Read Alladian 2 ODONG 30 Bible Online

2 ODONG 30 - Alladian bible

2 ODONG 30

¹Hejekiah bí tabung Israel delo Judah amonglo agom bigooto, delokke Ephraim emlang Manasseh kídaremte shiti bila Jirusalem lokke Kumkeng Ekumlo RUUTUM, Israelke Shédí kelo Gíbong Gíídíem ikolo aadumsudope tomto.

²Kapeila roja delang bíkke ruutum kídíde, delokke Jirusalemlo dumsuna ami tabungde pobosula Gíbong Gíídídem poolo annyinana delo loodum bosudope lubosuto.

³Bulu sime idí moodí ilabosumato, legade ideeng suna miri kídíe anyoto, delokke ami kídíete alumpe Jirusalemlo gídum sulamato.

⁴Sikepe kebang lubosunam sim roje lang takam duudumsuna kídíde lujibosuto emla mííto.

⁵Dekepeila bulu tolík bosula Beersheba lokke ila Dan among loope kobor megong líkla, RUUTUM Israelke Shédíme rínggenape Gíbong Gíídíem loodumdope Jirusalemlo tabung amie aadope pogooto, kapeila bulu sime ayonlo atkampe milu-mibampe loodum kíyimang.

⁶Kobor bigoona ami kídare roja kelang bíkke ruutum kídíke lulíglok tabung Israel lolang Judah among kídílo rumkíngke tomnam kakot sim bomla gígooto: “Israel ami kídía, nolu Assiria kídíke among sime mimak aabomnam lok mopísula duudung. Supak RUUTUM, Abraham, Isaak, delokke Jakobke Shédí kíng aalat sutolangku, delo bí nolukíng aalatsuyéku.

⁷Noluke buku-neku kelang noluke Israel aní-bíro kídíke, RUUTUM buluke Shédí kelo míngke suyimape mepaksunam kísape nolu imapeka. Nolu agísue bulum séngérupe ingéénamem kaasuto.

⁸Buluke kísape mikép mapeka, idola RUUTUMke ponamem tatlangka. RUUTUM noluke Shédíke agín legape deemokunam Jirusalem sokke Kumkeng Ekumso aalangka, delokke bí nolukelo maryimadope bíme so kumsulangka.

⁹Nolu míílat sukumílo noluke edung-erang kídarem umla pateklo líkna ami kídíe bulume ayala, bulume ekumlo aalat sumoyéku. RUUTUM noluke Shédí bí midamrupe ayang runako, nolu bíkkíng aalat sukumílo, bí nolum toríksuyéku.”

¹⁰Dekepeila kobor bigoona kídíde doolungkon lokke doolung konlo, Ephraim lolang Manassehlo, delokke línggídanlo mootengrupe duuna Jebulun loopekai pokan gooto. Idokom ami kídíde bulum ngilkala lupu-luléla ito.

¹¹Petom ami boséngooko Asher, Manasseh, delokke Jebulun erang loge agíem mínggípsula, Jirusalemlo aato.

¹²Shédí bí Judah kídílo agér gérla, ami kídíke aapíem lekomola, bíkke míínamem igedope, roja kelang ruutum kídíke lulígnamem igedope imoto.

¹³Poolo annyinana delo deddína amie Jirusalemlo, Siiyé líkmanam Ettíng Gíídídem loodum bosupe gídum suto.

¹⁴Bulu Jirusalemlo ipak ilíkla, delokke arí namponem nyotlíkko runggu takam dem laabínla, dekedem Kidron Yiibe delo elpakto.

¹⁵Delo poolo annyinana delokke looying kolang loopinana delo bulu Gíbong Gíídíke mérdem pato. Delo miri kídíelang Lebi kídíe dormo ayonlok deemala bulu annying paato, dekepeila bulu agísuem ideengsula, romnam aman kídíem Kumkeng Ekumlo bomabito.

¹⁶Shédí ke ami Mosike ayonlok bulu agí-agí agér yédongem yébomsuto. Lebi kídíke alaglok iyyidem miri kídíde laaríksula runggu delo kuujéng líkto.

¹⁷Kebang delo dumsuna ami kídar delo bojéko agísuem deesu-aasumane kato. Deke legape Lebi kídíe Gíbong Gíídí lokke mér kídí deme deemana mipil-miyong legape RUUTUM kelo deenampe ilíkdope emla pabito.

¹⁸Delok teyolo Ephraim, Manasseh, Issakhar delo Jebulun opín loge aana alume agísuem ideeng sumape, deemang-amola Gíbong Gíídídem loodumto. Dekepe ila Hejekiah roja bulukepe sikepe kumbito:

¹⁹“E RUUTUM, ngoluke neku-bukuke Shédía, nokke ainam akorlok, nome arorupe aapí takamloge kumsuna kídíem, nokke ayon loge bulu deemang-amo dagakom, ayasula no maab bidoika.”

²⁰Hejekiahke kumnamem RUUTUM bí tatbila ami kídídem ipíítoku.

²¹Israel ami kídíde ashéng-angamrupe Siiyé líkmanam Ettíng adeng-apedem longe kíníd kokai Jirusalemlo loodum bomto, delo Lebi kídíe lang miri kídíe loodí-loodíem buluke ralnam takamlok RUUTUMme miri lok yidbang sanggeto.

²²Delo Lebi kídarke aipe RUUTUMke agérem gérnamdem kaala Hejekiah roja bulum yitgela luerto. Dekepe ami kídíde longe kíníddem, eetet aman kídíem bila delo RUUTUM, buluke neku-bukuke Shédíme yidgedola adeng-ape domanem dobo-tííbosuto.

²³Delo tabung duudumsuna ami kídíde longe kíníd konkoteng adeng-apedem loodumdope tolík bosutoku; depeila ashérupe longe kínídkon koteng ami kídarde ibosutoku.

²⁴Hejekiah roja, duudumsuna ami kídí deme rubo éjarko, delo mér éjar kínídko amanpe bito. Delo kebang ruutum kídíde rubo éjar kolang mér jaryingko amanpe bito. Delo deddína mirie agísuem ideeng suto.

²⁵Dekepeila Judah lokke ami kídí, miri kídí, Lebi kídí, línggíng danloge aana Israel ami kídí, delokke Israel lolang Judahlo agín kepe duuyarlíkna mibo ami kídí takame ashéng-angamrupe ibosuto.

²⁶Jirusalem luunede yagorupe ashéto, kapeila Dabidke oo Solomon rojake longe delok ila sikena longe lekokom kakíyimangai.

²⁷Miri kídídelang Lebi kídíde RUUTUMke utepooroem ami kídíke teyong lo bidope kumlíkto. Teyong among bíkke ekumlo duudula Shédíbí buluke kumnamem tatla torík subito.