Read Alladian 2 ODONG 35 Bible Online

2 ODONG 35 - Alladian bible

2 ODONG 35

¹RUUTUMme yidgenape Josiah rojabí Gíbong Gíídíem Jirusalemlo iboto. Bulu Gíbong Gíídí legape mérem kerang poolo delokke looying kolang loopinana longedelo pato.

²Bí miri kídíem buluke Kumkeng Ekumlo agér gérpenamem parlíkla, agérem aipe gérdope edíng-podíng líkto.

³Bí RUUTUM kelo tosaklíknam Israel lokke poyilna Lebi kídaremte sikepe poyilto: “Dabidke oo Solomon rojake pínam deena Daapong Sonduk deme Kumkeng Ekumlo melík langka. Nolu deme moolekonlok moolekonlo jonggoopenam kaimang, idola nolu RUUTUM ngoluke Shédí melang bíkke ami Israel kídíem agér gérbipe aiyé.

⁴Dabid rojakelang bík oo Solomon rojake nolum agér tarong parlíknampe erang-erangpe noluke agérem Kumkeng Ekumlo ilík bomlangka,

⁵delokke noluke aralok, noluke ayokonem, Israel ami lokke erang miyongem iguldope ulbosulangka.

⁶Nolumoko Gíbong Gíídí lokke mér emlang sobén kídíem paboyéne. Supak nolu agísuem deesu-aasu geyéla aman bilíkpenam emteng irula agér-anam dem itoka. RUUTUM ke Mosi kíng ayon binam delokke lukampe noluke Israel aní-bíro kídar eteng imín gedope.”

⁷Gíbong Gíídí adeng-ape dem ami kídarem ibonadope Josiah roja agí taro alunglok méro emlang bénoem jarying angumko, delokke ruboem jarumko bisuto.

⁸Bíkke rumkínglo ruutum yéna kídarete agí míísatlok Lebi kídíke ilíkpenam legape bidumsuto. Delo Kumkeng Ekum lokke kaabo-tatbona ruutum Hilkiah, Jekhariah, delo Jehiel buluteng miri kídídem jarnyi kolang língko akkéko méro emlang bénoem, delo língko angumko ruboem adeng-ape delo ipak amanpe ilíkdope bito.

⁹Lebilok ruutum kídí Konaniah, Shemaiah delo bíkke bíro Nethanel, Hashabiah, Jeiel, delo Jojabad bulu jarngoko méro emlang bénoem, delokke língko pilngoko ruboem Lebi kídarem ipak amanpe bilíkdope bito.

¹⁰Gíbong Gíídí legape tabungem irung-sarung yinrodem rojake pokampe miri kídíelang Lebi kídare buluke agér gérpeko delo dagato.

¹¹Méro emlang béno kídídem pakarodem Lebi kídíde ayoem yoobínto, delo miri kídíde iyyi dem laala runggu merom delo kungkat gooto.

¹²Delo bulu ami kídídem erang akor loge erang opéépe ipan subomdula, romnam aman legape adín demte, Mosike ayon akorloge biladope orlíkto.

¹³Mosike ayon lulígnampe Lebi kídíde Gíbong Gíídí lokke ipak amanem eemelo pamnyuto, delokke deena amanpe bilíkpenam dem bottena togulo, delokke damalo keenyuto. Depe igeyéla adíndem menape ami kídílo orto.

¹⁴Sikepe irong delo Lebi kídíde adín dem buluke supelang Aaronke otíng lokke miri kídíke legape mesuto, legade miri kídarde romnam aman lokke oob oblem deme yoh loope romlíkko merom delo romto.

¹⁵Rumkíngke miri tapung ina Asaphke erang lokke Lebi kídar si Dabid rojake políknampe agér parlíknamlo yébomto: Asaph, Heman, delo rojake kaalu miri Jeduthun. Kumkeng Ekum delokke lamgé kídíem dagbomna sontori kídíde buluke dakkol loge gíkupenam kamato, kapeila abíd Lebi kídíe buluke Gíbong Gíídíem irungbito.

¹⁶Dekepeila, Josiah rojake lulígnampe, RUUTUMme kumnam legape, Gíbong Gíídí legape ipenam kídíem, delokke runggulo romnam aman kídíem binam takamem delo longe delo ipíngto.

¹⁷Delo duuna Israel ami takame longe kínídko Gíbong Gíídí demlang Siiyé líkmanam Ettíng adeng-apedem loodumto.

¹⁸Kaaluna miri Samuelke longe delokke ila, Israel among so Gíbong Gíídíem lekokom sikepe ikíyimangai. Íngkona rojekom Israel so Gíbong Gíídíem sikepe ikíbomang, kapekísa Josiah roja, miri kídare, Lebi kídare, delo Judah, Israel, delokke Jirusalem lokke ami kídíe,

¹⁹Josiah rojake takying kolang dítak píínyinanalo igebotodí.

²⁰Josiahke Kumkeng Ekum legape tabung agérem iyinrongeme, Ijipt lokke Neko roja maglíngko gíbola Euphrates korong anín Karkhemish among delo mimak ikape aabomto, delo Josiah teng bíme mimak imínsupe gílento.

²¹Idokom Neko, Josiahme sim agom sim melíkto, “Ngokke magbomnam mimak si nome ibommang, E Judah lokke roja. Ngo nome mimak ikape aabommang, idola ngokke miru kídar emmin imínsukape aadune, delokke Shédíbí ngome menape itoka emlíkdung. Shédíbí ngokke danlo kadung, dekepeila no ngome motum mapeka demamílo bí nome inyokyé.”

²²Idokom Josiah bí mimak dem iperung emla ralgapto. Neko roja keelok Shédíke políknam dem Josiah bí tatmato, dekepeila bí agíem leemo moruusula Megiddo yiibe delo Nekome mimak ikape gíto.

²³Mimak dem iduk bosudungem Josiah rojame Ijipt ami lokke aplíknam epuk kídíe apketto. Delo bíkke béérang kídíem bí lulígto, “Ngome sokke duggébolangka, ngome yagorupe tarí mokettung.”

²⁴Bulu bíme guré-gaari delok joolenla, bíkke delo bomnam angukon guré- gaari delo joolíklangkula bíme Jirusalemlo bomlat aatoku. Delo bí silangkula, bíme roja yupom agolo yutoku. Tabung Judah, delokke Jirusalem ami kídare bíkke sinam legape ankíto.

²⁵Josiahke legape ankíla kaalu miri Jeremiah bí pengé miriko atlento. Silomelo peteng tabung mime-milope miri luna kídare Israel lokke idong kísape sim pengé sim, bíkke legape buluke ankí adíryém miripe lugedung. Sim pengé miri sim ankí miriem atkumkolo paayé.

²⁶Josiahbí íngkoko itodín, bíkke RUUTUMke legape ibisunamem, bíkke ayon kídíem igela yénamem,

²⁷delokke bíkke yélen lokke ila yéyin lokke dooying tabungem Israel, delokke Judah lok roja kídíke legang atkumko kitablo atyin bitung.