Read Alladian 2 ODONG 31 Bible Online

2 ODONG 31 - Alladian bible

2 ODONG 31

¹Adeng-apedem iyinrodeme, delo duuna Israel ami kídíde Judah lokke doolung miyonglo gíla elíng gaang kídíem dempen-demrenla, uyu mime Asherahke mimang kídíem patu-payula, ipaklíkko runggu kídí emlang uyu kumpom kídíem líípak biyinto. Bulu sok akampe Judah lok abíd among kídarlo, delokke Benjamin, Ephraim, delo Manasseh among kídarlo igooto; depeirongem Israel ami kídarde agí doolunglo aalat sutoku.

²Hejekiah rojabí miri kídí delo Lebi kídarem opéé-opéépe agí-agí agér tarong kanam kebangem anípe ilíktoku. Buluke agér kídare si: romnam amanem ibonam, eetet amanem bibonam, Kumkeng Ekumlo kumsukolo kaalíknam, delokke Kumkeng Ekum delokke lamgé kídílo yidge-ríngge bonamde.

³Rojabí agíke mér alung loklang rubam deloge romnam amanpe rodíke, delokke yumdíke, delokke Sabbathlo bipenam, Poolo Karsing adeng-apelo, delo RUUTUMke ayonlo igedope atlíknam abíd adeng-ape kídí takamlo bito.

⁴Sok kékonlo, rojade Jirusalemlo duuna ami kídardem miri kídí, delokke Lebi kídíe agíem, RUUTUMke ayon agérlo apíngpe igeladope, buluke paapenam tarong kídíem bidope lulígto.

⁵Depe lulígpak rongem Israel ami kídare kanampe ali-ayé lokke len-genem, onggur alangem, olib télem, ngutlangem, delokke arík loge lenkína tabung loge amanem bidumsuto; delokke bulu buluke kanam takam lokke íying sanpek emteng bibosuto.

⁶Delo Judah lokke luune kídarlo duuna Israel ami, delokke Judah ami takame, buluke rubam kídí, delo mér alung kídí lokke íying sanpegem bomato, delokke RUUTUM buluke Shédíme tolíksula biman supe binam aman kídídem bomala, tenondope mekumto.

⁷Poolo angumnana delo bulu pangkum lenla poolo kínídnana delo bulu iyinto.

⁸Edílo Hejekiah roja lang bíkke ruutum kídíde deddípe bidum sunam amandem kaatodí, delo bulu RUUTUM me, delokke bíkke ami Israelem yitgeto.

⁹Delo Hejekiah bí miri kídí demlang Lebi kídídem tenondope pangkumnam aman delokke legangem íngkíto.

¹⁰Jadokke otíng miri írne Ajariahbí bíme poyansuto, “Buluke amanem Kumkeng Ekum so bomalen delokke ila dopename bojéko kakaku, delokke dongat eteng bojéko kadung, legade RUUTUM bí bíkke ami kídíem utepooroem bitung, dekepeila sikepe mekumdope idung.”

¹¹Delo Hejekiah roja ami kídídem Kumkeng Ekum dunggong delo kumsung loge molíkdope lulígto; delo bulu molíkto.

¹²Delo bulu míngkeng aapíem gela bidumsunam aman kídíem, íying sanpek kídarem, delokke tolíksunam ekurang kídíem aipe mesiilíkto. Bulu Konaniah emnam Lebi amiko kumsung dem kaabomna ruutumpe, delokke bíkke bíro Shimeime bím igulnape ullíkto.

¹³Bínyike aralo agér gérdope Lebi ami midum íying parlíknam kídíe: Jehiel, Ajajiah, Nahath, Asahel, Jerimoth, Jojabad, Eliel, Ismakhiah, Mahath, delo Benaiah. Sim tabung sim Hejekiah roja kelang miri írne Ajariahke ilík bonamlok ito.

¹⁴Kumkeng Ekum delokke Sanggo Lamgé dem dagbomna kídílok ruutum, Lebi ami Imnahke oo Kore bí aman binamem laarík suna kídíke ruutume, delo dekedem bí orbodungkuai.

¹⁵Miri kídíke dungko luune kídílo, bíme míngkeng aapíem gela si Lebi kídísi idumsuto: Eden, Miniamin, Jeshua, Shemaiah, Amariah, delo Shekaniah. Bulu donamem buluke Lebi aní-bíro kídarlo buluke yébom dunam agér akorlok orto,

¹⁶delokke erang-erangpe imato. Bulu takying angumnalok ila mineyang milokongem, séko bulu Kumkeng Ekumlo loodíke agér gértodí, bulum buluke agér yébomnam akorlok tarongko bito.

¹⁷Miri kídídem erang-erangpe agér ipenamem parlíkto, delokke takying annyinalok ila mineyana Lebi kídídem agér akorlok opéé-opéé parlíkto.

¹⁸Bulum takamem buluke méng kídí, ome-oo kídí, delokke abíd edung-erang kídí tabungem lekope atla mekumto. Legade deena agérem ingkona moodí loteng gérbodope bulu irungsula duupe aito.

¹⁹Miri kídí aralo séko bulu Aaronke otíng-oyin kídílo orlíknam luune kídílo, demangkom sok luune kídí sokke neyi-neyang kako amonglo duududín, buluke aralo míílíknam ami kídareke miri erang kídí lokke milokongem, delokke Lebi eranglo atlíknam takamem, donam-tíínam orlíkboneke kato.

²⁰Judah among takamlo Hejekiah bí ingkue arola aitodí deme ito, delokke RUUTUM bíkke Shédíke kaabanamem ito.

²¹Delokke bíkke Shédíme matala ayon, delokke lulígnam akorlok Kumkeng Ekum legape bíkke agér gérnamlo bí aapíe apíípe tolíksula gérkolok, bí ipíng laayinto.