Read Alladian 2 ODONG 24 Bible Online

2 ODONG 24 - Alladian bible

2 ODONG 24

¹Joashke rojape ilendodem bí dítak kínídko ido. Bí Jirusalem amongdem takying appiko yéboto. Bíkke ane amíne Jibiah, bí Beersheba luune lokkeko.

²Miri Jehoiadake turdung tetedelo Joash bí RUUTUMke kaabanam agérem ibito.

³Jehoiada Joash rojame méng annyiko tombito, delokke bínyi bíme ome-uem obito.

⁴Rojape anyongko yéborongem bí Kumkeng Ekumdem mosi-momo kupe míílento.

⁵Bí miri, delokke Lebi kídarem gogdumsula bulum poto, “Judah lokke luune kídílo gígoola dítak dítaklo Kumkeng Ekum sim mosi-momo dokupe bidong abalem tabung Israel ami kídarlok laadum sulangka; delokke agérsim nolu menape ilangka.” Idokom Lebi kídí de agérdem menape igemato.

⁶Dekepe ikolok rojade miri kídílok ruutum Jehoiada me gogadola poto, “No kapeda Lebi kídíke, RUUTUMke béérang Mosike, RUUTUMke Tombu agérlo ilík penanape ami kídílok laapenam abalem Judah, delokke Jirusalem loge langgong manamem kaamangkan?”

⁷(Deemaruna mime Athaliah ke méélamlo gína kídíe Kumkeng Ekum delo bénala, deena ekurang kídí delok ayoko Baal uyume kumsunato.)

⁸Rojake lulíglok sondukko mogeyéla Shédíke ekum lokke angko lamgé luyulo melíkto.

⁹Delo bulu legang sim Judah lolang Jirusalem lo megong sulíkla, mipil-miyonge Shédíke béérang Mosike, mongku-mooruk amonglo kerayalumpe ulnam RUUTUM me bidong abalem bilangka emto.

¹⁰Delo tabung agér gérbona kídar elang ami kídíde ashérupe agí bidongem bomasula sonduk delo líkla bíídope líkdumsuto.

¹¹Loodíke Lebi kídíe sonduk dem rojake ullíknam agér géryana amilo bilíktoku. Edí-edílo sondukde bíítodín delo rojake sékétéri elang miri írneke lulígnamde sonduk dem irongpala, mekolo melat sulíktoku. Dekepeila bulu deddína abalem ulkumto.

¹²Roja elang Jehoiada bínyi abal dem Shédíme Kumkeng Ekum dem isi-simo pena ami kídar dem kaalík bopena ami delo bilíkto. Bulu ekum mistri, esing monyo ijingna, arem, delokke pitol yogmo kídídem ríkrap bolíkto.

¹³Takam agér gérna kídíde airupe gérla, menape Shédíke ekum dem kerangke akampe edíírupe iyintoku.

¹⁴Edílo isi-imo agér dem iyintodín, bulu ingong uun demlang baldíndem roja emlang Jehoiada kíng bitoku. Bínyi sime Kumkeng Ekum delokke peking-pesak, delokke abíd agér gérnana atope pínato. Jehoiadake yédung delo bulu agínpe romnam amanem Shédíke ekum delo bito.

¹⁵Delo Jehoiada mijing jira ila, longe gíyinla sikai. Bíkke sido delo bí dítak língko kolang takying angumko ido.

¹⁶Bíkke turdu delo Israelke ainam legape, Shédí keepe, delokke bíkke Kumkeng Ekumem airupe kaajin-tatjin bonam legape bíkke simang demte Dabidke doolunglo roja yupomlo yuto.

¹⁷Jehoiadake sirongdem Judah lokke ruutum kídíde Joash roja kíng aadumsula, bím mínggenam belengem ito; delo rojade bulum tatbito.

¹⁸Delo bulu RUUTUM buluke buku-nekuke Shédíke ekum dem mepakto, delokke Asherah uyuke mimang kídídem kumsulenkaku. Sikepe buluke paab imem sukolok bulukíng RUUTUMke marname pííto.

¹⁹Depe iduakom RUUTUM bí buluke aralo kaaluna miri kídíem melíkla, bulum takamem RUUTUM kíng pelbang dokupe pogomoto. Idokom ami kídíde tadíng bimato.

²⁰Delokrodem miri írne Jehoiadake oo Jekhariah kelo Shédíke Aide duulíkla, bí ami kídar kangkolo dagdula bulum poto, “Shédíbí sikepe podung, ‘Nolu kapeda bíkke lulígnamem ipéésula agíkelo atímangem bomasudun? Nolu RUUTUMme mepaknam legape, bíteng nolum mepakto.’”

²¹Idola bulu bím atímape míírep bomla, delokke roja Joashke lulíg kolok bulu RUUTUMke ekum kebang baapom delo elínglok bíme gekato.

²²Dekepe Joash roja Jekhariah ke abu Jehoiada ke bíme ayanamem míípasumape, bíkke uem petbito. Jekhariah bí siang dakla ulo gogdola poto, “RUUTUMbí nom kaala edoem radaklangka.”

²³Dítak delokke gíyin delo Siria lokke sipaying kídíe Joash me mimak magabomto. Bulu Judah lolang Jirusalemlo aala tabung miro ami kídarem petyinto. Dekepe igeyéla gaina sérang kídídem langkum geyéla Damaskaske rojalo meyin líktoku.

²⁴Siria sipaying kídíde anyongko aatuai, idokom RUUTUM bí buluke alaglo bottena maglíngko ikummoto, kapeila bulu RUUTUM, buluke neku-bukuke Shédíme mepaksuto. Sikepe Joash rojame bulu itung-iréto.

²⁵Edílo miru kídíde roja Joashme bojérupe tarí moketlíktula gínyo kakudín, delo bíkke béérang kídarde, miri Jehoiadake uem bíkke mokanam legape mirupe ruulenla, bíkke ketkolo pakalíkto. Dekepe bí sikai; bulu bíme Dabidke doolunglo yuto, idola bíme roja kídíem yupomlo yumato.

²⁶Bíme mirupe ina kídíe Ammon ami Shimeath ke oo Jabad lang Moab ami Shimrithke oo Jehojabad bínyi.

²⁷Roja kídílok dooying kitablo, Joash ke oo kídar lokke yédu-yétok dooyingem, bíme atímape lula polu-poornam kídíem, delokke Kumkeng Ekumem isi-simo kunam legang kídíem attung. Delo bíkke oo Amajiah bíme rojape yétíttoku.