Read Alladian 2 ODONG 3 Bible Online

2 ODONG 3 - Alladian bible

2 ODONG 3

¹Solomon bí Shédíme Kumkeng Ekumdem Jirusalem lokke Moriah Díítum emko delo molík lento, de bíkke abu Dabid rojame Shédíke lengkan sukue. Si moolop si Dabid rojake renam Jebus ami Araunahke géhu yikkole.

²Bíkke dítak appi nape ruutum yégedo delokke poolo annyi lokke longe annyinana delo ekumdem molen yalum geto.

³Shédíme Kumkeng Ekumpe Solomon rojake moge líknamde bodonge 27 mitarko, delokke apee 9 mitarko ido.

⁴Aranglok aatak dandem ekum bortak akampe moto. Kíkíname 9 mitarko ido, delokke kedone 54 mitarko ido. Ekum arang delo arorung uun loge kyamtemlíkto.

⁵Bottena pírtekdem bí sidar siipang loge kyarepe replíkto, delo siipang teyong delo kamporupe uun loge pokap líktoku, delo pam esing loge íkoli kísape kokyon sulíkla kamporupe ilíkto.

⁶Rojade Kumkeng Ekumdem Parbaim amonglok langaanam are kana kamporuna elíng, delokke uunlok leemo líkto.

⁷Delo bí ekum delokke baarelo, gaanglo, suppilo delokke eyab kídílo uunloge ilíkto. Bí ekum suppi loteng Serubim emteng kamporupe uunloge ilíkto.

⁸Arang pírtek dan Deeya Yalumna Moolopde bodonge 9 mitarko, apee 9 mitarko ila bodonge lang apee kídí suto. Deeya Yalumna Moolopdem íying annyi métrik ton ujon nako uunloge suppi kídarem kyamlíkto.

⁹Kilogram pilngo kolang íying kíníd gram uunko kilipe pítlík nadope, delokke teyong yangke pírtek demteng uunloge ilíkto.

¹⁰Rojabí bíkke agér gérna ami kídídem, “Shédíke mite ralname duumíndung,” emla kangkén nana Serubim dem annyiko píla uunloge kyamlík geyéla Deeya Yalumna Moolop delo melíkdope políkto.

¹¹Dem Serubim annyidem aatak danlo arotkon lolang arotkonlo ngéérík sula dagdope molíkto. Alap annyi asak de kato, alap atel lok bodonge 2:2 mitarko ido, de raadang pírtek loope buluke alap dem tamrík sumoto, delokke arotkon lokke arotkon suppiloope píídope 9 mitar apoldem tambomdope ito.

¹⁴Deeya Yalumna Moolop dem donkap nanape bí yamuk, yamong, yalíngna morí kana egelok omla, delo Serubim mimangdem ilíkto.

¹⁵Kumkeng Ekum delokke keralo rojabí gaang annyi koteng díílíkto, delokke annyi delokke idumsue bodonge mitar íying kolang akkéko ido. Gaang delokke teyonglo sangonnam asakpe bodonge 2:2 mitarko ido.

¹⁶Bí koosi-kongkel lokla pitollok língkoko dalim ayéem píla, gaang teyong delo políkto.

¹⁷Bí gaang dem ekum gíídang delo díílíkto, akondem sokko danlo, delokke akon dem línggíng danlo. Sokko danke dem bí Jakhin emto, delokke línggíng dankedem bí Boaj emlíkto.