Read Alladian 2 ODONG 28 Bible Online

2 ODONG 28 - Alladian bible

2 ODONG 28

¹Ahajke rojape yélendo delo bíkke dítage takying annyiko ido, delo bí Jirusalemem takying kolang takkéko ruutum boto. Bí bíkke buku Dabidke aina yéduem kangge sumape igeyéla, ingkue RUUTUMke kaabamanampe itodí dem ilatla,

²Israel roja kídíke yédulok yémín geto. Bí aremlok Baal uyuke mimangem pípala,

³Hinnom Yiibelo bíkkíng namponem nyotlíkto, delokke bíkke agí oo kídar emteng uyu mimang kídídelo, Israel ami kídíke aabomdagem RUUTUMke kerang kerang mon-gé binam ami kídar delokke belumrupe inamem kanggesula, romnam amanpe romlíkto.

⁴Uyu kumpom kídídelo, dííte kídí delo, delokke esing bottena rumkíng kídílo Ahajbí ipak amanem bila namponem nyotlíkto.

⁵Dekepe ikolok RUUTUM bíkke Shédí bí bíme Siria amonglok rojake alaglo bilíkto. Bí bíme ikumla bíkke ami kídíem bojéko umla Damaskaslo bomatoku. Bíme Israel rojake alag looteng bilíkla bíme ikumla, deddína amiem bulu petpakto.

⁶Longe lotello Remaliahke oo Pekah bí Judahlo miram runa amiem 120,000 ko petto, kapeila bulu RUUTUM, buluke buku-nekuke Shédíme mepaksuto.

⁷Delo Ephraim lokke Jikri emnam miramruna sipayingkone, Ahaj rojake oo Maaseiahme, delokke roja ekumem kaabomna lokke ruutum emlang bím nítmín gena Elkanahme pakato.

⁸Israellok ami kídíde agí ami Judah kídíke mime kídíem, oo kídíem, delokke ome kídíem 200,000 ko umla, deddína ekuserang emte langkutla Samari amonglo bomatoku.

⁹Depeido delo RUUTUMke kaaluna miri Oded emnamko Samarilo kato. Sipaying kídíde Samarilo aalat sudokudem bí bulum kaarík sukape gídola, bulum poto, “Kaatola, Judah kídí teyolo RUUTUM noluke neku-buku kídíke Shédíbí aklíngla, bí noluke alaglo bulume bilíkto. Idola noluke bulum itung-iréla petpak- petyaknam adudde teyong amonglo píngkai.

¹⁰Delokke supak nolu Judah lokkelang Jirusalem lokke ami kídíem mime-milope noluke abílpe bomlídung. Nolu RUUTUM noluke Shédíke keralo paab imanía? Supak ngok ponamem tatgap tola! Noluke umnam agí ami kídíem nolu melat sulangkuka, kapeila RUUTUMke pesorunam marname noluke teyolo kadung.”

¹²Ephraim lokke ruutum appi: Jehohananke oo Ajariah, Meshillemothke oo Berekiah, Shallumke oo Jehijkiah, delo Hadlaike oo Amasa buluteng mimak ipala angkuna sipaying kídíke inam dem akla,

¹³bulu poto, “Noluke patek umnam kídídem so aabo kumapeka! Ngolu kerapekai ngolum ingéédope RUUTUM ke keralo paab ila marmotubong. Supak ngoluke imemem bojéyadope emlangía nolu sikepe idune?”

¹⁴Dekepeila sipaying kídarde patek sonam kídídem, delokke langkamnam ato bomang kunam tabungdem, ruutum appi delo, tabung ami bampom keralo melen bitoku.

¹⁵Delokrodem midum appideme umnam kídídem, langkamla bomang kunam ege-galuk delok ordope ullíkto. Bulu ami kídídem ege-galuk, leyug kídíem gedope, dope-tíípenamem kanampe bila, delo buluke tarí-tapelo Olib télem mollíkto. Gíkén suyimana kídarem bulu gado kídílo duumola, umnam takam dem Judah among lok pam esing kídílok luune emnam Jeriko luunelo gílíktoku. Delo Israel ami kídíde agí ekumpe Samarilo aalat sutoku.

¹⁶Dekepe ido delo Ahaj roja bí Assiria lokke rojaem igulkope ami melíkto.

¹⁷Legade Edom ami kídíe Judah amongdem mimak iyang bomlangkula bojéko amiem patekpe sobom kaku.

¹⁸Depe ido moodípak delo Philistain ami kídíete Judah among lokke anggodan dííte lebe kídí lolang sokkodan Judah doolung kídardem línga bomto. Bulu Beth Shemesh, Aijalon, delo Gederoth, delokke Soko lokke luune kídarem, Timnah, delokke Gimjo lokke doolung kídarem laala, delo duulík bomto.

¹⁹Ahaj rojabí Judah lokke ami kídíem aimana bedanglok gíbonam legapelang RUUTUMme mitpan sunam legape RUUTUM bí Judah teyolo adírem bomato.

²⁰Assiria rojade, Ahaj rojame iguldumem bím akla adírem bito.

²¹Dekepe ikolok Ahaj rojabí Kumkeng Ekumlok, roja ekumlok, delo ami kídíke ruutum kídí ekumloge, uunem laadumsula Assiria rojadem bito, idola dekede bím igul lamato.

²²Edílo ebín-esone mangkam yatodí, delo Ahaj roja RUUTUMme pakyangko ipéésuto.

²³Bí bíme ikumna Siria kídíke uyu kídarem ipak amanem bila, sikepe poto, “Siria ami lokke uyu kídare Siria rojaem ikummoto, dekepeila ngokom bulum ipak amanem ilíkmílo, ngomteng bulu igulyépe.” Si bíkke teyololang bíkke yébomnam ami teyolo loorímangem bomato.

²⁴Dekepe iko teyolo, bí Kumkeng Ekum delokke peking-pesak takamem laadumsula, pamíkto. Delo bí Kumkeng Ekumdem sitkapla, Jirusalem lokke rego kéényung takamlo ipak rungguem molíkto.

²⁵Judah lokke luune lolang doolung miyonglo mibo lokke uyu kídíem namponem nyotlík bidope, bí uyu kumpom kídíem ilíkto. Sikepe ila bí RUUTUM, bíkke buku kídíke Shédíke marnamem agíe laalíksuto.

²⁶Bíkke yélen lokke ila yéyin loope idu-satok takamem, Judah lokkelang Israel lokke roja kídíke dooying kitablo atkumtung.

²⁷Ahaj roja sila, bíme Jirusalemlo yuto, idokom bíme roja yupom agolo yumato. Bíkke sirodem bík oo Hejekiah bí rojape yébotoku.