Read Alladian 2 ODONG 29 Bible Online

2 ODONG 29 - Alladian bible

2 ODONG 29

¹Hejekiahke roja ilen delo bíkke dítage takying annyi kolang takngoko ido. Bí takying annyi kolang dítak konangko Jirusalem em rojape yéboto. Jekhariahke ome Abijah bí bíkke ane.

²Bíkke buku Dabid rojake yédupe yémín gela, bí RUUTUMke kaabape agérem gérto.

³Yétí-yégo dítak delokke kerayalum poolo delo Kumkeng Ekum lokke sittumla menam eyab kídídem bí siyyatoku, delokke dekedem mosi-momo penamem motoku.

⁴Bí miri kídí loklang Lebi kídíeke opééko Kumkeng Ekum delokke sanggodan kebang baapom delo laadumsula,

⁵delo bí bulum poto, “Lebi kídar nolu, ngokke agomem tatgaptola! Nolu supak agíem ideesupala, RUUTUM noluke buku kídíke Shédíke Kumkeng Ekum sim ideelangka. Kumkeng Ekum sim deemamona atí takamem sokke laabín langka.

⁶Ngoluke buku kídíde RUUTUM, ngoluke Shédíme mepaksula, bíkke kaabamanam agérlo gértíto. Bulu bíme mepakla, bíkke dungkoem migmoe ngépak gela dakkur geto.

⁷Bulu Kumkeng Ekum lokke eyab kídarem sittum tumyinla, lém emte mitrom mola, delokke arí namponem nyotlík mato, demangkom abíd romnam amanem RUUTUM Israelke Shédíke Kumkeng Ekum delo romlíkmato.

⁸Dekepeila Judah, delo Jirusalemlo RUUTUMke marname aato, delokke bulukelo bíkke inamde takamem míngkén-mííyén moyimape pesomoto. Sime nolu airupe kéndung.

⁹Ngoluke abu kídarem mimaklo petyinto, delokke ngoluke méng kídíem, delokke ome-oo takamem pateklo soyin bomkaku.

¹⁰“Supak ngokke aapílo ngo RUUTUM, Israelke Shédí kíng Daapongko, ngoluke teyonglok bíkke marlínge gípak dokupe ibosupe míídung.

¹¹Ngokke oo kídía, supak lokke bíme míngge-saggemape íyimapeka, kapeila RUUTUM bí bíkke keralo dagla, bím agér gérbila, bíkke agérem gérbina kídípe, delokke bíkkelo namponem nyotlíkdope nolum ullen sutung.”

¹²Rumkíngke Lebi kídísi delo kato: Kohath eranglok, Amasaike oo Mahath lang Ajariahke oo Joel; Merari eranglok, Abdike oo Kish lang Jehallelelke oo Ajariah; Gershon eranglok, Jimnahke oo Joah lang Joahke oo Eden; Elijaphanke eranglok, Shimri lang Jeuel; Asaphke eranglok, Jekhariah lang Mattaniah; Hemanke eranglok Jehuel lang Shimei; Jeduthunke eranglok, Shemaiah lang Ujjiel.

¹⁵Si ami kídarsi agí-agí Lebi bíro kídarem laadumsula, bulu takame dormo ayonlok ideengsuto. Delokrongem bulume roja delokke lulígnampe, Kumkeng Ekum deme RUUTUMke ayon idonglok, ideengkunam agérem ilento.

¹⁶Miri kídíde ideengkupe mííla Kumkeng Ekum aradelo aala, delokke bulu deemana ekurang takamem ekum delokke luyu gíídang delo joolento. Deloge Lebi kídarde jooyonsula takam deme luune delok luyulo Kidron Yiibelo mepaktoku.

¹⁷Ideengkunam agérde kerayalum poolo lokke kerayalum longe delo ilento, delokke bulu píínyinana longe delo Kumkeng Ekum delokke aatak emteng ila, bulu takamem iyinto. Delokrongem bulu méélamke longe píínyi demteng Kumkeng Ekum delo kumsu badokupe, agérlo gértíla poolo delokke looying kolang longkénana longe deloope gérlík bosuto.

¹⁸Depe igeyéla Lebi kídíde Hejekiah roja kíng gíla pokanto, “Ngolu Kumkeng Ekumem tabungpe, romnam aman romkeng rungguem, deena ettíngem mekeng tébulem, delokke sokke abíd ekuserang takam itaksula ideengtoku.

¹⁹Ngolu Ahaj rojake, Shédíme mepaksula yédungem, edítko ekuserangem bomnyoktokuadí, dem takam laalat suyintoku, delokke ngolu dekedem anípe kumlíktoku. Si tabung si RUUTUMke runggu keradanlo kadung.”

²⁰Delo Hejekiah roja rokomope gerepla, luune delokke ruutum kídarem laadumsula, lekope Kumkeng Ekum delo gíbosuto.

²¹Delo roja erang kídí kelang Judah ami kídíke paabem laapak kunam legape, delokke Kumkeng Ekum dem ideengkunam legape amanpe, bulu rubo kínídko, mérbo kínídko, méro kínídko, delo bénbo kínídko bomla gíto. Rojade Aaronke otíng lokke miri kídídem, taro kídardem runggulo amanpe palíkdope lulígto.

²²Miri kídíde kerayalumpe rubo kídardem, delokrongem mérbo kídardem, dekepe irongem méro kídardem pala, panam takam lokke iyyiloge laala ipak runggu delo kuujénglíkto.

²³Dekepe irongem bulu bénbo kídar deme roja kelo, delokke kumsupe bamdumsuna delo paab ipak amanpe bomala, tabunge bénbo kídar teyolo alage pijémto.

²⁴Delo miri kídíde bénbo kídardem pala, ami takam delokke paabem laapaknana amanpe, delok iyyiem runggu delo pílíkto, kapeila rojade romnam aman kídí emlang paab ipak amanem tabung Israel legape bidope ukumlíkto.

²⁵Lebi kídídem RUUTUMke ekum delo lupiyang, harp, delo layar tapung kídíem bomla, Dabid kelang bíkke kaana miri Gad, delo kaalu miri Nathan buluke lulígnampe, bí duumoto; kapeila sim lulígnam sim kaalu miri kídílok pokela RUUTUM bí poto.

²⁶Lebi kídíde Dabidke mobinam tapung kídídem bomla, delokke miri kídíde bikul tapung kídíem bomla dagto.

²⁷Delo Hejekiah romnam amandem ipak runggu delo romlík dope lulíkto. Delo edílo amandem romlentodín, ami kídíde yidge miriem lula, tapung ibona kídíde bikul tapung kídí emlang abíd tapung kídí demte ilíkto.

²⁸Dumsuna takame delo kumsuto, delokke miri lubone luto, delokke bikul mutbone mutboto; sikepe romnam amanem biyinmang tetedeloope bulu ilíkto.

²⁹Edílo romnam aman dem biyintodí, delo roja delang bíkkelo yémín gena mipil miyongde lebíng-kooníng dola Shédíme kumsuto.

³⁰Delo Hejekiah roja lang bíkke abíd ruutum kídíde Lebi kídardem Dabid kelang kaalu miri Asaphke atbonam yitge mirilok RUUTUMme yitge-rínggedope lulígto. Dekepe ila bulu takame gubla Shédí me kumsudola ashérupe miriem lubosuto.

³¹Delo Hejekiah poto, “Supak nolu agísuem RUUTUM kelo ideeng sutoku, iname so ipak aman emlang yitge aman kídíem bomalangka.” Delo ami kídíde ipak aman kídí emlang yitge aman kídíem bomato; delokke séko buluke aapílo bilíngpe míísutodín, bulu romnam aman kídíemte bomato.

³²Romnam amanpe milung delok bomaname ruboe íying kínídko, mérbo língkoko, méroe líínyiko; si tabung si RUUTUM kepe romnam aman kídíe.

³³Bulu ipak amanpe bila ami kídíe dodope rubo língko akké kolang mér éjar angumko bomato.

³⁴Idola romnam aman takamdem pape-ipena mirie anyonam legape, abíd miri kídare agíem ideeng sumangada delo buluke Lebi bíro kídare, agérem iyin looríloope bulume igulto. (Lebi kídíe miri kídíem pemílo dormo ayonlok ideeng sunamem bomgap suyadungai.)

³⁵Deddína romnam aman binam teyong deloteng ipak amanpe bila ami kídíke donam delokke oobem romlíkpenam delang romnam amanlo lekope itak supenam onggur alang emteng purlík penamde buluke ipenampe ito. Sikepe Kumkeng Ekum delo kumsunam agére lekoda ilentoku.

³⁶Sim ato kídí sim Shédíbí igulla menape iyin moto emla Hejekiah roja lang tabung ami kídare ashébosuto.