Read Alladian NEHEMIAH 3 Bible Online

NEHEMIAH 3 - Alladian bible

NEHEMIAH 3

¹Delo miri írne Eliashib bí, bík bíro miri kídílo lekope agérem irepla Mér Lamgéem moreptoku. Dem bulu tosak líkla, delok eyab kídíem ilíkto. Bulu sim Língkolok Tawar [1] delokke Hananelke Tawar loope tosak líkto.

²Delokke bík méélamlo Jeriko lok ami kídíe moto. Delokke buluke méélamlo Imrike oo Jakkur bí moto.

³Delokke Hassenaah ke oo kídíe Engo Lamgé em moto; bulu sok gaang kídíem díílíkla sok eyab kídíem, boltu kídíem, delokke remkong kídíem ilíkto.

⁴Delokke buluke méélamlo Hakojke oten Uriahke oo Meremoth bí tungkonem mosi-momotoku. Delokke buluke méélamlo Meshejabel ke oten Berekiahke oo Meshullam bí mosi-momotoku. Delokke buluke méélamlo Baanake oo Jadok bí olekonem motoku.

⁵Delokke buluke méélamlo Tekoa ami kídíe mosi-momotoku; idola buluke miro kídíe bulum kaalík-ruulíkna ruutum kídíke agér rubinamem bulu imape, ruutum kídíke agomem tatmato.

⁶Delokke Paseah ke oo Joiada lang Besodeiah ke oo Meshullam bínyi Aku Lamgé em mosi-momotoku; bínyi sok eyab kídíem, íkkarnana kídíem, pírtum sunana remkong kídíem ilíktoku.

⁷Gibeon lok Melatiah, delokke Meronoth lok Jadon, delokke Gibeon lokke lang Mijpah lok ami kídíe bínyike méélamlo mosi-momoto; bulu korong rotkon lok among ruutum rumkínglo duune.

⁸Buluke méélamlo uun yogmo Harhaiah ke oo Ujjiel bí mosi-momoto. Bík méélamlo nampona tél pína kídílok akon Hananiah bí mosi-momoto; delokke bulu Bortakna Suppi loope Jirusalemem motoku.

⁹Buluke méélamlo Jirusalem lok distik olekonem ruutum bomna, Hur ke oo Rephaiah bí mosi-momoto.

¹⁰Bík méélamlo Harumah ke oo Jedaiah bí bík ekum ampengke olekonem mosi-momoto; delokke bík méélamlo Hashabneiahke oo Hattush bí moto.

¹¹Harimke oo Malkijah lang Pahat Moabke oo Hassub bínyi ole konem lang Ettíng Pampom kídílok Tawarem mosi-momoto.

¹²Bínyike méélamlo Jirusalem lok distik ole konem ruutum bomna Hallohesh ke oo Shallum bí bík ome kídí igullok tungkonem mosi-momoto.

¹³Hanun lang Janoahlok ami kídíe Yiibe Lamgéem mosi-momoto; delokke delok eyab kídíem, karkapnana kídíem, pírtum sunana kídíem ilíkto, delokke Nyoruk Uupom Lamgé loope 440 mitarkope líísak etor suppiem mosi-momoto.

¹⁴Beth Hakkherem distik em ruutum bomna Rekabke oo Malkijah bí Nyoruk Uupom Lamgé em mosi-momoto; dem bí molangkula eyab kídíem, boltu kídíem, delokke pírtum sunana kídíem ilíkto.

¹⁵Mijpah distik em ruutum bomna Kolhojeh ke oo Shallum bí Siirung Lamgé em mosi-momoto; bí dem motoku, delokke dem ikapla, delok eyab kídíem, boltu kídíem kongkarna kídíem ilíkto. Delokke bí Dabid ke doolung danpe tokna líísak ebang kídíloope lang rojake bagan lok Shelah Paatangke líísak etor suppiem pítoku.

¹⁶Bík méélamlo Beth-Jur lok distik moole konem ruutum bomna Ajbukke oo Nehemiah bí Dabid ke ago kéényung among loope, roonam pukuri, delokke tolna-gaana ami kídíke ekum loope mosi-momoto.

¹⁷Bík méélamlo Baanike oo Rehumke rumkínglo Lebi kídíe mosi-momoto. Bík méélamlo Keilah distik moole konem ruutum bomna Hashabiah bí bík moole modumpe mosi-momoto.

¹⁸Bík méélamlo, Keilah moole konem yégebona Henadadke oo Babbai bí mosi-momoto.

¹⁹Bík méélamlo Mijpah em ruutum bomna Jeshua ke oo Ejer bí líísak etorke bilkuko loope duuna mimak ekurang kumsunglo saana bedangdan loope mosi-momoto.

²⁰Bík méélamlo miri rííne Eliashib ke ekum eyab loope kéényungkon ole konem Jabbaike oo Barukh bí mosi-momoto.

²¹Bík méélamlo Hakkoj ke oten Uriah ke oo Meremoth bí, Eliashib ke ekum eyab lokke ila Eliashib ke ekum duurí loope ole konem mosi-momoto.

²²Bík méélamlo Yiibe delokke miri kídíe mosi-momoto.

²³Buluke méélamlo Benjamin lang Haashub bínyi, buluke ekum kerang lokkem mosi-momoto. Bínyike méélamlo Ananiah ke oten, Maaseiahke oo Ajariah bí bík agí ekum abe lokkem mosi-momoto.

²⁴Bík méélamlo Henadadke oo Binnui bí Ajariahke ekum lokke keralok ila,

²⁵etor kéényung orek konem mosi-momoto. Ujai ke oo Palal bí kereng etor kéényunglok ila sontori kídíke kebang duupom ampengke roja lokke teyongke tongi ekum loope mosi-momoto. Bík méélamlo Parosh ke oo Pedaiahbí

²⁶lang Ophello duuna Kumkeng Ekum béérang kídíe, sanggodan Asi Lamgé, delokke Kumkeng Ekumem kaabomna tongi delokke ampeng loope mosi-momoto.

²⁷Bík méélamlo Tekoa ami kídíe bottepe íkkong saana tongi ekum kékonlo orek konem Ophel lok líísak etor suppi loope mosi-momoto.

²⁸Guréng Lamgé línggínglo miri kídíe agí ekum kékonem mipile mosi-momoto.

²⁹Buluke méélamlo Immer ke oo Jadok bí bík ekum kékon kem mosi-momoto. Bíkke méélamlo Sanggo Lamgé em kaabomna Shekaniah ke oo Shemaiah bí mosi-momoto.

³⁰Bík méélamlo Shelemiah ke oo Hananiah lang Jalaphke oo akké napena Hanun bínyi orek konem mosi-momoto. Bínyike méélamlo Berekiah ke oo Meshullam bí bík dungko kékonkem mosi-momoto.

³¹Bík méélamlo uun yogmokon Malkijah bí, Miphkad Lamgé kékonke Kumkeng Ekum lok béérang kídí kelang bési-bépar ina kídíke ekum lokke ila kéényung delokke teyong pírtek deloope mosi-momoto.

³²Delokke Mér Lamgé kelang kéényunglok teyong pírtek pénsamkem uun yogmo kídíe lang bési-bépar ina kídíe mosi-momoto.