Read Alladian 2 ODONG 22 Bible Online

2 ODONG 22 - Alladian bible

2 ODONG 22

¹Delo Jirusalemlo duuna kídíe roja delokke oo aníyalum Ahajiahme rojape yétítmoto; kapeila Arab kídílo lekope aana líína opééde abíyana oo takamem petyinbito. Dekepeila Judahlok roja Jehoramke oo Ahajiahbí rojape ito.

²Ahajiah bí rojape ilendodem takying appi kolang dítak annyiko ido, delokke bí taktelko Jirusalemdem ruutum boto. Bíkke ane amíne Athaliah, bí Omrike oten ome.

³Bíkom Ahab rojake ekumlok gídupe gíto, kapeila atímana agér kídídem idope bíkke anedei bíme luyil-poyilto.

⁴Ahabke ekum lokke inampe, bí RUUTUMke kaabamanamem ito; kapeila bík abu sirongem bulu bíkke poyil-luyilnape ito, delokke bulu bíme oletmoto.

⁵Buluke luyil-poyillok yéla bí Israel lokke roja Joram kíng lekola Siria roja Hajaelme Gilead lokke Ramoth doolunglo mimakko ito. Delo Joramme Siria kídíde tarí moketto.

⁶Depeila taríde géédokupe emla bí Jejreel amonglo gílat sugetoku, delo Ahajiah bím kangkolo delo among delo gíto.

⁷Ahajiahke Joramme kangkolo gínam deloge Shédíbí Ahajiahke oletkupenamem bomato. Bíkke delo duududem, bí Joram kíng lekope gílenla, Ahabke ekumem inyokdope RUUTUMke pídénam, Nimshike oo Jehume kaaríksuto.

⁸Delo edílo Jehubí Ahabke erangem kebang lubomla bisar ibomtodín, delo bí Judah lokke roja oo kídarem, delokke Ahajiahke bíro kídar lokke Ahajiah kíng aamín gena oo tabungdem bí kaaríksula pakayinto.

⁹Bí Ahajiahme matagoola, Samarilo duunyok gedungem bím umto, delo bíme Jehu kelo bomabilangkula bíme petto. Bulu bíme sikepe podola yuto, “Bí aapí arolok RUUTUM me matana Jehoshaphatke oten ue.” Delokke Ahajiahke erang loge sékoteng among deme ruutum bolana kamato.

¹⁰Edílo Ahajiahke ane Athaliahbí bík oo deme sidope kaatodín, delo bí Judah lokke roja edung-erang tabungem petyindope ukumlíkto.

¹¹Idokom miri Jehoiadake mime, roja lokke ome Jehoshebabí Ahajiahke oo Joashme petdakbonam roja oo alung ara delok bomnyokla, Kumkeng Ekum delokke ipkokolo bímlang narsko rumsupto. Bíme rumsupla, bíme Athaliahke alaglo sipekolokke bí mopítto.

¹²Athaliah amongdem ranipe ruutum bomdo delo, Joash bí Shédíke ekumlo dítak akkéko duunyok geto.