Read Alladian EJRA 5 Bible Online

EJRA 5 - Alladian bible

EJRA 5

¹Delo kaalu miri Haggai lang Iddoke oo Jekhariah bínyi, Judah lolang Jirusalemlo duuna ami kídí teyolo ruutumna, Israellok Shédíke amínlok polu-poor agomem pobito.

²Delo Shealtiel ke oo Jerubbabel, delokke Jojadakke oo Jeshua bínyi gerepla Jirusalemlo duuna Shédíke ekumem moreplentoku; delokke bulukelo lekope Shédíke kaalu miri kídí ete yémín gela bulum igulmínto.

³Depe ido delo korong rotkon among delok among ruutum Tattenai lang Shethar Bojenai, delokke buluke ibosutíng kídíe bulukelo aadola sikepe bulum íngkíto, “Séko nolum sim Kumkeng Ekum sim modokupe delokke leemo dokupe ukum bila lulígtone?”

⁴Bulu sikepekom bulum tatkíto, “Sim ekum sim mona ami kídí lok amín kídíe ingkueda?”

⁵Idola Jihudi kídíem yébona kídí teyolo Shédíbí kaabomdungai, delokke Parsia migom kídíde Darias kelo atkanla, delokke sok legangem bíkkelok shitiko paamang tetengem bulum agér lokke itum-lutum maato.

⁶Korong rotkon amonglok ruutum Tattenai lang Shethar Bojenai, delokke Euphrates korong rotkonlo duuna mínggenam migom ruutum kídíke Darias roja kelo melíknam shitie si.

⁷Bulu sikepe atla shitiko melíkto: “Roja ruutum Darias kelo; dengomlok takamem yébo daklangka.

⁸Bottena rojabí sim kénpe aido. Ngolu Judai amonglo aala bottena Shédíke ekumlo gítoka. Dem bottena elínglok, delokke suppiem siipang-borongga loge ilíkla mobomdungku. Sim agér kídísim bulu menang-menang airupe mobomdung.

⁹Delo, sim ekum sim modope, delokke sim leemo sim ilíkdope sékoda nolum ukum bitone emla ngolu buluke miro kídíem íngkíto.

¹⁰Delokke bulum yégebona ami kídí lok amínem atla nom bikan dope emla, ngolu buluk amín emkom íngkíto.

¹¹Si buluke ngolum poyan suname, ‘Ngolu teyong among kelang tani amongke Shédíke béérang kídíe, delokke Israel lokke bottena rojakon lok, deddína dítak kerape moyintuanam ekumem ngolu modungku.

¹²Ngoluke buku kídíe teyong amongke Shédíme marmonam legape bí bulum Babilon lok roja, Saldia roja opín lokke Nebukadnejjar ke alaglo melíkla, bí sim ekum sim bénpakto, delokke ami kídíemte Babilon lo umnyok bomtoku.’

¹³‘Idola Babilon lok roja Sairas ke kerang dítak delo, Sairas rojabí Shédíke ekum sim mokupe aido emla ukum líktoku.

¹⁴Nebukadnejjarke, Shédíke ekumlok íngko-íngkona uun, delokke baldínem laalenla bomlangkula, Babilon kumkeng ekumlo metokuadí, dem atí takam dem Sairas roja bí Babilon kumkeng ekumlok laalentoku; delokke bík parlíknam among ruutum Sheshbajjarke alaglo dem takam melíktoku;

¹⁵delokke bí bím atí kídí dem Jirusalemlo duuna Kumkeng Ekumlo bomlangkula delo medokupe, delokke Shédíke ekumem duuyang sukolo molík dokupe políkto.

¹⁶Dekepeila Sheshbajjar aalangkula Jirusalemlo duuna Shédíke ekumem molík pekoem ireplento, delokke ila supak loope sim mobomdung, delokke supak pekom iyinmangada.’

¹⁷“Delok legape, roja bí sim aipe míídomílo, Sairas rojabí Jirusalemlo duuna Shédíke ekumem modokupe emla ukum bitodí bimadí, dem roja bí Babilon so duuna rojalok legí-sigang atkumnamem kumsunglok matalangka, delokke sim legang sim rojake mííname kape míídudí, dem ngolum atkan langka.”