Read Alladian NEHEMIAH 2 Bible Online

NEHEMIAH 2 - Alladian bible

NEHEMIAH 2

¹Roja Artajarjeske dítak íying annyinape ruutum bomdo lokke Nisan poolo delo, roja lokke dodo-tíídoem ngo apongem laala roja delo bomabito. Ngo bík keralo edílokom adír kímangai.

²Depeila ngom rojade ííto, “Nom kidupe kaamang, idola kape nok migmode kemekdune? Si abídmang, nok aapíe ashémadung nape?” Delo ngo pesorunge ito.

³Ngo rojadem poto, “Roja no turyar daklangka! Ngok abu kídílok simangem yuko ago kídílok dungko kídíe nyokrodem, delokke delok yapgo lamgé kídíem emelok romnyok rodem, ngok migmoe kape kemek mayéne?”

⁴Delo rojade ngom poto, “No ingkoko rogupe emla míídun?” Dekepeila ngo teyong amongke Shédíme kumpala

⁵rojadem roguto, “Rojano aipe mííbi domílo, delokke nok béérang si nok kangkolo mííbanampe idumílo, ngok abu kídí lokke ago dungko luuneme morepdokupe, Judahlo ngom melík tokuika.”

⁶Delo rojade ngom ííto (Depe íído delo ranide roja ampenglo duudo), “No edít longe legape enyékune, delokke edílo no aalatsuyékun?” Dekepe rojade ngom melíkkupe aipe mííto; delokke ngo bím moodíko lubisuto.

⁷Delokke ngo rojadem roguto, “Rojano aipe míílík domílo, ngo Judah amonglo píngkuma tetengem, Anggodan Euphrates amonglo duuna gobonor kídíem, ngom buluke amonglok enmo ladokupe, bulum bidope shiti lok ngom atlen bilangka,

⁸delok teyolo rojake nyomrangem kaabom bina Asaph kelo, Kumkeng Ekum lokke líísak yapgo lamgé kídarem, luune delok líísak etor kídarem, delokke ngok duupeko ekumem monana borongga kídí legape esing siiponglok bí ngom bidope shitiko atlík bilangka.” Delo ingkuem ngo kotodí rojade ngom bito, kapeila Shédíke aina alage ngok teyolo igulto.

⁹Rojade ngokkelo lekope sipaying migom ekelang guré dugbomna opééko melíktoku, delo ngo enlen langkula Anggodan Euphrates amonglo píítoku. Delo ngo rojake shiti kídarem gobonor kídídem bito.

¹⁰Idola Israel ami kídíke ainam legape matakuna amiko aadungku emla tayyéname, Horon ami Sanballat lang Ammon ami Tobiah migom bínyi aklíngkai.

¹¹Dekepe ngo Jirusalemlo pííla, longumkope

¹²sékometeng Shédíbí ngokke aapíso Jirusalem legape ingkuem ruulíktudí dem ngo pobimang. Delo ngo yoh raajangem gerepla, ngokkelo ami anyongko lekope gílenbosuto. Ngokke gíkeng gado petomde ngoluke taro gíbonampe ito.

¹³Ngokke luune delok gílenla anggodanke Yiibe Lamgé delok gíla sokkodanke Ménsurung Asi Deerung delo, delokke Nyoruk Uupom Lamgé loope gídoem kaamodo ada. Gídula ngo luune delokke bénletna líísak etor kídí emlang emelok rompak tonam yapgo lamgé kídíem kanggoto.

¹⁴Delokrongem luune delokke sanggodan delok ngo línggíngdanpe Sirung Lamgélo delokke Rojake Paatang loope gíto. Ngokke gíbomnam gadode bénla doopom kídí delok gíkan yimala

¹⁵ngo yoh delo líísak etorem kaadola Kidron lok jikong delok gítoku. Delokke ngo tuulat sulangkula Yiibe Lamgélok luune delo aatoku.

¹⁶Delokke migom kídíe, ngo ingkolo gítodí, delokke ngo ingkoko ibomdudí dem atí kénmato; delokke teyolo Jihudi kídíem, miri kídíem, miro kídíem, migom kídíem, delokke agér ipena abíd takamem, deloloope ngo atí pobimato.

¹⁷Delo ngo bulum poto, “Ngolu kape kísape atung-aréédudí, Jirusalem lok yapgo lamgé kídíem eme gunyokla Jirusaleme kape nyokla duududí, dem nolu kaayin sudung. Iname kaju ngolu annyingla duuyimadope Jirusalem lok líísak etorem torlang kuju.”

¹⁸Depe lukan rongem, bulume ngokke teyolo Shédíke alage igulnam legang emlang ngom rojake agom ponam kídíem ngo pobito. Delo bulu poto, “Kaju ngolu gerepla molang kuju.” Bulu dekepe aina agér inam legape edíírupe lekobosuto.

¹⁹Idola Horon ami Sanballat lang Ammon ami Tobiah, delokke Arab ami Geshem bulu, sok legangem tatla, ngolum ngilka-lukala, lupak-luyakla sikepe luto, “Ingkona atíko nolu idaknai? Nolu rojame akpé sudaknía?”

²⁰Delo ngo bulum poyansuto, “Teyong among lokke Shédíbí ngolum aipe ipíímoyé, delokke ngolu bík béérang kídíe gerepla anípe morepyéku; idola Jirusalemlo noluke taarong paape-ipenam, demangkom ibaanam atí kamang.”