Read Alladian 2 ODONG 26 Bible Online

2 ODONG 26 - Alladian bible

2 ODONG 26

¹Judah lokke ami tabunge, takying kolang takkéna Amajiahke oo Ujjiah me bík abuem rojape yétítdope ullento.

²Bíkke abu Amajiahke sirongem bí Elath em laalangkula luunedem kampope motoku.

³Ujjiahke roja ilendagem bíkke dítage takying kolang takkéko ito. Bí Jirusalemem takying pilngo kolang taknyiko ruutumpe iboto. Bíkke ane amíne Jekoliah, bí Jirusalem lokkeko.

⁴Bíkke abu Amajiah kapekisa itodín, dem kanggesula bíkom RUUTUMke kaabanampe agérem ito.

⁵Shédíme pesodola bíme poyilna Jekhariahke yédudelo bí Shédíme matato; delokke edíloope bí RUUTUM me matatodín, Shédíbí bíme edíng moto.

⁶Ujjiah roja Philistain em mimak ito. Bí Gath, Jamnia, delo Ashdod doolung lokke etor kídarem bénpakto, delokke bí Ashdod doolung anín lolang abíd Philistain among kídílo líísak yabgo etor kana luune kídíem molíkto.

⁷Shédíbí bíme Philistain kídíem, Gurbaallo duuna Arab kídíem, delo Meunit ami kídíem, mimak imínsuko loteng ikummoto.

⁸Ammon ami kídare Ujjiah me kajanangem bito, delokke bí yagorupe edíngla, bíkke ralnam angun-abédem Ijipt ami kídarete tatyinto.

⁹Delokke teyong loteng Ujjiah bí Jirusalemlo telokkai ina, mooteng lokkemte miru kídíem aabom dokom kanggong sunana tongiem Kéényung Lamgé lolang Yiibe Lamgélo, delokke etor bilkén kukolo mola, tabung yabgo etor dem edíírupe torgong sulíkto.

¹⁰Bí mongku-mooruk loteng mibo aayém kaatosuko kedonna tongidem molíkto, delo asi pukuriemte bojéko kooboto, legangde bí anggodan dííte lebe delolang among damying sukoloteng taroe bojéko kato, delokke bí arík ibinelang onggur arík ibina kídíe, dííte mopang delolang ardana among delo kato, kapeila bí kédéng dem ayato.

¹¹Midu-mimak ipe irusuna bottena maglíng koteng bí kato. Sokke legang tabungem bíkke atkumbona Jeiel lang Maaseiah bínyi, roja lokke ullíknam ruutum akon Hananiahke rumkínglo yéla atto.

¹²Maglíngdem 2,600 ko lulígna ruutume ito.

¹³Buluke aralo roja kepe, miru kídíem miga-miramrupe mimaklo pakmín supena sipayinge 307,500 ko kato.

¹⁴Ujjiah roja bíkke sipaying kídíem mimak tamkung, gíníng, arem dumlup, arem galuk, iyyiemla epugem, delokke lakpon elíng kídíem píbito.

¹⁵Jirusalemlo bíkke budii-bukan kana ami kídíde, tongi kídí loklang kéényung kídíloge epugemla dabu bottenem apna-genana eke píto. Bíkke amíne rego-kéényung takamlo byargooto, delokke bí Shédí kelok igul paanam legape yagorupe ralkai.

¹⁶Idola edílo Ujjiah roja edíí-sírítodí, bí míngkímsuto, delokke de bíme omap motoku. Bí Kumkeng Ekumlo gíla nampona nyotko runggulo namponem nyotlíkla RUUTUM bíkke Shédíme ipéésuto.

¹⁷Miri Ajariah lang miramruna íying píínyi miriko roja méélam delo gímínla,

¹⁸bíme luyang dola bulu poto, “Ujjiah! RUUTUM kelo no namponadem nyotlík lamang. Aaron kelok lenna miri kídí petom emin sim agér sim iladune. Sok deena alop sok gígéto. No RUUTUM Shédíke keralo imemto, delokke bíkke loge no utepooroem paayimayé.”

¹⁹Delo Ujjiah bí Kumkeng Ekum aradelo nampona nyotlíkko runggu ampeng delo namponem nyotlíknanako bomla dagdo. Bí miri kídardem yagorupe marbomto, delokke delopak Ujjiahke tukta delo tííd taríe buklenkai.

²⁰Delo miri írne Ajariah lang abíd miri kídarde bíkke tuktalo tííd tarí dem kaarongem, bíme menape Kumkeng Ekum deloge gígéé dokupe poto. Bí menarupe Kumkeng Ekum delok gílentoku, kapeila RUUTUM bí bíme ingééto.

²¹Bíkke kinam deloge Ujjiahke yénam attung dem deemang dakla yéto. Bí Kumkeng Ekum delo aalayimala, bí bíkke ekumsulo duusuto. Delokke bíkke oo Jotham rojake ekum erang teyolo kaala, among delokke ami kídíem ruutum bomto.

²²Amoj ke kaaluna oo Isaiahbí, Ujjiah roja ke yélen lokke ila yéyin loope ruutum yébonam legang takamem atkumto.

²³Ujjiah sila bíme roja kídarem yuko golunglo yuto. Idola bíkke tííd genam legape roja agolo yumato. Bíkke oo Jotham bíme rojape yétíttoku.