, “Edom lokke botteruna maglíngko nome mimak ikape Sina Siyéng lokke rotkondan loge aadung. Bulu Hajajon Tamar among dem laatubong.” (Si Engedi lok amín akone.)

³Delo Jehoshaphatbí pesola, mopítsupeko bedang legape RUUTUMme kumto. Delo bí Judah among takam delo doma-tíímape nyobomsula kumnamko kumdope ukumko bigoosuto.

⁴Judah lokke luune takamlok amie Jirusalemlo aadumsula RUUTUM kíng igul matala,

⁵bululang Jirusalem lok ami tabunge lekope Kumkeng Ekum delokke kebang baapom aní delo dumsuto. Jehoshaphat roja, buluke keradelo dagadola

⁶sikepe gogtong-gogtongla kumboto, “E RUUTUM ngoluke buku kídíke Shédí, no teyong amonglo duuna Shédí manía? No among takam sokke yéta takamem ruutum manía? Nokke alaglo tolname lang ralname kadung, delokke sékoteng nome dakkí sulamang.

⁷E ngoluke Shédía, nokke Israel ami kídarem bimang adape so among so dungku suna ami kídarem no monbín bimape itonía, delokke nok angong Abrahamke otíng-oyinem yénamke duuyar líkdope no sim bimanía?

⁸Delokke bulu so duulíkkai, delokke nok amínlok Kumkeng Ekum koteng sikepe podola, so molíkto,

⁹‘Atímange ngolukíng aamílo, yokse, íngkí-bengkíe, demangkom kilii-ramlie, demangkom dírí-kenoe kala imílo ngolu so ekumso dagayé, delokke nok keralo dagayé, kapeila nok amíne so ekum so kadung. Delo ngoluke duk-adír dolo nokkíng ngolu kabbi suyé, delo no tatbila ngolum mopítyé.’

¹⁰Delo supak Ammon, Moab delo Seir díítelok ami kídare ngolum mimak iyabomdak. Edílo ngoluke neku-buku kídare Ijipt among loge gílen tokudín, no bulum so among kídarso aamomatuai, depeila ngoluke neku-buku kídare bulum bilgela líípak mato.

¹¹Dekepe inamem bulu ngolume biyan sukupe, nokke among binam soge ngolume monbínkupe aadak.

¹²E ngoluke Shédía, buluk teyolo nok kebangem ilíkmayénía? Kapeila ngolum aabomna siddína maglíng keraso ngolu atí ralnam kamang. Ngolu kape imíloi atí kénmang, idola ngoluke amig kídísi nokkelo kaada sudung.”

¹³Dekepe idodelo Judah lokke ami takame, buluke koo ojing kídíe, buluke méng kídíe, delokke ome-oo kídíe lekope RUUTUMke keralo dagato.

¹⁴Delo RUUTUMke Aide bamdum suko delo yéna Lebi ami Jekhariahke oo Jahajiel kíng aalíkto. Bí Asaph erang lokke Asaph ke oo Mattaniah, bíkke onam Jeiel, bíkke onam Benaiah, bíkke onam Jekhariah ke ue.

¹⁵Delo bí poto, “Jehoshaphat roja, delokke Judah lolang Jirusalemlo duuna tabunge tatgaptola! RUUTUM bí sikepe nolum podung, ‘Siddína maglíngem kaala pesomapeka, delokke mínggíp sumapeka; kapeila mimak makmín supenamde nolukemang, idola Shédíkemino.

¹⁶Bulum tuurík supe nyampo gítoklangka, kaalangka bulu Jij dííte gébung danlok resaayé; bulum nolu Jeruel mongku-moorakke sanggodan yiibe duurípak delo kaaríksuyé.

¹⁷So mimak so nolu atí imín supenam kamang; noluke dagpekolo daglangka, delokke asoope dagla, noluke adumpe RUUTUMke ikumnamem kaalangka. E Judah, delokke Jirusalem kídía.’ Pesomapeka delokke mínggíp sumapeka; yampo bulum tupríksupe gílen langka, delokke RUUTUM bí nolukíng yémín geyé.”

¹⁸Delo Jehoshaphat bík mikmoem amongdanpe ila gubadola kumsuto, delokke tabung Judah elang Jirusalem ami kídíe RUUTUMke keralo olíkla RUUTUM me kumsuto.

¹⁹Depeido delo Kohath erang loklang Korah lokke Lebi kídare RUUTUM Israelke Shédíme gogtodola yitgepe dagrepto.

²⁰Roh kondem rokomope bulu gerepla Tekoa mongku-moorak danpe bulu gílento. Buluke gílendak delo Jehoshaphat bí dagla poto, “Judah, delokke Jirusalem ami kídara, ngok ponamem tatgaplangka! RUUTUM noluke Shédí kelo míngkesulangka, delo nolu edíílíkyé; bíkke polu-poorna miri kídaremte arope míílangka, delo nolu ikumyaryé.”

²¹Delo edílo bí ami kídídem poyilem iyintodín, delo bí RUUTUM kelo miriem lula, delokke deena leemoem gela bím rínggela, maglíng keradelo gíla sikepe lugepenaem ullento, “RUUTUM me yidgelangka, kapeila bíkke mínggapna ayangde duuyarne.”

²²Edílo bulu miri lulentodín delo RUUTUMbí mimak magana maglíng kídíem pesorían lok lomgo sumoto.

²³Ammon elang Moabe, Seir díítelok ami kídíem mimak ibomla bulum nyokyinmoto, delokrongem bínyiteng mimak imínsuto.

²⁴Delo Judah sipaying kídíde mongku-moorak delo duuna kanggo suko tongi delo pííla resaadola kaatoname deddína simangem among delo akume-gera dodope kaato, atelkoteng mopísuna kamato.

²⁵Edílo Jehoshaphat lang bíkke ami kídíe, buluke sinyonam ekuserangem laape gítodí, delo bulu deddína taroem, ekuserangem, ege-galugem, delo arekana abíd sérangem paato. Bulu dekedem joobomku layimang loorí loope laato. Ekurang kídarde bojérungko ila, dem tabung laadum sukolo longumko bulu yélíkto.

²⁶Loopi nana delo bulu Berakah Yiibe delo gídum sulangkula, delo bulu RUUTUM me yidgetoku. Depeila silo loope sim moolop sim Berakah Yiibe emdung.

²⁷Depe igeyéla bulum takam Jehoshaphat ashéla Jirusalem danpe gílat botoku, kapeila RUUTUM bí buluke miru kídarem ikumboto.

²⁸Bulu Jirusalem delo Kumkeng Ekum monam delo, aadakkula bulu harp tapung, layar tapung, delokke bikul kídíem mutla aatoku.

²⁹Delo Israel ami kídíke miruem RUUTUM bí mimak imínsuto emnamdem tatla abíd yéta kídíde Shédíme pesokai.

³⁰Dekepeila Jehoshaphat eetet-dengomrupe yéboto, kapeila bík Shédí bí bíme kéényung rego takamlok kaabomto.

³¹Sikepe Jehoshapath Judah amonglo rojape yéboto. Bíkke dítage takying angum kolang takngoko idodelo bí Judah among lokke rojape yélento, delokke bí Jirusalemlo takying annyi kolang takngoko roja doboto. Bíkke ane amíne Ajubah, bí Shilhike ome.

³²Bí bíkke abu Asake yédulok yémínla, RUUTUMke kaabape agérem gérto,

³³idokom bí uyu kumpom kídarem nyokmomato. Ami kídíe aapí-aanglok buluke neku-bukuke Shédíkelo apíípe tolík sukumato dada.

³⁴Jehoshaphatke abíd legang kídíem yélen lokke ila yéyin loope Hananike oo Jehuke dooying kitablo atkumtung, si Israellok roja kídíke dooying atkumko kitap lokke olekone.

³⁵Sokke méélamlo Judahlok roja Jehoshaphatbí Israel lokke deddína atímangem ina Ahijah roja kelo leko bosutoku.

³⁶Tarshish amonglo pesi koret igonadope asi jaji pape emla bí tolík bosula lekope Ejion Geber amonglo pabosuto.

³⁷Delo Mareshah among lokke Dodabahuke oo Eliejer sikepe kaalu agomem Jehoshaphatme pobito, “Nokke Ahajiah kíng leko bosunam legape RUUTUM bí nokke pínamdem nyokmoyé.” Delo asi jaji kídíde betla, Tarshishlo gílamato.