Read Alladian EJRA 9 Bible Online

EJRA 9 - Alladian bible

EJRA 9

¹Sike atí takam sim iyinrong delo, ruutum yégebona kídíe ngokkíng aala luto, “Israel ami kídíelang, miri, delokke Lebi kídíe, Kanaan ami, Hittit ami, Perijjit ami, Jebus ami, Ammon ami, Moab ami, Ijipt, delokke Amorit ami kídíke angu-angu amonglok belum-bekamna agér kídí lokke bulu agíem deenampe mesumang.

²Kapeila bulu agísu legapelang buluke oo kídí legape buluke ome kídíem méngpe laato; dekepeila deena opínde mibo among delok ami kídílo soyél sukai. Delokke sikepe aroem mepaksula imemna kídí aralo migom kídí, delokke tukdang ami kídíe kerang-kerangpe igebonape idung.”

³Ngo sim agom sim tatyéname, ngo ngok ege-galugem bétsuto, delokke ngok dumíd emlang sokmurem bínsula míngkén-mííyén yimape duuto.

⁴Delo jine pakbope yénam lokke aalatsukuna ami kídíke aroem ipat sunam legape Israel lok Shédíke agomem tatla séko bulu dan-getodí, bulu yume ipak idíloope ngokke míngasula duudo delo, ngokkíng bamdumsuto.

⁵Yume ipak idíe píído delo, ngo ngok aapíe míídírla dungko delo bétna ege-galugem gedola, lebíng kooníngla delokke ngok alage yamtardola RUUTUM ngok Shédíme kumto,

⁶“E Shédía, ngo nok keranglo ngok dumpongem ngemonpe yagorupe annying aloodung. Kapeila ngoluk paab kídíe ngoluk dumpong kídíem sangon yangkai, delokke ngoluk imem kídíe taleng loope sangonkai.

⁷Ngoluke buku-neku kídí longe lokke ila silo loope ngolu bottena imemem itíla yédung. Ngoluke imemnam kídí legape ngolum, ngoluke roja kídíem, delokke ngoluke miri kídíem mibo among roja kídí alaglo, yoksalo, jine-pakbope yénamlo, rotkam-langkam dope, delokke ipusiléédope melíktung; dekepe ngolu silo loopekom idung.

⁸Idola supak anyongo legape, E RUUTUM ngoluke Shédía, no ngolum yagorupe ayala ngolum ayokonem jine pakbope yénam lokke laalen langkula so deena amongso aipe duumotungku. No ngolum jine pakbope yénam lokke asar molangkula aní yénamem bitungku.

⁹Ngolu jine pakbope yétuai; idolangkom ngoluke jine pakbope yénamso Shédí no ngolum mepakmang. No Parsia lok roja kídíem ngolume mííbang mola, bénromla duuna nokke Kumkeng Ekumem morep ladokupe gímotoku, delokke Judah lolang Jirusalemlo eetetpe yékunamem paamotoku.

¹⁰“Idola supak E Shédía, sikepe irongem ngolu nom ingkoko pobilapene? Kapeila ngolu lekoda nokke lulígem

¹¹nokke béérang, kaalu miri kídílo bilíknamem ipéésuto kukéng. Bulu ngolume sikepe pobituai, ‘Noluke among yébom kupenamsi deemaruna amongko, kapeila so duuna kídare moolekon lokke moolekon loope belum-bekamna ségu-siyang lok bíídope tabung among sim imotung.

¹²Dekepeila buluke oo kídílo noluke ome kídíem bimapeka, delokke noluke oo kídí kepe buluke omeme laabimapeka, delokke nolu raldope, delo among sokke aina atíem dodo-tíídope, delokke noluke ome-oo kídíkepe sim among sim agínkepe mebidope, buluke ainam demangkom edíngnamem edílokom matamapeka.’

¹³Ngoluke yémem-imemnam legape sikepe nokke ingéérong emteng, ngolum no ngoluke paabanam ingéngem anyoyape paamola, ngolume turpek motung emla Shédí nom ngolu kéndung.

¹⁴Dekemílo ngolu lekoda nok lulígem kapekísa míípak pala, belum bekamna agér ina ami kídí so minyam ibosulayén? Ngolu dekepe inamko kamílo, no ngolum nyokgít berokdope yagorupe marbomla, atel koteng turla duumoyimayé.

¹⁵RUUTUM Israellok Shédía, no kebang lujine, idola ngolum no meturtung. Ngolu nok keralo imemem ponkan sudung; ngolu nokke keralo atí aabamang.”