Read Alladian NEHEMIAH 13 Bible Online

NEHEMIAH 13 - Alladian bible

NEHEMIAH 13

¹Delo longe delo bulu ami takamke tatkolo Mosike kitab lok porito; delokke delo bulu Ammon ami demangkom Moab amiem Shédíke milumlo edílokom aamo mayé emla atnamko paalento;

²kapeila bulu Israelem ettínglok lang asilok bomla kaarík sumape idola, buluke mirupe bulume béédope emla Balaamme ríkrap bolíkto. Idola ngoluke Shédíbí béénam dem utepooro kope ilatmoto.

³Edílo ami kídíde ayon lubinamem tattodí, delo mibo ami takam dem Israel lokke angupe ito.

⁴Sok kerape ngoluke Shédíke ekum lokke kumsung kídarem kaabomdope parlíknam miri Eliashib bí Tobiahke angongpe ila,

⁵kerape buluke ali-ayé amanem, nampona atíem, peking-pesagem, delokke ali-ayélok íying sanpegem, delokke ngiitom akorpe Lebi kídíem, miri luna kídíem, delokke yapgo lamgé dakbomna kídíem binam ali-ayélok, onggur alanglok, delokke téllok íying sanpegem, delokke miri kídí kepe bidum sunam takamem mesingko pírtek bottenako Tobiahme ikemoto.

⁶Sikepe idung dem ngo Jirusalemlo duumato, legade Babilon lokke roja Artajarjeske takying angum kolang taknyinape ruutum bomdo delo ngo roja kelo gítoku. Delokke oolko dorongem roja dem ngo enmo dokupe rogula,

⁷Jirusalemlo ngo aatoku, delokke delo ngoluke Shédíke ekum lokke pírtek kídílo Tobiahke legape pírtekko Eliashib bí irung bila inam, deemang dem ngo kaapato.

⁸Delo ngo yagorupe marla, ngo Tobiahke bomnam atí-sirí takamem pírtek delok ellen bito.

⁹Delokrongem ngo ukumlíkla, bulu pírtek kídídem deebín toku, delokke ngo Shédíke ekum lokke peking-pesak, ali-ayé aman kídíem, delokke nampona atíem delo leesi siyintoku.

¹⁰Lebi kídíke paapenam tarongem bulume bimape ikolok, agér gérna Lebi kídíe lang miri luna kídíe agí-agí aríklo duglík sudoku peteng ngo kaato.

¹¹Delok legape ngo migom kídíem lukísula luto, “Íngko legape Shédíke ekumem mepak kane?” Delokke ngo bulume lekope laadum sulangkula bulume parlíknam agérlo ilíktoku.

¹²Delokrongem Judah lok ami takame ali-ayélok, onggur alanglok, delokke téllok íying sanpegem kumsung kídí delo geangto.

¹³Delo ngo kumsung kídíem kaabomnape miri Shelemiahme, poyilna Jadokme, delokke Lebi kídí lokke Pedaiahme, delokke bulume igulnape Mattanielke oten, Jakkurke oo Hananme parlíkto, kapeila bulu míídíínampe agér-anamlo ito; delokke buluke bíro kídíem ato-siroem ornamde buluke agérpe ito.

¹⁴E ngok Shédía, sok legape ngom míípasudakyika, delokke ngok Shédíke ekum legang pelang bím agér ibinam legape, ngok aina agér inam kídí sim gítpak bimayika.

¹⁵Delo longe kídí delo Judahlo milokong kídíe Sabbath longelo onggur ayé alangem kétla, delokke deddína ali-ayém bomlangkula delokke gado kídílo pyalíkla; delokke onggur alangem, onggur kídíem, donam tapang ayé kídíem, delokke atí-atína amanem gela Sabbath longelo Jirusalemlo enang gedokupe ngo kaato; delo ngo bulume donam kodo longe delo lutorto.

¹⁶Jirusalemlo duuna, Turlok ami kídíekom, engoem delokke atí takam ekurangem geangla Sabbath longelo Jihudi ami kídílo delokke Jirusalemlo pesi-koret ibosuto.

¹⁷Delo ngo Jihudi lok miro kídíem lukísula sikepe bulum luto, “Sabbath longeme deemomana, aimana inam sim, nolu kape ikane?

¹⁸Noluke abu kídíe sikepe ila, ngoluke Shédíbí ngoluke teyong lolang luune sok teyoso atímangem ruulíkmatonía? Dekepe ilateng nolu Sabbath em deemang ipaala, Israel teyolo mangkam yana marnamem laalíkdung.”

¹⁹Sabbath kerangpe, Jirusalemke yapgo kídílo yume ugyume yumayéname, ngo eyab kídíem ikapdope, delokke Sabbathe iyinmang ayarem siyya madope lulíkto. Delokke Sabbath longelo eget atí geang madope emla ngok ami ayokonem yapgo lamgé kídílo parlíkto.

²⁰Delokrongem pesi-koret ine, delokke ekuserang takam atíem kona ami kídíe Jirusalem luyudelo leko-lennyi aala iplík-dolíkla ito.

²¹Idola ngo bulum lutor dola poto, “Nolu kapeda líísak etor keralo iplík-dolík dune? Nolu dekepe leko iyékuda mílo ngo noluke teyolo alage leelíkyé.” Delok longe delokke ila bulu Sabbath longelo angkumato.

²²Delokke ngo Lebi kídíem Sabbath longeme deedope menam legape, agíem deebínsula aadola, yapgo lamgé kídíem kaabomdope lulíkto. E ngok Shédía, simteng ngokkepe míípa subilangka, delokke nok saggapna ayang akorlok ngom turmo langka.

²³Delo longe kídí delo Jihudi kídíe Ashdodlok, Ammonlok, delokke Moablok mime kídíem méngpe bomdo peteng ngo kaato;

²⁴delokke buluke koo kídí ayokone Ashdod agompe lutuai, delokke bulu agíke Judah agomem polamato, idola ami abíd agomem polato.

²⁵Delo ngo bulum lula, delokke bééla, ayokonem demla, buluke dumíd emteng bulento; delokke ngo bulum sikepe lula Shédíke amín lok pésumoto, “Nolu noluke ome kídíem buluke oo kídílo bimayé demangkom noluke oo kídí legape demangkom noluke agísu legape buluke ome kídíem méngpe laamayé.

²⁶Sikena mime kídí legape Israel lok roja Solomonbí paab imatonía? Deddína opín takam aralo bíkke kísana roja kamato, delokke Shédí bí bím ayarutuai, delokke Shédíbí bím Israel takam teyolo rojape imotuai; idola mibo mime kídíe bímteng paab imoto.

²⁷Dekemílo ngolu noluke siddípe pesorunam atímape inam sim kanggesula mibo mime bomla ngoluke Shédíme míngge rumape iyénía?”

²⁸Miri ríne Eliashib ke oo Jehoiadake oo kídílok akone Horon ami Sanballatke magbope ituai; delok legape bím ngo ngokke lok monpakto.

²⁹E ngok Shédía, bulum míípa sulangka, kapeila bulu miri idongem, delokke miri daapong emlang Lebi kídíem deemang ipaato.

³⁰Dekepe ngo mibolok atí-sirí takamem ibínto, delokke miri kídí kelang Lebi kídíke mipil agér ipenamem ngo ilík bila,

³¹lurek binam moodílo esingem gebidope, delokke siipí-siiyé len-gena amanem bidope emla ngo ruulík bito. E ngok Shédía, agínpe ainam legape ngom míípa sulangka.