Read Alladian EJRA 3 Bible Online

EJRA 3 - Alladian bible

EJRA 3

¹Poolo kínídko ido delo, Israel lok oo kídíe luune kídílo duulík rongkuem, ami takame Jirusalemlo ami atel kísape aadumsuto.

²Delo Jojadakke oo Jeshua, bíkke bíro miri kídíem lekope, delokke Shealtielke oo Jerubbabel lang bík otíng-oyin kídíe lekope irepla, Israelke Shédíke rungguem, romnam amanem Shédíke ami Mosike ayon atbinam akorpe, bidokupe moreptoku.

³Luyu degong among lok duuna ami kídíem pesola, bulu runggu dem duuyangkolo molíktoku, delokke delo bulu RUUTUMme romla bipenam amanem, roh lolang yumelo romlík bito.

⁴Atla menampe bulu Ippo domanem ibomto; delokke loodípe moodí-moodílo romnam amanem longe delok bikorpe bito.

⁵Delok rongem bulu biyarnam romnam aman kídíem, Poolo Karsing aman kídíem, delokke RUUTUM kepe ruulennam doman abíd takamlo binam aman kídíem lang agí mínggope RUUTUM kelo mipil miyonge bisunam kídíem bomala bito.

⁶RUUTUMke Kumkeng Ekumem ami kídíe molenkumang adalateng, bulu poolo kínídnana lokke kerang yalum longelo RUUTUMke runggu delo aman bomala, romnam amanem bilento.

⁷Delo elíng mistri kídíem lang esing mistri kídíem bidope ami kídíe abalem bito, delokke Parsia roja Sairaske lulíknam adupe Lebanon lokke siyénglok yutbomla Joppalo sidar esingem bomangdope emla Sidon ami kídíem lang Tur ami kídíem donam-tíínam, delokke télem bito.

⁸Delo Jirusalemlo duuna Shédíke ekum dungkolo buluke aarongkuem dítak annyinana lokke poolo annyinanalo Shealtielke oo Jerubbabel, Jojadakke oo Jeshuah, delokke buluke aní-bíro kídíe, delokke miri kídíe lang Lebi kídíe, delokke abílpe yéko monnyokko loge lenlangkula Jirusalemlo angkuna ami takame agérem gérbosuto. Bulu RUUTUM ke ekum mokunam agérem kaabomdope, takying annyi lokke ila abíng yana Lebi kídíem parlíkto.

⁹Delo Jeshua lang bík oo kídíe, delo bík erang kídíe, delokke Judah opínlok Kadmiel lang bík oo kídíe lekope ila Kumkeng Ekumem morepkunam agérem kaalík-ilík bosuto. (Bulume Henadadke Lebi pínmík kídíe igulbosuto.)

¹⁰Delo mona ami kídíe Kumkeng Ekum gaangem díílík rongem Israel lok roja Dabidke políknampe RUUTUMme yidgenam legape, miri kídíe agí-agí ege-galugem gela, alaglo bikul tapungem bomla, delokke Asaphke Lebi oo kídíe lupiyangem bomla delo dagaato.

¹¹Delo bulu RUUTUM me yitge rínggela tomín gela miriem luto, “RUUTUM bí aine, delokke bík aro ayange Israello agínpe duuyardung.” Delo ami takame botterupe gogla RUUTUMme yidgeto, kapeila RUUTUMke ekum gaangem díílíktoku.

¹²Idola kerangke ekumem kaana miri kídílok, delo Lebi kídílok, delokke erang ruutum kídílok miku ayoko, ekum sok gaangem díílík dokupe kaayédem botterupe ulo gogla kapto.

¹³Dekepeila ami kídíde ashéngla ngomnam emlang kapnam-ríínamem tatpan sukénmato, kapeila ami kídíde, mooteng lokkai tatpaadope botterupe ngomto.