Read Alladian NEHEMIAH 4 Bible Online

NEHEMIAH 4 - Alladian bible

NEHEMIAH 4

¹Ngolu líísak etorem morep dungku emla, edílo Sanballat bí tattodín, delo bí séngérupe marla Jihudi kídíem lukang-luyéla luto.

²Delo bí bíkke angong kídí kelang Samari lok sipaying magpé keradelo poto, “Si mekemna Jihudi ami kídísi ingkuekei idune? Bulu bénna kídarsim molayékunía? Bulu ipak aman kídíem ilíkmílo lotellok agér sim iyinlayé míídunía? Emelok romletnam doopom sok bulu ekum monana elíngem ilenlayédín?”

³Ammon lok Tobiah bí bík ampenglo dakdola sikepe lutemto, “Buluke mobom dunam líísak etor teyoso ménsurungko renga dokom bényamgeyé!”

⁴Ngo kumto, “E ngoluke Shédía, tatbiyika kapeila ngolum amie míípakdung. Buluke lupu-lulé kídí sime buluk dumponglo aalat sumolangka. Buluke kanam ato takamem rotkamla bulum mibo among kolo patek sobom dokupe imodaklangka.

⁵Buluke deemana agér inamem mesam bimapeka, delokke buluke paab kídarem mitpan sumapeka, kapeila ekum mona kídí ngolume bulu lukaato.”

⁶Dekepeila ngolu líísak etorem píbomla, etor delokke kedonem raadanglo píídope píto, kapeila ami kídíde aapí-aange apíírupe mííbomla eraprupe agérem ito.

⁷Idola edílo Sanballat, Tobiah, delokke Arab, Ammon, delo Ashdod doolunglok ami kídíe Jirusalem lokke líísak etorem morep repduk bomdungku emla, delokke pongkok kídíem mokap dakbong emla tattodí, delo bulu agí margíto.

⁸Dekepeila bulu Jirusalemem aabomla mimak, delokke delo ebín ipaadope emla lekope míírung-irung bosuto.

⁹Delo ngolu ngoluk Shédíme kumla, bulum kaaya-tatya sudope emla ngolu longe-yohpe lamkangem parlíkto.

¹⁰Idola Judah lok ami kídíe luto, “Joobínna kídare tolnampe ilayimang; delokke joobín pename bojéko doodungada; delokke ngolu líísak etor monam agérso ilayimang.”

¹¹Delok teyolo ngoluke miru kídíe sipe ludung, “Buluke ngolum kaamang kénmang adape ngolu, buluke aralo menang asak aala, bulum mokala buluke agérem itumyé.”

¹²Buluke anínlo duuna Jihudi kídíete aala, ngolum lemying kokai sikepe lutorto, “Buluke yéko-dakko takam loge, bulu ngolum mimak iyabomyé.”

¹³Delok legape líísak etor méélam lokke rumkíng yalum pongkok kídílo, delokke gíídanglo ami kídíem opín miyongpe, yoksa, gíníng, delokke ityi bomla, kaabomla yédope, ngo ami kídídem parlíkto.

¹⁴Depe irongem ato-siro takamem ngo aipe kaayin pala gerepla miro kídíem, migom kídíem, delokke ami abíd takam dem sikepe luyilto, “Bulum pesomapeka. Botteruna, delokke reyubrunam RUUTUM me míípasulangka. Bí noluke bíro kídí legape, noluk oo kídí legape, noluke ome kídí legape, noluke mime kídí legape, delokke noluke ekum kídí legape mimagem ibidung.”

¹⁵Edílo ngoluk miru kídíe, buluk mííbosunamem ngolu kénkai emla delokke buluk ruubomnam em Shédíbí isa-sapak bito emla tattodí, delo ngolu líísak etor píko agí-agí ríkngolo gílat sutoku.

¹⁶Delok longe delokke ila, ngok agér iyana kídíe pínam-monam agérlo opéé attungkone yéto, delokke opéé tungkone yoksa, tamte, ityi, delokke mimak leemo gela yéto; delokke yégebona migom kídíe tabung Judah lokke ekum erang

¹⁷líísak etor píkolo yéna kídí méélamlo dagto. Monana atí-siríem joona kídíekom alag akonlok agér ito, delokke alag akonlo mimak inanem bomto.

¹⁸Agér ina mipil miyonge agí-agíke amíllo yoksaem ginlíksula agérlo yégoto. Bikul mutbona amide ngokkelo yémín geto.

¹⁹Delokke ngo miro kídíem, migom kídíem, delokke ami abíd takam dem sikepe luto, “Agér si bottedung, delokke bortakrudung, delokke líísak etorsi ngolum akonem mootengrupe akon lokke ikédung.

²⁰Ingko danlo nolu bikul muddudem tayyédí, delo ngolu kelo aadum sulangka. Ngoluke Shédíbí ngoluke legape mimagem ibiyé.”

²¹Dekepe ngolu agérdem iyarla, delokke pang kardo lokke ila takar lendo loope opéékone yoksa gela yéto.

²²Dekepe idoem ngo ami kídíem sikepekom luto, “Milokong mipile lang bík béérange Jirusalem arangso yoem, ngolume yoem kaabomnape, delokke longelo agér gérdope duupe aido.”

²³Delo ngo, ngok bíro kídíe, ngom agér ibina kídíe, ngokkíng yémín gena dakbomna kídíe sékoteng agíke genam egem pítsuna kamato. Delokke ngolu mipile agíke alaglo mimak inanem bomla yéyinto.