Read Alladian NEHEMIAH 5 Bible Online

NEHEMIAH 5 - Alladian bible

NEHEMIAH 5

¹Oolko dorongem milo kídíe lang buluke mime kídíe, buluke Jihudi bíro kídíem ebínrupe agom lurep bomto.

²Ayokone sikepe luto, “Ngoluke erange rajédung; iname ngolu dola turdope ali-ayé míídung.”

³Delokke sikepe lunekekom kato, “Dírí-keno legape, ngoluke arík kídíem, ngoluke onggur bagan kídíem, delokke ngoluke ekum kídíem ali langgape bondokpe bisuto.”

⁴Delokke teyolo sikepe lunekekom kato, “Ngolu ngoluke arík kídí, delokke onggur bagan kídí teyolo rojake kajanang lanam legape, murkongem nartung.

⁵Supak ngoluke adín-amílsi, ngoluke bíro kídar lokke adín-amíl kísadung. Ngoluke koo kídísi buluke koo kídíke kísadung; idolangkom ngolu ngoluke ome-oo kídíem imopemang míílateng abílpe imope idung. Ngoluke ome kídí ayokonem abílpe imotubong; idola ngolu atí igul langkumang, kapeila ngoluke arík kídíe lang ngoluke onggur bagan kídíe ami alaglo duudung.”

⁶Ngo buluke kapgusunam emlang sim agom kídí sim tatyéname yagorupe marto.

⁷Ngok aapílo sim legasim míngí-sérisuto, delokrongem ngo miro kídí emlang migom kídíem atímangem luketto. Ngo bulum luto, “Nolu agíke bíroem ipusiléé sudung.” Delok legape ngo bulum bottena duusum kebangko gogbomla,

⁸delo ngo bulum sikepe luto, “Ngoluke ilanamlok, mibo-miying ami kídílo kolíknam ngoluke Jihudi bíro kídíem ngolu relentoku; idola supak ngolukelo kolat líkdokupe emla noluke bíro kídíem nolu kodung.” Dem talla bulu asoope ito, delokke atí agom lulamato.

⁹Delokke akoda ngo luto, “Noluke ibomnam atísi aimang. Ngoluke miru kídíe ngolum ngilka-lukang madope ngoluke Shédíme pesola nolu yépemanía?

¹⁰Delok teyolo ngo lang ngok bíro kídíe, delokke ngom agér ibina kídíe abal emlang aliem narmopoodung. Ngolu unta lanam sim melaju.

¹¹Siloke longeruso bulukelok noluke laanam arík kídíem, onggur bagan kídíem, olib bagan kídíem, ekum kídíem, murkong kídíem, ali ayé, onggur alang, delokke tél takamem, bulum bilat sulangkuka.”

¹²Delo bulu sikepe luto, “Ngolu sim takam sim bilat suyéku, delokke ngolu bulukelok atíyang komayé. Ngolu nok pokampe iyé.” Delo ngo miri kídídem gogla bulu kape toge sutodí, dekepe idope emla pésumoto.

¹³Delo ngo ngok gasor yéggenamem[2] taasula poto, “Sok kísape séko amie agíke toge sunamem imayédí bíme Shédíbí agér ikolok lang ekum-arík ato-siro tabung lok ikutyé, delokke arukmoyé.” Delokke delo dumsuna takamde “Amen!” emla RUUTUMme yidgeto. Delokke ami kídíde buluke togesunampe ito.

¹⁴Ngome Judah amonglo buluke gobonorpe idope parlíkla yédo takying demlang taknyidem, roja Artajarjeske takying annyinape ruutum bomdo delokke ila takying angum kolang taknyinanape ruutum bomdo loope, ngo lang ngok edung erang kídíe gobonorke dokampe donamem domato.

¹⁵Ngok kerape gobonorpe yégena kídíde ami kídí teyolo tebegna eget kope ituai, delokke bulu dopenam emlang onggur alangem langko teyolo longe lotello baldín nokdi íying appiko ami kídílok latuai. Buluk béérang kídíeteng ami kídí teyolo ruutumpe ibomtuai. Idola ngo dekepe imato, Shédíme pesonam legape.

¹⁶Líísak etor monam agérso ngo igapto, delokke ekurang, asi-among atí matamato. Ngokke béérang takame agér delo yédumsuto.

¹⁷Delok teyolo, ngolum dunggona ami kídí lokke ngolu kelo angkuna kékon loteng, midum língko kolang íying pilngoko Jihudi ami kídíe lang migom kídíe, ngokke doboname kato.

¹⁸Longe miyonglo gooru rubo atelko, ulnam mér akkéko, delokke perok lok bojéko ngok legape dopenamem irung bidungai; delok teyolo looying aralo letelko aní apongem alummape bituai. Idola ami kídíke tebeg gepenamem ngo kénla, gobonorlok donam are paapenamem komato.

¹⁹E ngokke Shédía, sok ami kídí sok legape ngok aina agér ibinam sim míípang subilayika.