Read Alladian 2 ODONG 9 Bible Online

2 ODONG 9 - Alladian bible

2 ODONG 9

¹Sheba among lokke raniete Solomonke amín gínamem tatto. Depeila bí Solomonme íngkí-bengkí kape emla Jirusalem loope aabomsuto. Bí deddína béérang emteng gíaboto, delo dope-tíípenam, guumíng-dogíng, delokke deddína uun emteng uut simon loge gíangto. Edílo bí Solomonme kaarík sutodín delo ranike míínam tabungdem íngkíto.

²Tabung íngkínamdem Solomon bí poyan suyinto; bíkke legape íínam kídíde, atí poyansula manam kamaneke.

³Solomonke gyan kanam emteng Shebalok ranide tatto, delokke bíkke roja ekum monam demte kaato.

⁴Solomonke apim dopenamem tébul teyolo mebinam emteng kaato, agér ina ami kídíke dungko ekumemte; roja dungkolo agér ina ami lokke leko bosunam, buluke akampe ege-galuk gekor, donam doyém bíme toyana kídíke ege-galuk genam, delokke bíkke Kumkeng Ekumlo aman bisak líknam tabungdem kaayin rodem, kaanga aloong sula ranike aapí-aang ete míngkén yimanglok ngakén-ngayén yimato.

⁵Ranide rojaem poto, “Ngok agí gíídanglo íngkonako nokke legí-sigangem, delokke nokke gyan kanamem tattuadín de arorudo.

⁶Idokom ngo agísue gíla kaatet sumadem buluke ponamdem arodung emla míímatuai. Aropaklok poyékuem buluke pokunamde nokke botterupe gyan kanam delokke arotkon emteng pokumang. Ngokke legang tatnamdem bojéyangkoi nokke gyande kadung.

⁷Nok ami kídíde edítko ashéngla yédun! Nok mime kídí deteng edítko ashéngdun! Séko bulu nokke keralo agínke agér ila yédula nokke gyanem kaatíla-tattíla idune, de agér iyana kídíde edítko ashéngla yédun!

⁸RUUTUM nokke Shédíme yidgedung. Shédíke legape ami kídarem yébodola agér emteng géryadope nome bí rojape ilíktung. Nok agér-anamem kaala bí edítnako nokkíng ashéng líkdun, dem bí lengkan sudung. Israel ami kídíem Shédí bí ayang sudung, delokke bulume yénamke duuyar molídung. Nome buluke rojape ilíktung, legade no bulume ayon loklang arolok yéboladope.”

⁹Delokrodem ranide Solomon rojame bíkke bomanam delok asampe amaneke bito; gairuna uun éjar appi kilogram ngatnako, neyang kuséréng ete bojékokai, delokke are kanarung elíng emte. Ranike Solomonme binam neyang kuséréng kísana íngko lokom nampona mapaamangai.

¹⁰Sokke teyonglo Hiram kelang Solomonke béérang kídíeteng Ophir amonglok uun, algum esing delo are kanarung elíngem bomatoku.

¹¹Solomon roja algum esing dem Shédíme Kumkeng Ekum delokke ebang pelang roja ekum lokke ebangpe píllíkto, delokke harp tapung delo layar tapung peteng pínato. Judah amonglo lekokom sikena esing kangkímangai.

¹²Solomon rojateng Shebalok ranidem edítko bí kaabala kaatodín bilíktoku. Bí rani delokke Solomonme binamem pemílo bojé yangko ranidem bilíktoku. Delokrodem ranide agér iyana kídarem gíbola agí among danpe gílat sukaku.

¹³Dítak mipíke Solomon roja 23,000 kilogramko uunem paadungai.

¹⁴Sokke teyonglo dukan, bési-bépar ina, botterupe bépar ina delokke Arab doolung kídílok rojaloge, sorkari among lokke kajanang delo nokdi baldín emlang uun emte Solomon kíng boma bidungai.

¹⁵Solomon bí roja tamkungem língko annyiko uunloge botteruna eke píto. Tamkung mipí delo kilogram kíníd asakpe uunloge demjépla kyamlíkto.

¹⁶Delokrongem língko angumko améyana tamkung eke pítoku. Uunem demjép pala tamkung miyong delo kilogram angum asakpe edíírupe kyamlíkto. Sim tabung sim roja bí Lebanon Moonamlok Ekum delo mesiilíkto.

¹⁷Sita tareng lokteng rojabí roja dungkeng palengko píto. Sim uunloge teyongem kyamlíkto.

¹⁸De palengde baarok akké kanako, delo uunloge pínam ale tuda sukengko kato, simteng paleng delo píyon sulíkto; dungko abe delo alag mekeng annyi koteng ilíkto, delo lakdu níída sukeng ampeng elendan delo myomur noksang annyi koteng pílíkto.

¹⁹Íying kolang annyi myomur noksang eke paleng lokke baarok delo kato. Baarok akké mipí lokke tuubukon lola tuubu konlo noksadem píket líkto. Sikepe íngkona rojete pílík kímangai.

²⁰Solomon rojake tabung donana ekung-batide uunlok pínam mílíe, delokke rojake Lebanon Moonamlok Ekum delokke ekuserang, gíri-bati tabung deteng aro uunlok pínam mílípe ito; nokdi baldín loge pínam atodem Solomonke yédo delo atí kopeteng míímatuai.

²¹Solomon roja bési-bépar inana asi jaji bottenako kadungai, deme Hiramke ami kídíe enbom tíínato. Tagum méélam dadalo jaji etkungde aalat sudungkuai. Dekepe aalat suyékuem rojake legape moyur pettang loge, uun, baldín, sita tareng, sibé loge boma bidungkuai.

²²Sikepe Solomon rojabí tani among sokke roja araloge mirem yalumne, delokke gyan kaya yalumne.

²³Tani among sokke roja kídíe Solomon rojake aapí-aanglo Shédíke gyan budii binamem tatkí-kénkípe emla matatuai.

²⁴Aana miyonge aman bomala aato: baldínlok pínam ekuserang, gíníng-yoksa, ege-galuk, gom kísa idola nampona alang, neyang kuséréng, guré, delokke kossor guré deddínem dítak mipílo ami kídíe Solomonme kaarík supe idola boma bituai.

²⁵Solomon rojabí jarpiko guré kídíke dakkoe, delo guré-gaari dongkoe kato. Jarying kolang jarnyiko gaari dukbomna gurée kato. Sikesi ayokone guré-gaari mepom doolungko kato, delokke ayokone Jirusalemlo bíkkíng kato.

²⁶Euphrates korong lokke ilangala Philistia loope, delokke Ijipt among rísu loope, so duuna roja tabungde bík alaglo duuyinto.

²⁷Solomon rojabí nokdi baldínem Jirusalem lokke elíng dongkampe alum-asamape pílenboto, delokke sidar esingemte dííte yiibelo duuna sikamor esing kísape lelíkboto.

²⁸Solomonke guré kídí deme Ijipt amonglok lang angukon amonglok langaatuai.

²⁹Solomonke abíd dooyingem yélen lokke ila yéyin loope kaaluna miri Nathanke dooying lolang, Shiloh among lokke ami polu-poor bona Ahijahke ponamlo, delokke kaaluna miri Iddoke kaarí kaanyo kaanam kídílo, Nebatke oo Jeroboam rojake legang poko loteng bíkke legange kadung.

³⁰Solomon roja Jirusalemlo duudola tabung Israel amongem takying appiko ruutum bomto.

³¹Bíkke simangem Dabidke doolunglo yuto. Bík sirongem bíkke oo Rehoboam bí rojem yébomtoku.