Read Alladian 2 ODONG 36 Bible Online

2 ODONG 36 - Alladian bible

2 ODONG 36

¹Josiahke sirong delo bíkke oo Jehoahajme ami kídíe gíbola Jirusalemlo rojape ullíkto.

²Jehoahajke rojape ilendo delo bíkke dítage takying annyi kolang tagumko ido, delo bí Jirusalemlo poolo angumko rojape yéboto.

³Ijipt roja Nekobí Jehoahajme patek sola, Judahem kajanangpe 3,400 kilogramko baldínem, delo 34 kilogramko uunem bidope ilíkto.

⁴Ijipt roja Nekobí Jehoahajke bíro Eliakimme Judah lokkelang Jirusalem lokke rojape ilíkto, delokke Eliakimke amínem Jehoiakim emla mínlíktoku. Idola Neko roja Jehoahajme Ijipt amonglo bomnyoktoku.

⁵Jehoiakimke rojape ilendo delo bíkke dítage takying annyi kolang takngoko ido, delo bí takying kolang taktelko Jirusalemem rojape yéboto. Bí RUUTUM bíkke Shédíke kaabang manam agérem ito.

⁶Babilon roja Nebukadnejjarbí Judah amongem mimak iyang bomla Jehoiakimme umla ikoli koklíkla Babilonpe bomtoku.

⁷Nebukadnejjar Kumkeng Ekum deloge ekuserang eketeng laala, Babilonlo bomalangkula dem takam bíkke roja ekumlo metoku.

⁸Jehoiakimke ruutum yédung delo inam tabungem, uyu kumsula, uyu mimangem ilíkla inam takam emteng Israel lokkelang Judah lokke roja kídíke dooying kitablo atkumtung. Bíkke oo Jehoiashin bíme rojape yétíttoku.

⁹Jehoiashinke rojape ilendo delo bíkke dítage takying kolang dítak píínyiko ido, delo bí Jirusalemlo poolo angum kolang looyingko rojape yéboto. Bíkom RUUTUMke kaabamanam agérem ito.

¹⁰Edílo donggube aatodí, delo Nebukadnejjar rojabí aalangkula Jehoiashinme umla Babilon amongpe bomtoku, delok teyonglo Kumkeng Ekum lokke arekana ekuserang kídar emte bomtaksutoku. Delo Jehoiashinke apang [2]Jedekiah me Judah, delo Jirusalem lokke rojape Nebukadnejjar bí imoto.

¹¹Jedekiahke rojape ilendo delo bíkke dítage takying annyi kolang taktelko ido, delo bí Jirusalemem rojape takying kolang taktelko yéboto.

¹²Bí RUUTUMke kaabamanam agérlo itíla, RUUTUMke agomem pogonggena kaalu miri Jeremiahke keralo bí eetet-dengompe tatbimato.

¹³Bí Shédíke amínlok bíkke agomem taddope pésumona Nebukadnejjar rojamete mirolpe rollento. Bí RUUTUM Israelke Shédíke danlo míílat sukurupemang emla mikép aapíem geto.

¹⁴Sokke teyong loteng Judahem yégena kídare, miri kídare, delokke ami kídare bulum dunggobomna abíd ami kídílokke deemana séguem uyu mimang kumsukolo kaayilsuto, delokke dekepe ila bulu RUUTUM agísuke deemokunam Kumkeng Ekum deme deemamotoku.

¹⁵RUUTUM buluke neku-bukuke Shédí, bíkke kaalu miri kídíem melíkla bík ami kídarem lutor motíto, kapeila Shédíbí bulum lang Kumkeng Ekum deme ayato.

¹⁶Idokom bulu Shédíke kotoki kídardem lupu-luléla ilatto, delokke bíkke ponamem tatpakla kaaluna miri kídíem, RUUTUMke marname méélamdelo ami kídar teyolo yago alongla mopísupeko kaimado loope, ngilka latto.

¹⁷Dekepeila RUUTUM bí Babilon rojadem bulume mimak iyang bomdope bomalíkto. Rojade, Judah lokke yaamé koo rudem, bíkke yoksa delok petyinto; Kumkeng Ekum daadiloteng. Bí sékometeng ayang kamato; koolai minelai, milolai mimelai, kinalai kimanalai, Shédíbí bulum takam Nebukadnejjarke alaglo biyinlíkto.

¹⁸Babilon rojade Kumkeng Ekumem, ekum sokke kumsungem, delo rojalok ekurangem, delokke bík ruutum kídíke ekurangem lííla, takamem Babilonpe bomtoku.

¹⁹Bí Kumkeng Ekum emla luune deme, delokke sokke roja ekumem, sokke ekurang kídíem emepe rílíkto, delokke luune yabgoem bénletto.

²⁰Bí turla duuna ami kídarem umla Babilonlo bomtoku. Delo bulu bíme, delokke bíkke otíng kídíem abílpe, Parsia rojake miga-miramna rojape ilenmado loope, agér gérbito.

²¹Dekepeila ingkuemdí kaaluna miri Jeremiah kelok RUUTUM bí porungtuadí de agom de apíng líkkai: “Amongde Sabbath apéénamem loodum manam ayanpe, yana kísape takying kíníd kokai asoope duuyé.”

²²Parsialok rojape Sairaske yédo delokke kerayalum dítak delo, RUUTUMbí bíkke kaalu miri Jeremiah kelok ponamem arolíkmoto. Bí ruulíkla Sairas rojame sim rumkíngke ukum sim bilendola, akorpe atla bík among yéta takamlo bottepe rikan goodope melíkmoto:

²³“Si Parsia roja Sairaske ukume: RUUTUM, Teyong amongke Shédíbí ngome taleng kuppo sim ruutum bomdope ilíktung, delokke Judah among lokke Jirusalemlo bíkkepe Kumkeng Ekumko modope ngome bilíktung. Supak Shédíke ami takam nolu elo gílangkuka, delokke RUUTUM, noluke Shédíbí nolukíng duumín gedaklangka.”