Read Alladian 2 ODONG 21 Bible Online

2 ODONG 21 - Alladian bible

2 ODONG 21

¹Jehoshaphat sila, bíme Dabidke doolunglo roja kídíke agolo yuto, delokke bíkke oo Jehorambí bím rojape yétítto.

²Jehoshaphat rojake oo Jehoramke bíro akkéko kato: Ajariah, Jehiel, Jekhariah, Ajariahu, Mikhael, delo Shephatiah.

³Buluke abude bulume baldín, uun, delo abíd arekana ekuserang loge bojéko amanem, delo edíngrupe yabgo ilíknam Judah doolung kídíem bito; idokom Jehorambí obíng yalumpe inam legape, bíme among yétadem rojape yétítmoto.

⁴Jehoram bí bík abu dungko palengdem dungabom rongem, bíkke bíro tabungem bí yoksalok pakayinto, delokke Israellok ruutum ayokoteng bí petto.

⁵Takying angum kolang taknyiko idoem Jehoram bí rojape ilento, delokke bí dítak píínyiko Jirusalemlo rojape yéboto.

⁶Bí Ahab rojake yébonam kísape, delo abíd Israel roja kídí yébonam kísape yéboto, kapeila bíkke méngde Ahabke ome. Delokke bí ingkuedí RUUTUM ke kangkolo kaabamanampe itone deme ito.

⁷Depe iduakom RUUTUM bí Dabidke ekumem nyokmope míímato, kapeila Dabid kelo bí daapongko ibosula bíkke otíng-oyinem yénamke ruutum em yéyarmoyé emla pébisutuai.

⁸Jehoramke yégong delo Edom ami kídare Judah yéta aralo duumayé emla mirupe ila, bulu agísue rojako ullensuto.

⁹Dekepeila Jehoram lang bíkke maglíng ruutum kídíe, bíkke guré-gaari takamem bomla yoh delo Edom kídíem mimak aabomto. Delo Edom kídíde bulum gargong bomto, idola yoh delo bulu dugpí sutoku.

¹⁰Dekepe siloloope Edom ami kídare Judah amiem mirolpe idung. Dekepe idodelo Libnah ami kídarete bíkke yéta delokke mirolpe rollento, kapeila bí RUUTUM, bíkke buku-nekuke Shédíme mepaksuto.

¹¹Delokke teyonglo Jehoram agíe uyu kumpom emte Judah lokke dííte mopanglo duuna doolung kídílo ilík boto, delo Judah ami emlang Jirusalem ami kídarem RUUTUM me ipéésula paab iboto.

¹²Delokrodem Jehoram bí kaaluna miri Elijah kelok sikepe atnam shitiko paato, “RUUTUM nokke abu Dabidke Shédíbí sikepe podung, ‘Nokke abu Jehoshaphat demangke Judah lokke roja Asake gídulok no gímang,

¹³idola Israellok roja kídíke gídulok no gíla, Judah lolang Jirusalemlo duuna kídíem Ahabke ekume kapekísa Israelem RUUTUMme mitpan suko bedanglok gíbotodín, dekepe no gíboto, delok teyolo no nokke abuke ekum lokke bíro kídar emteng petyinto, séko bulu nom pemílo aiyatuai;

¹⁴kaalangka RUUTUM bí botteruna kilii-ramliko, nok ami kídílo, nok ome-oo kídílo, nokke méng kídílo, delokke nokke ekuserang takamlo píímoyé,

¹⁵delokke no agísuedan longeko yayang yagoyayang kina akii asallo kinamko geyé.’ ”

¹⁶Delokke RUUTUMke marname Jehoram roja kelo pííla, Ethiopia doolung anínlo duuna Philistain kídí, delokke Arab ami kídarem midu-mimak iyabomdope ruulíkla,

¹⁷bulu Judahdem aabomla ikumto, delokke rojake ekum lokke ekurang takamem giibomtoku, delokke bíkke oo takam emlang bík mime takam emteng bomlangkula, bík oo aníyalum Ahajiahke kékonlo bíkkíng oo kaimato.

¹⁸Sok tabung sokke méélamlo RUUTUM bí Jehoramme ipíílayi kumanam akii asal kinamko gemoto.

¹⁹Dekepe kitíla dítak annyiem yéyin dakdem, bíkke akii asalde luyulo kinam delok yullento, delokke bí yagorupe kila sikai. Bíkke ami kídarde, bíkke abu kídíem mepom romlíknam kísape, bíme mínggenana eme koteng romlíkmang.

²⁰Edílo Jehoram bí rojape ilentodí delo bíkke dítage takying angum kolang taknyiko ido, delokke bí Jirusalem amongdem dítak píínyiko yéboto, delokke sékoteng bík sinamem duug ankína kamato. Bulu bím Dabidke doolunglo yudokom, roja golung delo yumato.