Read Alladian EJRA 7 Bible Online

EJRA 7 - Alladian bible

EJRA 7

¹Sike takam sok irong méélam delo, Parsia lok roja Artajarjeske ruutum bomdo delo Ejrabí Babilon among loge gílentoku. Ejrabí Seraiahke ue, bí Ajariahke ue, bí Hilkiahke ue,

²bí Shallumke ue, bí Jadokke ue, bí Ahitubke ue,

³bí Amariahke ue, bí Ajariahke ue, bí Meraiothke ue,

⁴bí Jerahiahke ue, bí Ujjike ue, bí Bukkike ue,

⁵bí Abishuake ue, bí Phinehaske ue, bí Eleajarke ue, bí miri íírne Aaronke ue.

⁶Ejrabí RUUTUM Israellok Shédíke Mosime binam ayonem airupe kénjinakuai. RUUTUM bíkke Shédíke utepooroe bíkkíng kanam legape Ejrake konam takamem rojade bito. Artajarjeske dítak kínídnanape roja dodoem, Ejrabí Jirusalempe, miri kídí, Lebi kídí, Kumkeng Ekumlo tapung ibona kídí, Kumkeng Ekumem dakbomna kídí, delokke agér gérna kídíem idumsunam opééko enlen botoku.

⁸Bulu Babilon loge kerang poolo delok kerayalum longelo enlen langkula, Shédíke igullok, pilngonana poolo lokke kerayalum longelo Jirusalemlo píítoku.

¹⁰Kapeila RUUTUMke ayonem kénla dem agérpe igedope, delokke Israel kídí aranglo yégang ayon kídídem lunom-inom dope emla Ejrabí bík yénamem tolíksuto.

¹¹Artajarjeske, miri delo poyilbona, Israelke legape RUUTUMke lulígnam ngiitom ayon takamem kényinna Ejrame shiti biname:

¹²“Roja kídí lokke roja Artajarjes kelok, teyong amonglok Shédíke ayonem poyilbona miri Ejra kelo.

¹³Supak ngo sim ukum sim bilíkdung. Ngok roja dobomnam arang so edítko Israel ami kídíe, miri kídíe, delokke Lebi kídíe Jirusalemlo enkupe emla mííne kadudí, bulu nokkíng lekope enmín gelayéku.

¹⁴Ngolang ngok poyil-luyilna midum kíníde nome, nokkíng bilíknam Shédíke ayonem Judah, delokke Israello edítko igedudí dem kangkí-tatkídope melíkdung.

¹⁵Delokke Israelke Shédí sékoke Kumkeng Ekume Jirusalemlo duududí, bíkke legape ngokkelang ngokke poyil-luyilna kídíke agí mínggosupe bisupe míínam uun, delokke baldín amanem bomkupe aiyé.

¹⁶Nok Babilon among takamlok langgonam baldín emlang uun tabungem, delokke ami kelang miri kídíke Jirusalemlo duuna Shédíke Kumkeng Ekum legape bidum sunam aman kídíemteng no bomkupe aiyé.

¹⁷Sok abal kídí sok no airupe ibomla, rubo kídíem, mérbo kídíem, méro kídíem, ali-ayé kídí emlang onggur alang aman kídíem Jirusalemlo duuna Kumkeng Ekum lok runggu delo bilangka.

¹⁸Nok Shédíke míngkorpe, no lang nok ami kídíe ingkoko ipe emla míídudí, dekepe ngatna baldín, delokke uun kídídem agér inalado.

¹⁹Nom bilík kunam Kumkeng Ekum lokke ekung-bati kídar dem Jirusalemlo Shédíke keralo no melík bikupe aiyé.

²⁰Delokke nok Shédíke ekum legape pitgíngem edítko mííyédí dem rojake kumsung lok laalenla pitlangka.

²¹“Delokke Artajarjes roja ngo, korong rotkonlo duuna among takamlok kumsung ruutum takamem ukum líkdung: Teyong amongke Shédíke ayonem poyilbona miri Ejrabí nolu kelok ingkoko mííyédí, dem apíí píílípe kaabilangka.

²²Baldínem 3,400 kilogram loope, gehuem 10,000 kilogram loope, onggur alangem 2,000 litar loope, olib télem 2,000 litar loope, delokke edítko aluem mííyédí dekeko bilangka.

²³Teyong amongke Shédíbí ingkuem lulígdudí, dem teyong amongke Shédíke Kumkeng Ekum legape apíí-píílípe ibilangka, demamílo roja kelang bík oo kídíke amongso bík marname kapelo.

²⁴Ngolu nolum lekoda pokan bidung. Miri kídí, Lebi kídí, miri luna kídí, lamgé dagbomna kídí, Kumkeng Ekum lokke agér gérna kídí, demangkom Kumkeng Ekum sokke abíd ami takam teyolo kajanang, dore-tííre, agér ire laanam ayon kamayé.

²⁵“Delokke Ejra no, nokkíng yémín gena Shédíke nom kénjing-paajing monam akorpe, korong rotkonlo duuna miri takamem kebang ludope amiem parlíktoka; delokke ayonem kénmanem no poyil langka.

²⁶Delokke sékodí nok Shédíke ayonem, delokke rojake ngiitom ayonem mínggemape iyédí, bím bottepe ajéng ipe aido; sidope iyékom, monpakdope iyékom, demangkom bík ekurang kídíem langkam dope iyékom, demangkom pateklo líkbape iyékom líktoka.”

²⁷Ejra bí poto, “RUUTUM, ngoluke buku kídíke Shédíme yitgelangka! Bí sikepe Jirusalemlo duuna RUUTUMke Kumkeng Ekumem mínggedope rojaem aapí gemoto.

²⁸Shédíke ayang kootír loge, ngo roja kelang bím poyil-igulna, delokke bíkke ralnarung tabung ruutum kídíke aipe mííbanamem paato. RUUTUM ngok Shédíbí ngom aapí míídugem bila, ngo Israellok pínmík-ramík lokke miro bojéko ngokkíng enlatmín bosudokupe tolíkdope polato.”