Read Alladian 2 ODONG 33 Bible Online

2 ODONG 33 - Alladian bible

2 ODONG 33

¹Manassehke roja ilen dodem bíkke dítage takying kolang taknyi ko ito. Bí takying pilngo kolang takngoko Jirusalemem ruutum doboto.

²Bí Israel ami kídíke aamang adape RUUTUMke monpak binam ami kídí delokke belumrupe inam ségu kísape imín gela, RUUTUMke keralo paab ito.

³Bí bíkke abu Hejekiahke bénpak binam uyu kumpom kídí deme moreptoku. Bí Baal uyume kumsuko runggu kídíem, uyu mime Asherahke mimang kídíem pílangkula, delokke takar kídíem kumsutoku.

⁴Bí uyu runggu kídíem, RUUTUMke amínem duumola yénamke bíme delo kumsupe aido emko Kumkeng Ekumlo pílíktoku.

⁵Kumkeng Ekum delokke kebang baapom annyi deloteng bí takar kídíem kumsuko runggu kídíem molíkto.

⁶Bí bíkke oo kídíemte Hinnom Yiibelo romnam amanpe romlíkto. Bí líímé delo moya-montorong ila kaatosuna uyu miri kídí emla aid miri kídíem kangko-tatkosuto. Bí botterupe RUUTUM ke keralo paab agér ila bíme yagorupe marmoto.

⁷Bí Kumkeng Ekum delo mimangko leelíkto. Sim among sime Shédí bí Dabid melang bík oo Solomonme, “So Jirusalem sokke Kumkeng Ekumso, Israelke íying kolang annyi erang lokke among kídí araloge, ngome kumsudope ulnam moolobe si.

⁸Delokke Israellok ami kídíe ngokke lulígnam kídíem igela delo ngokke béérang Mosike bulum binam ayon takamem bomgapyémílo, ngo buluke buku-neku kídarem ngokke duudope among binam deloge bulume monbín mokumayé,” emla potuai

⁹Idokom Manasseh bí, Judah delo Jirusalemlo duuna kídíem, RUUTUM ke Israel kídíke kerape monpak binam atímana ami kídíem pemílo pakyape deemang-amo iboto.

¹⁰RUUTUMbí Manasseh melang bíkke ami kídídem lutorlateng bulu tatmato.

¹¹Deke legape RUUTUM bí Assiria lokke maglíng ruutum kídarem buluke teyonglo mimak aabommoto. Bulu Manassehme umla, bíkkíng gakar loge kéélík geyéla, ikoli loge yélangala Babilon amonglo bomtoku.

¹²Bíkke sikepe duk-adírlok bí mínggíp sulangkula RUUTUM bíkke Shédí kíng ngébadokula, bíme iguldope roguto.

¹³Shédíbí bíkke kumnamem toríksula, bíme Jirusalemlo gílat sulangkula rojape yébomdokupe ito. Sikepe inam si Manassehme RUUTUM min Shédíbí emla kénsumotoku.

¹⁴Méélam delo bí Gihon sirung tokko anggodan, Dabid ke doolung legape luyudanlo yapgo etorko tortoku yiibe delo, delokke Engo Lamgé delokke aatak delolang Ophel emnam luune dem torgongla, etor kídídem kedon rudope torlíkto; bí Judah lokke yapgo etor torgong sunam luune takamlo sipaying maglíng delo ruutum kídarem duulík moyinto.

¹⁵Delo bí mibo uyu kídar deme, delokke Kumkeng Ekum deloge mimang kídídem, delokke Kumkeng Ekum dungko dííte delolang Jirusalemlo bíkke molíknam runggu kídardem laabínla, bí dekedeme luune luyu delo elpakyintoku.

¹⁶Bí RUUTUM me kumsuko runggu emte mosi-momotoku, delo bí ashéng aman kídí emlang yitge aman kídíem delo biketoku. Bí Judah lokke ami takamem RUUTUM, Israelke Shédíme kumsudokupe lulígtoku.

¹⁷Ami kídíde buluke kerang iyang supe abíd kumpom kídarlo ipak aman kídíem biduakom, bulu dekedem RUUTUM atelme bito.

¹⁸Manassehke ruutum yébodungem inam kídíem, bíkke Shédíme bíkke kumnam kídíem, delokke RUUTUM, Israelke Shédíke amín loge kaaluna miri kídar lokke bíme agom ponam tabungem Israellok roja kídíke dooying kitablo atkumtung.

¹⁹Manasseh rojake kumnam, delokke deme Shédíke poyansunam, delokke bíkke bursula míílat sukumang adape paab inam takam, bíkke uyu kumpom kídíem, Asherah uyu mimeke mimang pílík bonam, delokke bíkke mimang kumnam kídíem, sok legang tabungem kaaluna miri kídíke dooying kitablo atkumtung.

²⁰Manasseh sila bíkke simang dem bíkke ekumlo bulu yuto; delo bíkke oo Amon bí rojape yébotoku.

²¹Amonke roja yélendo delo bíkke dítage takying annyi kolang taknyiko ido. Bí Jirusalem among dem taknyiko rojape yéboto.

²²Bíkke abu Manassehke kísape RUUTUMke mirupe bíteng paab ito, delokke bí bíkke abu lok kumsunam uyu mimang kídíem kumsuto.

²³Idola bíkke abu Manassehke kísape bí mínggíp sulangkula RUUTUM kíng aalat sukumang; bí bíkke abuemte pakyape imemto.

²⁴Amonke rumkínglo yéna ruutum kídíde bík mirupe rukup bosula Amonme bíkke roja ekumdelo mokalíkto.

²⁵Idokom among delokke ami kídíde Amonme mokana kídardem petyin geyéla bíkke oo Josiah me rojape ilíktoku.