Read Alladian EJRA 4 Bible Online

EJRA 4 - Alladian bible

EJRA 4

¹Méélam delo, aalatkuna monnyoknam ami kídíe RUUTUM Israellok Shédí keepe Kumkeng Ekumem morepdungku emla Judah lokke lang Benjamin lokke miru kídíe tatla,

²Jerubbabel kílang buku erang kídílok midang kídílo aala, bulum poto, “Nolukelo ngolum kom momín gemoi; kapeila noluke kísa ngolukom noluk Shédíme míngke sudung, delokke Assiria lok roja Esarhaddon ngolum so among so melík dungku, delokke bík duudo delokke ila supak loope ngolu Shédíme ipak ilíkla idung.”

³Idola Jerubbabel, Jeshua, delokke Israel lok buku eranglok midang kídíe bulum poto, “Ngoluke Shédíme ekum mobikolo nolu atí imín gepenam kamang; kapeila Parsia lok roja Sairas bí ngolum kape lulígtodí, dekepe RUUTUM Israel lok Shédí keepe ngolu petom mosuyé.”

⁴Delo among delok ami kídíe Judah ami kídíem lusa-mansala ito, delokke ekum dem moge kanmadope lurít-irítla irepto,

⁵delokke buluke mííbomnamem inyokdope emla Parsia lok roja Sairas ke ruutum bomdo longe tabung lokke ila ruutum dosonsuna Darias rojake longe loope Parsia sorkari migom kídíem bulu sépsu-paasu bila itíto.

⁶Ahasuerus ke ruutum bomdu delo, bulu Judah, delokke Jirusalemlo duuna ami kídíem atkung kakot ko atla melíkto.

⁷Parsia lok roja Artajarjes ke longelo, Bishmal, Mithredath, Tabeel delokke bík ibosutíng abíd kídíe lekope Artajarjes kelo shitiko atto. Shitidem Aramaik agompe attuai.

⁸Gobonor Rehum, delo atgebona Shimshai bínyi Jirusalem legangem roja Artajarjes kelo rumkíngke sikepe shitiko atla melíkto:

⁹“Gobonor Rehum, atgebona Shimshai, delokke ibosutíng abíd kídí, kebang ruutum kídí, among ruutum kídí, migom kídí, Parsia ami kídí, Erek lok ami kídí, Babilon ami kídí, Elam among lok Susa ami kídí,

¹⁰delokke mínggenam milo aro Ashurbanipalke Samari lok luune kídílo, delokke anggodan Euphrates korong rotkon among kídílo melíknam duulíkna abíd opín ami kídí kelok melíkdung.”

¹¹Si buluke melíknam shitilo atname: “Roja Artajarjes kelope Anggo Euphrateslo bíkke béérang kídílok.

¹²“Roja Artajarjes, nokke lok lenlangkula ngolukelo angkuna Judai ami kídíe Jirusalemlo enkaku, delokke bulu belumnam, delokke atímana luune em morep bomdungku; bulu etor suppiem iyindak delokke gaang kídíem isi-imo dungku.

¹³“Sok teyoloteng, roja bí sim kénpe aido; sim bottena luune sim mokumílo, delokke etor suppi kídíem iyinmílo, bulu kajanang atí biyimayé, delokke roja kumsung kídíekom luksonyé.

¹⁴Ngolu roja ekumlok igul egedem gene, rojame ipusiléé idope kaala ngolu yékanmang, depeila ngolu ami melíkla roja nome pokandung.

¹⁵Nok buku-neku dooying kitablok legang sim malen ladoku, delo atkumnam kídídelo si luune bottena si akpésuna, roja kídíem lang among takamem ebínmona, aku-ayu lokkekai akpésuko luuneko emla no kaapa lenyé. Delok legapemin sim luune bottena sim inyoktuane.

¹⁶Ngolu rojame pokandung; sim luune bottena sim mokumílo, delokke sok etor suppiem iyinlík kumílo korong rotkon among so nok yébom penam kaimayé.”

¹⁷Rojade sim atyan sukunam sim melíktoku: “Gobonor Rehum, atgebona Shimshai, delokke Samari lolang Anggo Euphrates rotkonlo duuna buluk ibosutíng abíd kídílo, saalam.

¹⁸“Noluke ngome shiti melíknamem ngok keralo berokrupe rikanbito.

¹⁹Delokke ngo lulíkla legang sim matakímoto, delokke konnying-mennying lokkekai roja kídíem gerep sukína, akpé-ipé suyarko luune bottenako emla sim mapaalento.

²⁰Delokke Jirusalemem yébomna roja kídí emkom malento, bulu korong rotkon among takam emkom ruutum bomtuai.

²¹Delok legape ami kídíde dem agér dem imadope emla, delokke ngokkelok ukum agomko paamang ayarem dem luune bottena dem mokumadope ukum bilangka.

²²Sim legang sim mínggemape imapeka; roja míngkorem nanying dope inam sim kape gerep moyéne?”

²³Roja Artajarjes ke shiti dem Rehum, atgebona Shimshai, delokke buluk ibosutíng keralo pori rikan biyéname, sipaying melíkla tolnam lok bulum agér dem ikumadope itumto.

²⁴Delo Jirusalemlo Parsia lok roja Darias ke dítak annyinape ruutumdo deloope sim itumla meto.