Read Alladian NEHEMIAH 1 Bible Online

NEHEMIAH 1 - Alladian bible

NEHEMIAH 1

¹Hakaliahke oo Nehemiahke agom kídíe: Artajarjeske takying annyinape Parsia lokke rojape idoem, Kisleb poololo ngo Susa luunelo yédo.

²Delo ngokke bíro kon Hanani bí ami ayoko Judahlok aabosuto. Delo ngo bulum Babilon amonglo monnyokko loge píílat sukuna Jihudi ami kídí legang emlang Jirusalem legangem íngkíto.

³Delo bulu ngom poto, “Monnyokko loge píílat sukuna kídíe ngoluke amonglo atung-aréng pelang duk-adír rupe duudung. Mibo ami kídíe bulum kaapu-kaaléla ibomdung. Jirusalemke líísak etore supak peteng bénkéla doodung delokke yabgo eyabemte eme rílíkdo delokke ila supak peteng ilík kumang.”

⁴Sim agom kídí sim ngo tatyéname, ngo duungadola kapsuto, delokke longe ayoko ankí kítíto; delokke ngo teyong among lokke Shédíke keralo doyi-tííyimape kumtíto.

⁵Delo ngo kumla poto, “E RUUTUM teyong amongke Shédía, nom mínggena, delokke nok lulígem igena kídílo daapong emlang ayangem bomgapna bottena, delokke pesonam Shédí nom ngo kumdung;

⁶ngokke, Israel ami kídílok, nokke mirupe ngoluke imemnam paabem ponkansudola, nok keralo longe-yohpe Israel ami, nokke béérang kídí legape kumnamsim nok nyorunge tadbilayika, delokke nok amige kaabilayika. Arorupe ngolang ngok abu kídíe paab ito.

⁷Ngolu nok mirupe ila arolok yémato, delokke nok béérang Mosi kelo lulígnam ngiitom yédongem, delokke ayon kídíem ngolu igemang.

⁸Nok béérang Mosi kelo nok políknam agomem míípa sulangkuka: ‘Nolu mínggap mayémílo, ngo nolum mibo ami kídí aralo apit-ayit imoyé;

⁹idola nolu ngokkíng aalat langkula, delokke ngok ngiitomem igela yéyékumílo, nolum monnyokla tani among duurí loope byakpan sula yédokom, nolum dekedelok laadum suyéku, delokke ngok amíne duudope emla ngok ullennam amonglo bomayéku.’

¹⁰Bulu nokke bottena ralnam loklang nokke tolna alaglok mopítsukunam nokke béérang kídíe lang nok ami kídíe.

¹¹E RUUTUM, nok béérang sok kumnam emlang nok amínem pesonamem aipe míína nok béérang kídílok kumnamem nok nyorunge tatgap bilayika; delokke silo nok béérang sim apíímolangka, delokke roja simteng ngom ayang kaapadope no ruubiyika.” Delo longe kídí delo ngo roja lokke apongem iyabinape yéduai.