Read Alladian 2 ODONG 32 Bible Online

2 ODONG 32 - Alladian bible

2 ODONG 32

¹Hejekiah rojake RUUTUMme arorupe míngkesudola tabung agérem iyinro delo Assiria roja Sennaserib Judah amongem mimak iyala, yabgo etor luyulo notko ilíkla duulíkto. Bí bulum ikumla doolung dem bíkke aralo duumope míítuai.

²Edílo Hejekiah roja bí Sennaseribke Jirusalem lo mimak ipe em aanamem kaatodí,

³delo bí bíkke doolung ruutum kídíemlang miramna ami kídarem lekope doolung luyudan lokke sirung kídídem petjindope pobosuto, delokke bulu bíme igulto.

⁴Deddína mití-maglíngko gídumsula, bulu among deloge sirung kídí, delokke roojik tokna takam dem pettumdola poto, “Assiria lokke roja kídíe ingkopeda so aala deddína asiem paapope paayén?”

⁵Bí agérlo lulígla yabgo etor bénna kídíem moreplangkula, dekedelo tongi kídíem molíktoku, delokke kerangke etor luyudan loteng etorkonko tortemtoku, delokke bí Dabidke doolung lokke Millo [1] em edííyadope ilíktoku. Bí deddína gíníng emla tamkung kídíemteng píto.

⁶Bí luune delokke ami takamem sipaying ruutum kídí aralo melíkla bulum luune delokke lamgé aatakke mooyako delo aadum sudope ukum líkto. Delo bí bulum poto,

⁷“Rallangka delokke aapíe mííduk langka. Nolu Assiria roja lokke maglíngem kaala, ngolum ikumdak emla anyong kokom míímésula peso aapí kamapeka; kapeila bíkkem pemílo botteyanako ngolukíng kadung.

⁸Bíkkelo dínbíng gena sipaying petom emin kadune; idokom ngolukíng RUUTUM ngoluke Shédíbí ngolume igulpe, delokke ngoluke mimak kídíem magbipe emla kadung.” Hejekiah rojake agom kídíem ami kídíde tatla aapíe botteto.

⁹Méélamdem Assiria roja Sennaserib lang bíkke sipaying kídare Lakhish among delo duudung adape, bí rumkíngke atnam legang pokan sim Hejekiah melang bíkkíng Jirusalemlo duuna takam Judah ami kídílo melíkto:

¹⁰“Ngo, Assiria roja Sennaserib íngkídung; íngkona legangeda ami kídí nolum aapíem bottemola Jirusalem dem motumsula duuyé emla míísumodun?

¹¹Hejekiah bí Assiria rojake alag loge nolum RUUTUM noluke Shédíbí mopítyé emla pobodung, idokom Hejekiahbí nolum menam agom podung, delokke bí nolume keno loklang tíílínglok siyinmoyé.

¹²Hejekiah min RUUTUMme kumpom kídíemlang runggu kídarem líípakla, Judah ami emlang Jirusalem ami kídíem runggu merom atel kolo nampona aríkana amanem romlík dola kumsudope pobonade.

¹³Ngokkelang ngokke buku kídarke abíd among yéta kídí lokke ami kídíem inamem nolu kénmanía? Assiria roja ke alaglok abíd kon uyu kídare buluke ami kídíem mopítonía?

¹⁴Edíloda delok among kídí delokke uyu kídílok akone buluke among kídarem ngoluke alag loge mopít kíton? Demílo ingkueda nolume noluke Shédíbí ngokke alaglok mopítyé emla míímodun?

¹⁵Dekepeila Hejekiahme yatko sumapeka demangke sikepe nolum gímem bokosumapeka. Bíkke ponamem arope míímapeka! Assiria rojake alag loge ingkona among lokke uyuete supakloope agí amiem mopít sulamang. Dekepe aropakde noluke Shédíkom nolume mopít lamayé!”

¹⁶Assiria lokke ruutum yébona kídíde pakyape RUUTUM Shédí melang bíkke béérang Hejekiahme lukang luyéto.

¹⁷Delo bí RUUTUM Israelke Shédíme atímang políkpe, delokke lupu-lulépe shitieketeng bí sikepe atto, “Ngokke alag loge abíd among lokke uyu kídare kapekísa buluke amiem mopít lamatodí, dekepe Hejekiahke Shédí kom bíkke ami kídarem ngokke alag loge mopít lamayé.”

¹⁸Ruutum yébona kídíde Hibru agompe gogyingpe sime goggola, yapgo etor teyolo duuna kídar Jirusalem ami kídarem pesomola, mínggíp sumodola, luune dem somupe laaladope emla ito.

¹⁹Delokke bulu Jirusalemke Shédíke legangem, bulu ami kídíke alaglok pílen sunam abíd among lokke ami kídíke uyu kídar kísape pogong geto.

²⁰Delo Hejekiah roja lang Amojke oo kaalu miri Isaiah bínyi sok legape Shédíme kumsudola gogtongla bíkke igulem matato.

²¹Delo RUUTUM bí Assiria sipaying dungko delo teyong kotokiko melíkla, tabung miramna sipaying delo ruutum yébona kídarem petpakto. Dekepeila Sennaserib bí annying alongla agí amongpe enlat sukaku. Delo edílo bí bíkke uyuem kumsuko ekumlo aatodín, delo bíkke oo ayokone bíme delo yoksalok pakato.

²²Sikepe RUUTUM bí, Hejekiah melang Jirusalem ami kídarem, Assiria roja Sennaserib ke alag loklang buluke abíd miru kídílok mopítto; delokke bí bulum kéényung-rego takamlok eetetnamem bito.

²³Delo deddína amie RUUTUM me Jirusalemlo amanem bomabito, delokke are kanarung ekurangem Judahlok roja Hejekiah kíng bomato, dekepe delok moodí delok ila takam among keranglo bíkke amíne tayyutpe byargongkai.

²⁴Dekepe ido longe kídí delo Hejekiah roja kila sita-simato. Bí kumto, delo RUUTUM bí bíme aiyéku emnam iyodko bito.

²⁵Idokom Hejekiahbí RUUTUMke bíme ayang lengkannamem, míngkímsula atí yitgekumato. Dekepe ikolok Judah elang Jirusaleme sok legape adírem paato.

²⁶Dekepe iduakom méélamdem Hejekiah lang Jirusalem lok ami kídarde mínggíp sutoku, delok legape RUUTUMke marname ami kídí delo Hejekiahke longelo aamato.

²⁷Hejekiah rojabí mirem along toku, delokke ami kídíeteng bíme yagorupe mínggeto. Bí bíkke uunem, baldínem, arekana elíng kídíem, nampona neyang kuséréngem, tamkung kídíem, delokke abíd arekana ekurang kídíem mekedope kumsung kídíe kato.

²⁸Sokke teyoloteng bí bíkke ali-ayéem, onggur alangem, delo olib télem meko kumsunge; takam taro kídíkepe dakkenge, delokke mér kídíem tumkukoe kato.

²⁹Sike sokke kékonlo Shédíbí bíme mérem, gooruem, delokke bojérupe abíd mirem ekurangem binam legape bí deddína luune kídíem molíkto.

³⁰Sikepe ina Hejekiah bí Gihon sirungke línggíng dan lenkoemteng itum geyéla Dabidke doolunglo anggo danlok nola roolíkla asiem tokmoto. Delo Hejekiah bíkke agér takamlo míínampe ito.

³¹Dekepeila Babilon among lokke migul kídíe bíkke among delo inam iyod delok legangem íngkí-bengkípe aado delo, Shédíbí Hejekiahke aapí-aangem kangkípe, bíkke míínampe melíkto.

³²Hejekiah rojake yénamlo ingkona agérem gértodín delo RUUTUM kelo bíkke míngkesula agér inam tabungem Amojke oo kaaluna miri Isaiahke kaarí kaanyo kaanam lolang Judah kelang Israelke roja kídíke dooying kitablo atkumtung.

³³Hejekiah sila bíkke simang dem rojem yuko ago kídíke teyongdan yupomlo yuto. Bíkke sido delo Judah lokkelang Jirusalem lokke ami takame bíme mínggela airupe gíímangem nyolíkto. Bíkke méélamlo bíkke oo Manasseh bí rojape yébotoku.